އީރާނުން ހައްދުފަހަނައަޅާފައިވާ އިސްރާއީލަށް ދެމުންގެންދާ ހަމަލާތަކުގައި، އިސްރާއީލަށް ވައިގެ ސަރަހައްދު ހުޅުވައިދޭ ކޮންމެ ގައުމަކަށް ހަމަލާދޭނެ ކަމަށް އީރާނުން ބުނެފިއެވެ.
މިގޮތުން އީރާނުގެ ޑިފެންސް މިނިސްޓަރު މުހައްމަދު ރައްޒާ އަޝްތިޔާނީ ވިދާޅުވީ، އިސްރާއީލުން އީރާނަށް ދޭ ހަމަލާތަކަށް އެގައުމުގެ ވައިގެ ސަރަހައްދު ނުވަތަ ސަރަހައްދު ހުޅުވާލާ، ކޮންމެ ގައުމަކަށް ވެސް ވަރަށް ވަރުގަދަ އަށް ރައްދު ދޭނެ ކަމަށެވެ.
މިދިޔަ ހަފްތާގައި ސީރިއާގައި ހުންނަ އީރާނުގެ އެމްބަސީ ކޮމްޕްލެކްސްއަކަށް އިސްރާއީލުން ދިން ހަމަލާގެ ބަދަލު ހިފާނެ ކަމަށް ބުނެ ދެމުން ދިޔަ އިންޒާރުތަކަށް ފަހު، އީރާނުން އިސްރާއީލަށް އަމާޒުކޮށް ޑްރޯން އާއި މިސައިލް ހަމަލާތަކެއް ފޮނުވާލައިފައިވަނީ ރޭގެ ވަގުތެއްގައެވެ.
މިސައިލާއި ޑްރޯން ހިމެނޭ ގޮތަށް 200 އަށް ވުރެ ގިނަ ހަމަލާ އީރާނުން އިސްރާއީލަށް ފޮނުވާލިއިރު، އިސްރާއިލުގެ އަޔަން ޑޯމް އާއި ފައިޓަރ ޖެޓް ބޭނުންކޮށްގެން ބައެއް ހަމަލާތައް މަތަ ކުރި ނަމަވެސް އިސްރާއީލުގެ ބައެއް އަވަށްތަކަށް ޑްރޯންތަކުގެ ހަމަލާތައް ވަނީ އަމާޒުވެފައެވެ.
އިސްރާއީލުން ބުނީ، އީރާނުގެ މި ހަމަލާއާއި ގުޅިގެން މިހާތަނަށް އިސްރާއީލުގެ އަސްކަރީ މަރުކަޒަކަށް ބައެއް ގެއްލުންތަކެއް ވެފައިވާއިރު، އުމުރުން 10 އަހަރުގެ ކުއްޖަކަށް ސީރިއަސް އަނިޔާވެފައިވާކަމަށެވެ.
މި ހަމަލާތަކާއި ގުޅިގެން އިސްރާއީލުން އެގައުމުގެ ވައިގެ ސަރަހައްދު ބަންދުކުރިއިރު، ކައިރީގައި އޮންނަ އުރުދުން، އިރާގު އަދި ލުބުނާނުން ވެސް ވަނީ އެގައުމުގެ ވައިގެ ސަރަހައްދު ބަންދުކޮށްފައެވެ.
ބޭރުދުނިޔޭގެ ހަބަރުތަކުން ރިޕޯޓް ކުރާ ގޮތުގައި ހަމަލާތައް ހުއްޓާލި ނަމަވެސް، ކުރިއަށް އޮތް ތަނުގައި އިތުރު ހަމަލާތަކެއް ދިނުމުގެ ފުރުސަތު އޮތް ކަމަށް އީރާނުން އދ ގައި ވަނީ ބުނެފައެވެ. ހަމައެއާއިއެކު އީރާނުން ބުނީ އިސްރާއީލުން މި ހަމަލާތަކަށް ރައްދުދީފި ނަމަ އަނެއްކާވެސް ހަމަލާދޭނެ ކަމަށެވެ.
Advertisement
This content is created and paid for by advertisers and does not involve Voice Journalists
