ގިރާވަރުފަޅުން ގޯތި ލިބުނު ފަރާތްތައް، ގުޅީފަޅަށް ގޯތި ބަދަލުކުރުމުގެ މުއްދަތު އިތުރުކޮށްފިއެވެ.

ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ދޫކޮށްފައިވާ އަދަދަށް އެ ފަޅުން ބިން ނުނެގުމުން އެ ފަޅުން ގޯތި ދޫކޮށްފައިވާ ފަރާތްތަކުގެ ތެރެއިން ބައެއް ފަރާތްތަކަށް ގުޅީފަޅުން ގޯތިދޭން މި ސަރުކާރުން ނިންމާފައިވެއެވެ.

އެގޮތުން ގިރާވަރުފަޅުން ގުޅީފަޅަށް ބަދަލުކުރަން ނިންމާފައިވަނީ 1،250 އަކަފޫޓުގެ 193 ގޯއްޗާއި، 2.050 އަކަފޫޓުގެ 487 ގޯއްޗާއި، 2،450 އަކަފޫޓުގެ 4 ގޯތީގެ އިތުރުން 1،650 އަކަފޫޓުގެ 663 ގޯއްޗެވެ. 

ހައުސިންގް މިނިސްޓްރީއިން އިއްޔެ ކުރި އިއުލާނުގައި ބުނީ، ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ގުޅީފަޅަށް ބަދަލުވުމަށް އެ މިނިސްޓްރީން ހުޅުވާލާފައިވާ ފުރުޞަތުގެ މުއްދަތު އިތުރުކޮށްދިނުމަށް ވަރަށް ގިނަ ފަރާތްތަކުން އެދެމުންދާތީ މި މުއްދަތު 18 އޭޕްރީލް 2024 ވާ ބުރާސްފަތި ދުވަހުގެ 23:00 ނިޔަލަށް އިތުރުކޮށްފައިވާ ކަމަށެވެ.

އެހެންކަމުން، ގުޅީފަޅަށް ބަދަލުވާން ބޭނުންވާ ގިރާވަރުފަޅުން ގޯތި ލިބިފައިވާ ފަރާތްތަކުން ހިޔާވަހި ޕޯޓަލް (ބިންވެރިޔާ ސްކީމް>ރިކުއެސްޓް ކުރެއްވުމަށް) ލިންކް މެދުވެރިކޮށް ގުޅީފަޅަށް ގޯތި ބަދަލުކުރުމަށް ހުށަހެޅުމަށް އެ މިނިސްޓްރީން ވަނީ އެދިފައެވެ. މިގޮތުން ޕޯޓަލް މެދުވެރިކޮށް ރިކުއެސްޓް ހުށަހަޅާއިރު ގޯތި ލިބިފައިވާ ފަރާތްތަކުން ފުރިހަމަކުރަންޖެހޭ (ބައިތަކުގެ ތެރޭގައި ހިމެނޭ ބައިވެރިންގެ އިޤްރާރު) އިޤްރާރު ފުރިހަމަކޮށް ހުށަހެޅުމަށް ސަމާލުކަންދިނުމަށް އެދިފައިވެއެވެ.

ހައުސިންގް މިނިސްޓްރީއިން އިތުރަށް ބުނެފައިވަނީ، ކަނޑައެޅިފައިވާ އަދަދަށްވުރެ ގުޅީފަޅަށް ގޯތި ބަދަލުކުރުމަށް އެދި ހުށަހަޅާ ފަރާތްތައް ގިނަ ވާނަމަ ގޯތި ބަދަލުކުރާނީ ގުރުނަގައިގެން ކަމަށެވެ. އަދި ގުރުލާންޖެހޭނަމަ އެ ތާރީހެއް ފަހުން އިއުލާނުކުރާނެކަމަށްވެސް އެ ވުޒާރާއިން މައުލޫމާތުދީފައިވެއެވެ.