އީރާނުން އިސްރާއީލަށް ދިން ޑްރޯން އާއި ރޮކެޓް ހަމަލާގައި ސައުދީ އަރަބިއާގެ ބައިވެރިވުން އޮތް ކަމަށް ބުނާ ވާހަކަތައް އެ ގައުމުން ދޮގުކޮށްފިއެވެ.
މިވާހަކަތައް ސައުދީ އަރަބިއާއިން ދޮގު ކޮށްފައިމިވަނީ އިސްރާއީލަށް އަމާޒުކޮށްގެން އީރާނުން ދިން ހަމަލާތައް ހުއްޓުވުމުގައި އަދި މި ހަމަލާ އާއި ގުޅޭގޮތުން ޖާސޫސީ މައުލޫމާތު އިސްރާއީލަށް ފޯރުކޮށްދިނުމުގައި ބައިވެރިވުން އޮތް ކަމަށް އިސްރާއީލު މީޑިއާތަކުން ސައުދީގެ ރަސްމީ ވެބްސައިޓަކާއި ހަވާލާދީ ނެރުނު ހަބަރުތަކަކާއި ގުޅިގެންނެވެ.
މިގޮތުން ސައުދީގެ ސަރުކާރާއި ހަވާލާދީ، މަސްދަރުތަކުން ބުނީ ސްރާއީލަށް ދޭ ހަމަލާތައް ހުއްޓުވުމުގައި ސައުދީ ބައިވެރިވުމާ ބެހޭ ގޮތުން ބަޔާނެއް ޝާއިއުކުރި ރަސްމީ ވެބްސައިޓެއް ނެތް ކަމަށެވެ.
ސައުދީ އިން މިފަދައިން ބުނެފައިވާއިރު، އީރާނުން އިސްރާއީލަށް އަމާޒުކޮށް ދިން މި ހަމަލާ ހުއްޓުވުމުގައި އެހީތެރިވިކަމުގެ ތުހުމަތުތައް އުރުދުން އަށް އަންނަނީ ކުރަމުންނެވެ. މިކަމާއި ގުޅިގެން އުރުދުން އިން ބުނީ އެމީހުން ވައްޓާލާފައިވާ މިސައިލްތަކާއި ޑްރޯން ތަކަކީ އެގައުމުގެ ވައިގެ ސަރަހައްދަށް ވަދެފައިވާ ތަކެތި ކަމަށެވެ.
އީރާނުން އިސްރާއީލަށް ހަމަލާދީފައިވަނީ މިދިޔަ ހަފްތާގައި ސީރިއާގައި ހުންނަ އީރާނުގެ އެމްބަސީ ކޮމްޕްލެކްސްއަކަށް އިސްރާއީލުން ދިން ހަމަލާގެ ބަދަލު ހިފާނެ ކަމަށް ބުނެ ދެމުން ދިޔަ އިންޒާރުތަކަށް ފަހުއެވެ.
މިސައިލާއި ޑްރޯން ހިމެނޭ ގޮތަށް 200 އަށް ވުރެ ގިނަ ހަމަލާ އީރާނުން އިސްރާއީލަށް ފޮނުވާލިއިރު، އިސްރާއިލުގެ އަޔަން ޑޯމް އާއި ފައިޓަރ ޖެޓް ބޭނުންކޮށްގެން ބައެއް ހަމަލާތައް މަތަ ކުރި ނަމަވެސް އިސްރާއީލުގެ ބައެއް އަވަށްތަކަށް ޑްރޯންތަކުގެ ހަމަލާތައް ވަނީ އަމާޒުވެފައެވެ.
މި ހަމަލާގެ ބަދަލު ހިފާނެ ކަމަށް އިސްރާއީލުން ބުނެފައިވާއިރު، އިސްރާއީލުގެ މި އަމަލުގައި އެމެރިކާއިން ބައިވެރިނުވާނެ ކަމަށް އެގައުމުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
