އެންމެ ކުޑައިރުންފެށިގެން ނޫސްވެރިކަމުގައި މަސައްކަތް ކުރުމަކީ ހދ. ވައިކަރަދޫއަށް އުފަން ހުސައިން ޘަޤީފުގެ ހުވަފެނެކެވެ. ކުޑައިރުންފެށިގެން ބައްޕަގެ ފޮތް އަލަމާރީގެ އަވާގައި ޖެހި ފޮތް ކިޔަން ޝައުގުވެރިކަން ހުންނަ ޘަޤީފު ނޫސްވެރިކަމަށް ޝައުގުވެރިކަން އުފެދުނީ އެހިސާބުންނެވެ.

މަދަރުސާ ދައުރުވެސް ނޫސްވެރިކަމަށް ޝައުގުވެރިވެގެން ހދ އަތޮޅު މަދަރުސާގައި ނެރޭ ފާރު ނޫސްތަކަށްވެސް ޘަޤީފު ދިޔައީ ލިޔަމުންނެވެ. ނޫސްވެރިކަން އިންޓަނެޓަނަށް ބަދަލު ވުމާއި އެކު އޭރު މަދު ވެބްސައިޓްތަކެއް ދިވެހިން ލިޔެ ނޫސްވެރިކަމަށް ހުޅުވާލިއެވެ.

އޭގެ ތެރެއިން ރަށެއްގެ ނަމުގައި އެންމެ ފުރަތަމަ ގިނަ ބަޔެއްގެ ސަމާލުކަން އައީ "ވައިކަރަދޫ ލައިވް" އަށެވެ. އޭރު ޘަޤީފު އުޅުނީ ރަށުގައިނަމަވެސް އެ އޮންލައިން ނޫހަށް ލިޔުމުގެ ޝައުގުވެރިވެ އެނޫހަށް ލިޔަންފެށިއެވެ. އަދި އެނޫހުގައި ލިޔާ ލިޔުންތައް އިންޓަނެޓް ނުލިބޭ މީހުންނަށް ފޯރުކޮށްދޭން ފާރު ނޫހެއްގެ ގޮތުގައި "ވައިކަރަދޫލައިވް"ގެ ފާރު ނޫސް ޕްރިންޓްކޮށް ހަރުކުރުމުގެ ޒިންމާ އަމިއްލައަށް އުފުލަންފެށީ ނޫސްވެރިކަމަށް ހުރި ލޯތްބެއްގެ ބޮޑުކަމުންނެވެ.

"ވައިކަރަދޫލައިވް އަކީ އަޅުގަނޑަށް ލިބުނު ވަރަށް ބޮޑު ފުރުސަތެއް ނޫސްވެރިކަމަށް ނުކުތުމަށް، އޭރު ވައިކަރަދޫލައިވްގެ ފަރާތުން ވާނެ ފުރަތަމަ ރަށު ކައުންސިލްގެ އިންތިހާބަށް ވާދަ ކުރި ފަރާތްތަކުގެ އިންޓަވިއު ފޯނުން ނަގާ ވާނީ ގެނެސްދީފައި. މިހާރުވެސް 13 އަހަރު ކުރީގެ އެއިންޓަވިއުތައް ފެންނާނެ ޔޫޓިއުބުން." ޘަޤީފު ވިދާޅުވިއެވެ.

ވައިކަރަދޫލައިވްއަށް ފަހު ޘަޤީފުގެ ނޫސްވެރިކަމުގެ އިސް ދައުރެއް ފެނިގެން ދިޔައީ އުފަން ރަށުގެ ޚަބަރާއި މައުލޫމާތު ގެނެސްދިނުމަށް އުފެއްދި އޮންލައިން ނޫހެއް ކަމުގައިވާ "ބީ15.އެމްވީ" އިންނެވެ. ރަށު އަދި އަތޮޅު ފެންވަރުގައި ފާހަގަކުރެވުނު މިއޮންލައިން ނޫހުގައި ލިޔަމުން ޘަޤީފް ވަނީ ބައެއް މަޖައްލާތަކަށްވެސް ލިޔުއްވާފައެވެ. އެގޮތުން ސަންދާނު މަޖައްލާގެ އިތުރުން ދިއިސްލާމް މަޖައްލާގައިވެސް އިންފޮމޭޝާން ޓެކްނޮލޮޖީގެ ދާއިރާއިން ލިޔުންތައް ލިޔެފައިވެއެވެ.

ނޫސްވެރިކަމުގެ އިތުރުން ޘަޤީފު އެންމެ ބޮޑަށް ފާހަގަވެގެން ދިޔައީ ތިލަދުންމަތީގެ އަޑު ރާއްޖޭގެ ކަންކޮޅުތަކުގައި ފެތުރުމަށް މަސައްކަތް ކުރެއްވި ތަނެވެ. އެގޮތުން ސިޔާސީ ގޮތުންނާއި އިޖްތިމާޢީ އަދި ތާރީހީ ގޮތުން ތިލަދުންމަތީގެ އަޑު ފެތުރުމުގައި ވަރަށް އިސްކަމެއް ދީފައިވެއެވެ. ސޯޝާލް މީޑިއާތަކުގައި ތިލަދުންމަތީގެ ވާހަކަތައް ހަމައެކަނި ނުދައްކާ ޘަޤީފު ވަނީ "ތިލަދުން" ނަމުގައި ނޫހެއް ރަޖިސްޓްރީކޮށްފައެވެ.

