ޔުއެފާ ޗެމްޕިއަންސްލީގު ކުއާޓާ ފައިނަލް ދެވަނަ ލެގުގައި މާދަމާ ރޭ އަމިއްލަ ދަނޑުގައި ރެއާލް މެޑްރިޑާއި ދެކޮޅަށް އެންމެ ފަހުގެ ޗެމްޕިއަން މެންޗެސްޓާ ސިޓީ ނުކުންނައިރު، ރެއާލް މެޑްރިޑާއި މެދު ޖެހިލުން ނުވާކަމަށް ސިޓީގެ ޑިފެންޑަރު ގްއާޑިއޯލް ބުނެފިއެވެ.

މިދިޔަ ހަފްތާގެ އަންގާރަ ދުވަހުގެ ރޭ ރެއާލްގެ ދަނޑުގައި ކުޅެވުނު ކުއާޓާ ފައިނަލު ފުރަތަަމަ ލެގުގެ މެޗު 3-3 ގެ ނަތީޖާއަކުން ދެޓީމް އެއްވަރުވެފައި ވާއިރު އެމެޗުގައި ސިޓީގެ ތިންވަނަ ގޯލު ކާމިޔާބުކޮށްދިނީ މިސީޒަންގައި ޖަރުމަނުގެ އާރުބީ ލެޕްޒިގް އިން އެޓީމާއި ގުޅުނު އުމުރުން 22 އަހަރުގެ ކްރޮއޭޝިޔާގެ ޑިފެންޑަރު ޖޮސްކޯ ގްއާޑިއޯލް އެވެ.

މާދަމާ ރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަދައްކަމުން ސިޓީގެ ޑިފެންޑަރު ބުނީ ރެއާލް މެޑްރިޑަކީ ޔޫރަޕުގެ ކިންގް ކަމަށާއި ނަމަވެސް އެޓީމާއި މެދު އެއްވެސް ވަރަކަށް ޖެހިލުން ނުވާކަމަށެވެ. "ޖެހިލުން ވާނަމަ ޓީވީ އިން މެޗު ބަލާނީ، އަހަރެމެން ބޭނުންވަނީ ތަށި ދިފާއުކުރަން.. އެކަން ކުރެވޭނީ ރެއާލް މެޑްރިޑް ބަލިކޮށްގެންނެވެ.

މިދިޔަ އަހަރުގެ މުބާރާތުގެ ސެމީފައިނަލްގައި މިދެޓީމު ވާދަކޮށްފައި ވާއިރު، 5-2 ގެ އެގްރިގޭޓް ނަތީޖާއަކުން މޮޅުވެ ފައިނަލުން ޖާގަ ހޯދީ މެންޗެސްޓާ ސިޓީ އެވެ. އަދި އެފަހަރު ވެސް ފުރަތަަމަ ލެގު ރެއާލްގެ ދަނޑުގައި ކުޅުނުއިރު، އެމެޗު ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ. ނަމަވެސް ދެވަނަ ލެގުގައި ސިޓީގެ ދަނޑުގައި އެޓީމުން ވަނީ ފަސޭހަކަމާ އެކު 4-0 ގެ ތަފާތުބޮޑު ނަތީޖާއަކުން މޮޅުވެފައެވެ.

މިދެޓީމު މީގެ ކުރިން 11 ފަހަރެއްގެ މަތިން ވާދަކޮށްފައި ވާއިރު، އޭގެތެރެއިން ހަތަރު މެޗުން މެންޗެސްޓާ ސިޓީ ވަނީ މޮޅުވެފައެވެ. އަދި ރެއާލް މެޑްރިޑް ތިން މެޗުން މޮޅުވިއިރު އަނެއް ހަތަރު މެޗު ނިމިފައިވަނީ ދެޓީމް އެއްވަރުވެގެންނެވެ. މީގެ އިތުރުން ސިޓީގެ ދަނޑުގައި މިދެޓީމު ފަސް މެޗު ކުޅެފައިވާއިރު އޭގެތެރެއިން ތިން މެޗުން ސިޓީ މޮޅުވިއިރު އަނެއް ދެމެޗު ނިމިފައި ވަނީ އެއްވަރުވެގެންނެވެ.