ހައްދުފަހަނައަޅާފައިވާ އިސްރާއީލުން ޣައްޒާއަށް ދެމުންގެންދާ ލާއިންސާނީ ހަމަލާ ތަކަށް 6 ދުވަސްވެފައިވާއިރު، މި ހަމަލާތަކުގައި 6،000 މައިން ޝަހީދުވެ 19،000 ކުދިން ވަނީ ޔަތީމުވެފައިވާ ކަމަށް އދ އިން ހާމަކޮށްފިއެވެ.

އދ އިން ބުނީ، މި ހަމަލާތަކުގައި މިހާތަނަށް 10،000 އަށް ވުރެ ގިނަ އަންހެނުން ޝަހީދުވެފައވާއިރު، އޭގެ ތެރޭގައި ގާތްގަނޑަކަށް 6،000 މައިން ހިމެނޭ ކަމަށެވެ. އަދި ޣައްޒާގައި އެއް މިލިއަނަށް ވުރެ ގިނަ އަންހެނުންނަށް ކާނާ އާއި ރައްކާތެރި ފެން ނުލިބޭއިރު، ބަލިތައް ދަނީ އިންތިހާއަށް އިތުރުވަމުންނެވެ.

ފެނާއި ކާބޯތަކެތީގެ އިތުރުން، އަންހެނުންގެ ސާފުތާހިރުކަމަށް ބޭނުންވާ ތަކެތި ނުލިބޭ ކަމަށް ވެސް އދ އިން އެކުލަވާލި ރިޕޯޓްގައި ވެއެވެ.

Advertisement

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީން ޣައްޒާއަށް މެދުކެނޑުމެއްނެތި ހަމަލާ ދެމުންއަންނައިރު، މި ހަމަލާތަކާއި އެހީ ވެއްދުމަށް އަޅަމުންދާ ދަތިކުރުމުގެ ފިޔަވަޅު ތަކުގެ ސަބަބުން ބަނޑުހައިހޫނު ކަން އިންތިހާއަށް ބޮޑުވެ، މި ވޭނުގައި މިހާތަނަށް 32 މީހަކު ވަނީ ޝަހީދުވެފައެވެ. ބަނޑުހައިހޫނުކަމުގައި ޝަހީދުވި މީހުންގެ ތެރޭގައި ހިމެނޭ 28 ފަރާތަކީ ކުޑަކުދިންކަން ފާހަގަކޮށްލަން ޖެހެއެވެ.

އދ އާއި އެނޫންވެސް އިންސާނީ ހައްގުތަކަށް މަސައްކަތް ކުރާ ޖަމިއްޔާތަކާއި، ގައުމުތަކުން މި ގަތުލުއާއްމު ހުއްޓާލުމަށް އިސްރާއީލަށް ގޮވާލަމުން އައި ނަމަވެސް މިހާތަނަށް އިސްރާއީލުން މި ކަންކަމަށް އިޖާބަދީފައެއް ނުވެއެވެ. މި ގަތުލުއާއްމު ހުއްޓާލުމަށް ގޮވާލާ ގަރާރެއް ދާދި ފަހުން އދ ގެ ސަލާމަތާއި ބެހޭ މަޖިލީހުން ވެސް ފާސްކޮށްފައިވާއިރު، މި ގަރާރަށް ވެސް ޔަހޫދީން ބޯލަބާފައެއް ނުވެއެވެ.

އަނިޔާވެރިކަން ހައްދުފަހަނަ އަޅާގޮސް، އިސްރާއީލުގެ ނިރުބަވެރި ސިފައިން ދެމުންގެންދާ ހަމަލާތަކުގައި މިހާތަނަށް 33,970 ޝަހީދުވެފައިވާއިރު، 76,770 މީހަކު ވަނީ ޒަހަމްވެފައެވެ.