ހަންކެޑެ މަޝްރޫއުގެ އަމަލީ މަސައްކަތް ވަރަށް އަވަހަށް ފެށިގެން ދާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ސަރުކާރު ހިންގާ ކޯލިޝަންގެ މައި ޕާޓީ، ޕީއެންސީ އިން އައްޑޫ ހިތަދޫ ހައި ސްކޫލުގައި ބޭއްވި ޖަގަހަ ޖަލްސާގައި ވާހަކަފުޅުދައްކަވަމުން ރައީސް ޑރ.މުޙައްމަދު މުޢިއްޒު ވިދާޅުވީ، 2،080 އެނދުގެ މި މަޝްރޫއު އޮތީ މިހާރު އަމަލީ މަސައްކަތް ފެށޭ ހިސާބުގައި ކަމަށެވެ.
މި މަސައްކަތުގެ ވާހަކަ އެމްޑީޕީ ސަރުކާރުން 2021 ވަނަ އަހަރު ދައްކަން ފެށި ނަމަވެސް މިދިޔަ އަހަރު ނިމުނު އިރު ވެސް އެ މަސައްކަތެއް ނުފެށުނު ކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، މި ސަރުކާރުން ތަރައްޤީ ގެނެސްދޭނީ އަމަލީ ގޮތުން ކަމަށާއި، ހަމައެކަނި ވާހަކައެއްގެ ގޮތުގައި ފޮތެއްގައި ލިޔެގެން ނޫން ކަމަށެވެ.
"ހަންކެޑެ މަޝްރޫއު އޮތީ މިހާރު އަމަލީ މަސައްކަތް ފެށޭ ހިސާބުގައި. ވަރަށް އަވަހަށް އަމަލީ މަސައްކަތް ފެށިގެން ދާނެ. ދެހާސް އަށްޑިހަ އެނދުގެ މަޝްރޫއެއް އެއީ. އެެމްޑީޕީ ސަރުކާރުން ދެހާސް އެކާވީހުގައި މި ވާހަކަ ދައްކަން ފެށި. މިދިޔަ އަހަރު ނިމުނު އިރު ވެސް އެ މަސައްކަތެއް ނުފެށުނު،"
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، ހަންކެޑެ މަޝްރޫއު ނިމިގެންދާއިރު، 1،980 ވަރަކަށް ވަޒީފާގެ ފުރުސަތު އައްޑޫ ސިޓީން ހުޅުވިގެން ދާނެ ކަމަށެވެ.
އިންޓަގްރޭޓެޑް ޓޫރިޒަމްގެ ދަށުން ކުރިއަށް ގެންދަން ނިންމާފައިވާ މި މަޝްރޫއު، ކުރީ ސަރުކާރުން ފެށުމަށް މޯލްޑިވްސް ފަންޑް މެނޭޖްމަންޓް ކޯޕަރޭޝަން ކޮމްޕެނީ (އެމްއެފްއެމްސީ) އާއި ޗައިނާ ނޭޝަނަލް އިލެކްޓްރިކަލް އިންޖިނިއަރިން (ސީއެންއީސީސީ) އާއި އެކު މިދިޔަ އަހަރު ސޮއި ކުރި ނަމަވެސް އޭރު އެ މަސައްކަތް ފަށާފައިއެއް ނުވެއެވެ.
Advertisement
This content is created and paid for by advertisers and does not involve Voice Journalists
