ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ، މޫސާ އަހުމަދު މަރާލުމުގައި ބައިވެރިވި މައްސަލައިގައި ދައުލަތުން ދައުވާ އުފުލާފައިވާ މީހުންގެ ތެރެއިން އެކަކުގެ މައްޗަށް ކުށް ސާބިތުވެ 15 އަހަރަށް ޖަލަށް ލުމަށް ކުރިމިނަލް ކޯޓުން ހުކުމްކޮށްފިއެވެ.

ސެޕްޓެމްބަރު 24، 2017 ވަނަ ދުވަހު ހިނގި މި މާރާމާރީގައި ލިބުނު ޒަހަމްތަކާއި ގުޅިގެން މޫސާ ހޮސްޕިޓަލަށް ގެނައިތާ ކުޑައިރުކޮޅެއްގެ ތެރޭގައި ވަނީ މަރުވެފަ އެވެ.

މި މައްސަލައިގައި ތޫނު އެއްޗެއް ބޭނުންކޮށްގެން ގަސްދުގައި މީހަކު މަރާލުމުގައި ބައިވެރިވުމުގެ ދައުވާ އުފުލާފައިވަނީ، ސ. ހިތަދޫ މުޑުދާސްގޭ އަލީ ހަސަންއާއި، ނ. ޅޮހީ ކަނީރުމާގެ، މުޙައްމަދު ރިޔާޟްއާއި، މ.ދިއްގަރު ދެބުދާރުގޭ އަޙްމަދު އިޖާދު މުޙައްމަދުގެ މައްޗަށެވެ. މީގެ އިތުރުން މި މައްސަލައާއި ގުޅިގެން ސ. ހިތަދޫ ގުލްބަކާގޭ މުޙައްމަދު ނާޒިޝް ނާޒިމްގެ މައްޗަށް ދައުލަތުން ވަނީ މަގްބޫލު ސަބަބެއްނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާ އަދި މީހަކަށް ނުރައްކާތެރި ހާނީއްކައެއްވާގޮތަށް ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ދައުވާވެސް ކޮށްފައެވެ.

ކުރިމިނަލް ކޯޓުން އިއްޔެ ކުރި ހުކުމުގައި ބުނެފައިވަނީ އަހުމަދު މޫސާ މަރުގެ މައްސަލައިގައި މޫސަ މަރާލުމުގައި ބައިވެރިވުމުގެ އަމަލެއް ކޮށްފައިވާކަން ދައުލަތަށް ސާބިތުކޮށްދެވިފައިވަނީ އަލީ ހަސަންގެ މައްޗަށް އެކަނި ކަމަށެވެ. އެހެނީ މޫސާއަށް ހަމަލާދިން މީހެއް ކުށުގެ އަމަލު ހިނގިތަނަށް ގެންގޮސްދިނުމާއި ފުނަ ގޯޅިން މޫސަގެ ފަހަތުން އޭނައަށް ހަމަލާދިން މީހަކާއެކު އަލީ ހަސަން ސައިކަލުގައި ގޮސްފައިވުމަކީ އެ ކުށުގައި ބައިވެރިވުމުގެ ގޮތުން ކޮށްފައިވާ އަމަލެއް ކަމަށް ސާބިތުވާ ކަމަށް ބުންޏެވެ. 

އެހެންނަމަވެސް، ކުށުގައި ބައިވެރިވުމުގެ އަމަލެއް ރިޔާޒާއި އިޖާދު ކޮށްފައިވާކަމަށް ދައުލަތަށް ސާބިތުކޮށްދެވިފައި ނުވާތީ، އެ ދެ މީހުންގެ މައްޗަށް ދައުވާ ސާބިތުނުވާ ކަމަށް ހުކުމުގައިވެއެވެ.

މި ކުށަށް ކަނޑައެޅިފައިވާ އަދަބަކީ 15 އަހަރާއި 25 އަހަރާ ދެމެދުގެ މުއްދަތަކަށް ޖަލަށް ލުން ކަމަށް ވާއިރު ދައުލަތުން ވަނީ އަލީ ހަސަނަކީ ކުށުގެ އަމަލު ހިންގުމުގައި އެންމެ އިސްކޮށް އުޅުނު ފަރާތްކަމަށްވާތީ ކަނޑައެޅޭނެ އެންމެ ބޮޑު އަދަބެއް ކަނޑައަޅައިދިނުމަށް އެދޭ ކަމަށެވެ.

ނަމަވެސް ކޯޓުން ނިންމީ އޭނާއަށް 15 އަހަރު ދުވަހުގެ ޖަލު އަދަބެއް ދިނުމަށެވެ. އޭނާ ބަންދުގައި ހުރި މުއްދަތު ހުކުމުގެ މުއްދަތުން ކެނޑުމުން އޭނާ ތަންފީޒުކުރަން ޖެހޭނީ އަށް އަހަރާއި ހަ މަހާއި އެއް ދުވަހެވެ.

އެ މައްސަލައިގައި ދައުލަތުން ތޫނު އެއްޗެއް ބޭނުންކޮށްގެން ގަސްދުގައި މީހަކު މަރާލުމުގެ ދައުވާ އދ. މާމިގިލި، ސޭޑީ ގްރޫވް، ސައްމާހު އަހުމަދު ފަތުހީގެ މައްޗަށް އުފުލިއެވެ. ނަމަވެސް މިދިޔަ ޖެނުއަރީ މަހުގެ 22ގައި ކްރިމިނަލް ކޯޓުން ނިންމީ އޭނާގެ މައްޗަށް ސާބިތުނުވާ ކަމަށެވެ.