ގައުމީ އެއާލައިން، މޯލްޑިވިއަނުން ސްރީލަންކާގެ ކޮލަމްބޯ އަށް ދަތުރުތައް ފެށުމަށް ހަމަޖެހިފައިވާ ކަމަށް އެ އެއާލައިނުން ބުނެފިއެވެ.

މޯލްޑިވިއަނުން ބުނީ، ދަތުރުތައް މި މަހު 25 ވަނަ ދުވަހު ފެށުމަށް ހަމަޖެހިފައިވާ ކަމަށާއި، ދަތުރުތައް އޮންނާނީ ކޮންމެ ހަފްތާއެއްގެ ބުރާސްފަތި އަދި ހޮނިހިރު ދުވަހު ކަމަށެވެ.

މި ދަތުރުތަކުގެ ޓިކެޓު އަގު ފެށެނީ 165 ޑޮލަރަށް ކަމަށްވާއިރު މޯލްޑިވިއަނުން ބުނީ ލަގެޖް އެލަވަންސްގެ ގޮތުގައި ޕަސެންޖަރުންނަށް 30 ކިލޯ ލިބޭނެ ކަމަށާއި، މީލް ވެސް ލިބޭނެ ކަމަށެވެ.

 މޯލްޑިވިއަންގައި ލަންކާއަށް ދަތުރުކުރާ ފަސިންޖަރުންނަށް ކޮލަމްބޯގެ ނަވަލޯކާ ހޮސްޕިޓަލުން ކޮމްޕްލިމެންޓްރީ ބެނެފިޓްސް ތައް ވެސް ލިބޭނެ ކަމަށާއި، އޭގެ ތެރޭގައި ހިލޭ މެޑިކަލް ކޮންސަލްޓޭޝަނާއި މެޑިކަލް ހިސްޓްރީ އިވެލުއޭޝަން އަދި ޑެންޓަލް ޗެކަޕް އާއި ބޮޑީމާސް އިންޑެކްސް އަދި ލޮލުގެ ފެނުން ހިލޭ ޓެސްޓުކުރެވޭނެ ކަމަށް ވެސް އެއާލައިނުން ބުނެއެވެ.

ހަމައެއާއިއެކު،  މޯލްޑިވިއަން އިން ދަތުރުކުރާ ފަސިންޖަރުންނަށް އެ ހޮސްޕިޓަލުން ލިބޭ ކޮމްޕްލިމެންޓްރީ ބެނެފިޓްސް ތެރޭގައި އޯޕީޑީ ލެބޯޓްރީ ޓެސްޓްތަކުން 15 ޕަސަންޓް ޑިސްކައުންޓާއި އެކްސް-ރޭ އިން 5 ޕަސަންޓް ޑިސްކައުންޓް ލިބޭނެ ކަމަށް ވެސް މޯލްޑިވިއަނުން ވަނީ ބުނެފައެވެ.