މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ކެނޑިނޭޅި ޔަހޫދީން ފަލަސްތީނުގެ ޣައްޒާއަށް ދެމުން އަންނަ ހަމަލާތަކުގައި ޝަހީދުވި މީހުންގެ އަދަދު 34،000 އަށް ވުރެ މައްޗަށް އަރައިފިއެވެ.

ޣައްޒާގެ ހެލްތު މިނިސްޓްރީން ބުނީ، ހައްދުފަހަނައަޅާފައިވާ ޔަހޫދީ ސިފައިން ދިން ހަމަލާތަކުގައި ފާއިތުވި 24 ގަޑިއިރު ތެރޭ އެކަނިވެސް 42 މީހަކު ޝަހީދުކޮށްލައި، 63 ޒަހަމްކޮށްލާފައިވާ ކަމަށެވެ. އެ މިނިސްޓްރީން ހާމަކުރާ ގޮތުގައި، މިހާތަނަށް 34،012 މީހުން ޝަހީދުވެފައިވާއިރު، 76,833 މީހަކު ވަނީ ޒަހަމްވެފައެވެ.

މީގެ އިތުރުންވެސް، އެ މިނިސްޓްރީން ވަނީ ބޮޑެތި ބޮން ގޮއްވާލުމާއި، މީހުން ސަލާމަތްކުރުމަށް އެހީވާ މީހުން މަދުވުމުގެ ސަބަބުން އިމާރާތްތަކާއި އެނޫންވެސް އެފަދަ ތަންތަނުގެ ދަށުގައި ނުފެނި މީހުން ތާށިވެ، ގެއްލިފައިވާކަން ފާހަގަކޮށްފައެވެ.

ހަމަލާތަކުގެ އިތުރުންވެސް، ޣައްޒާއަށް އެހީ ވެއްދުމަށް ޔަހޫދީން އަޅަމުންދާ ދަތިކުރުމުގެ ފިޔަވަޅު ތަކުގެ ސަބަބުން ބަނޑުހައިހޫނު ކަން އިންތިހާއަށް ބޮޑުވެ، މި ވޭނުގައި މިހާތަނަށް 32 މީހަކު ވަނީ ޝަހީދުވެފައެވެ. ބަނޑުހައިހޫނުކަމުގައި ޝަހީދުވި މީހުންގެ ތެރޭގައި ހިމެނޭ 28 ފަރާތަކީ ކުޑަކުދިންކަން ފާހަގަކޮށްލަން ޖެހެއެވެ.

އދ އާއި އެނޫންވެސް އިންސާނީ ހައްގުތަކަށް މަސައްކަތް ކުރާ ޖަމިއްޔާތަކާއި، ގައުމުތަކުން މި ގަތުލުއާއްމު ހުއްޓާލުމަށް އިސްރާއީލަށް ގޮވާލަމުން އައި ނަމަވެސް މިހާތަނަށް އިސްރާއީލުން މި ކަންކަމަށް އިޖާބަދީފައެއް ނުވެއެވެ. މި ގަތުލުއާއްމު ހުއްޓާލުމަށް ގޮވާލާ ގަރާރެއް ދާދި ފަހުން އދ ގެ ސަލާމަތާއި ބެހޭ މަޖިލީހުން ވެސް ފާސްކޮށްފައިވާއިރު، މި ގަރާރަށް ވެސް ޔަހޫދީން ބޯލަބާފައެއް ނުވެއެވެ.