ނޫހުގެ ފައުންޑަރެއްގެ ގޮތުގައި އަދި އިސް ނޫސްވެރިއެއްގެ ގޮތުގައި ޘަޤީފުވަނީ ރާއްޖޭގެ ނޫސްވެރިކަމުގެ އުދަރެހަށް "ތިލަދުން"ގެ ނަން މަޝްހޫރުކޮށްދީފައެވެ. ސަރަހައްދީ މުހިންމު ނޫހެއްގެ ގޮތުގައި ގިނަ ބަޔަކު "ތިލަދުން" ބަލައިގެންފައިވާއިރު މިހާރު ތިލަދުންގެ ފަރާތުން ދަނީ ދިވެހި ބަހުގެ އިތުރުން "ތިލަދުން ޓައިމްސް"ގެ ނަމުގައި އިނގިރޭސި ބަހުންވެސް ތިލަދުންމަތީ އަޑު އުފުލަމުންނެވެ.

"ތިލަދުން" ވޫޖޫދުވެ ވައިގައި ހިފުމުން ޘަޤީފު ދެން ނުކުތީ ޤައުމީ ލެވެލްގައި ނޫސްވެރިކަމުގެ ދާއިރާއަށް ޚިދުމަތް ކުރާށެވެ. އެގޮތުން މޯލްޑިވްސް މީޑިއާ ކައުންސިލްގެ ހަ ވަނަ ދައުރުގެ އިންތިހާބުގައި ވާދަކޮށް ގިނަ އަދަދެއްގެ ވޯޓާއި އެކު އިންތިހާބު ކާމިޔާބު ކުރިއެވެ. 187 މީޑިއާއަކުން ވޯޓުލާފައިވާ މިއިންތިހާބުގައި ޘަޤީފަށް ހޮވުނީ މީޑިއާއިން އިންތިހާބުކުރާ އަށް މެމްބަރުންގެ ތެރޭގައެވެ. އަދި މޯލްޑިވްސް މީޑިއާ ކައުންސިލްގެ ނައިބު ރައީސްކަމަށް ކުރިމަތިލާ 15 މެމްބަރުންގެ ތެރެއިން 14 ވޯޓާއި އެކު މޯލްޑިވްސް މީޑިއާ ކައުންސިލްގެ ނައިބު ރައީސްކަމަށް އިންތިހާބު ކުރެވުނެވެ. 2 އަހަރުގެ ޓާމެއް މީޑިއާ ކައުންސިލްގައި ޘަޤީފް ވަނީ ފުރިހަމަކޮށްފައެވެ.

ރައްޔިތުންގެ މަޖިލީހަށް ޘަޤީފް ކުރިމަތިލަނީ ވައިކަރަދޫ ދާއިރާއަށެވެ. ހދ އަތޮޅުގެ ކައުންސިލްގެ ރައީސްކަންވެސް ކުރައްވާފައިވާ ޘަޤީފް ކުރިމަތިލަނީ ޢަދާލަތު ޕާޓީގެ ޓިކެޓްގައެވެ. މީޑިއާއަށް ފަރިތަ ޘަޤީފު މަޖިލީހަށް ނުކުންނައިރު ދެއްވާ ޔަގީންކަމަކީ ރައްޔިތުންގެ ހުރި ކަންބޮޑުވުންތައް މަޖިލީހުގެ ތެރެއިން އިއްވާނެކަމުގެ ޔަގީންކަމެވެ.

މަޖިލީހުގެ ތެރެއިން ކަށަވަރު ކުރަން ޡަޤީފް ބޭނުންވަނީ ދާއިރާގެ އިތުރުން މުޅި ތިލަދުންމަތީގެ ހައްޤު މިންވަރެވެ. މީގެ 5 އަހަރު ކުރިން ތިލަދުންމަތީގެ ފިކުރުން ފެށި ފޯރިގަދަ ކެމްޕޭން ދިގު ދެމިގެންގޮސް މީޑިއާ މެދުވެރިކޮށް އެފިކުރު ފެތުރުމުގައި ދެމިހުރި ގޮތަށް ޘަޤީފް އެދެނީ އެފުރުސަތު މިފަހަރު މަޖިލީހަށް އިންތިހާބުވެގެން ލިބިގެން ދިޔުމެވެ، މީޑިއާގައި "ތިލަދުންމަތީ"ގެ އަޑު އުފުލިގޮތަށް އެފުރުސަތު ޘަޤީފުއަށް މިފަހަރު ދިނުމަށެވެ.