ފާއިތުވެ ދިޔަ ފަސް އަހަރުގެ ތެރޭގައި އައްޑޫގައި ތާރުއަޅަނީ ކަމަށްބުނެ ކުރީގެ ރައީސް އިބްރާހިމް މުޙައްމަދު ޞާލިހު ހެއްދެވީ އިތުރުފުޅެއްކަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ވަޒީރު ސައީދު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ. މިގޮތުން އެބޭފުޅާ ވިދާޅުވީ، ރައީސް ޞާލިހު ވެރިކަމުން ފައިބައިގެން ދިޔައީ ފަސް އަހަރު ވަންދެން މަގުތައް ކޮނެ ރައްޔިތުންނަށް އެތައް ތަކުލީފެއް ރައްޔިތުންނަށް ކުރިމަތި ކުރުމަށްފަހުގައި ކަމަށެވެ.
ވަޒީރު ސައީދު މިފަދައިން ވިދާޅުވެފައިވާއިރު، ރޭގައި ސަރުކާރު ހިންގާ ކޯލިޝަންގެ މައި ޕާޓީ، ޕީއެންސީ އިން އައްޑޫ ހިތަދޫ ހައި ސްކޫލުގައި ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން ކޯލިޝަން ގެ ލީޑަރު އަދި ޕީއެންސީގެ ރައީސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ އައްޑޫގެ ބައެއް މަގުތައް ހެދުމަށް އެންމެ އާދައިގެ ސިމެންތި ފަށަލަ އެކަނި އަޅާފައި ހުރުމުގެ ސަބަބުން މަގުތައް ހަލާކުވަމުންދާކަން ފާހަގަކުރައްވާފައެވެ.
މިގޮތުން ރައީސް ޑރ.މުޢިއްޒު ވިދާޅުވީ، 100 ކިލޯމީޓަރުގެ ތެރެއިން އެފަދައިން ހުރި 60 ކިލޯމީޓަރުގައި ކޮންސްޓްރަކްޝަން މިނިސްޓްރީއިން އާރްޑީސީއާ ހަވާލުކޮށްގެން ތާރު އަޅައިދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
