'އެވަރެސްޓް' އަދި 'އެމްޑީއެޗް' ބްރޭންޑުގެ ހަވާދުގެ ބައެއް ބާވަތްތައް އެތެރެކުރުމާއި ބޭނުންކުރުން އަދި ވިއްކުން މަނާކޮށްފިއެވެ.

މިއަދު މޯލްޑިވްސް ފުޑް އެންޑް ޑްރަގްސް އޮތޯރިޓީން ނެރުނު ބަޔާނެއްގައިވަނީ، އިންޑިއާގެ އުފެއްދުމެއްކަމުގައިވާ 'އެވަރެސްޓް' އަދި 'އެމްޑީއެޗް' ބްރޭންޑުގެ ހަވާދުގެ ބައެއް ބާވަތްތަކުގައި 'އެތެލިން އޮކްސައިޑް' ހުރިކަމަށް ބުނެ ސިންގަޕޯރ ފުޑް އެޖެންސީ އަދި ހޮންކޮންގގެ ސެންޓަރ ފޮރ ފުޑް ސޭފްޓީން ވަނީ އެ އުފެއްދުންތައް ބޭނުން ނުކުރުމަށް އިލްތިމާސްކޮށްފައި ކަމަށެވެ. އެހެންކަމުން އެ އޮތޯރިޓީއިން ވަނީ އެ ދެ ބްރޭންޑުގެ ބާވަތްތައް ބާޒާރުން ނެގުމަށް އަންގާފައެވެ.

މި ބްރޭންޑުތަކުގެ ހަވާދުތަކަކީ ދިވެހިރާއްޖެއަށްވެސް ގިނަ އަދަދަކަށް އެތެރެކޮށް ބޭނުންކުރަމުންދާ ހަވާދުގެ ބާވަތްތަކެއް ކަމުން ދިވެހިރާއްޖެއަށް އެތެރެކުރާ މި ދެ ބްރޭންޑުގެ އުފެއްދުންތަކުގެ ހިރާސް ދެނެގަތުމުގެ މަސައްކަތް ފުޑް އެންޑް ޑްރަގް އޮތޯރިޓީން ދަނީ ކުރަމުންނެވެ.

'އެތްލިން އޮކްސައިޑް' އަކީ ދަނޑުވެރިކަމުގައި ޕެސްޓިސައިޑެއް (ދަނޑުވެރިކަމަށް ނެދެވޭއަސަރު ފޯރުކުރުވާ ދިރޭ ސޫފާސޫފި މަރާ ކެމިކަލެއް) ގެ ގޮތުގައި ބޭނުންކުރާ ބާވަތެކެވެ. ނަމަވެސް ސިއްހަތަށް ކޮށްފާނެ ނޭދެވޭ އަސަރަށްޓަކައި މި ކެމިކަލް ކާބޯތަކެތީގެ އުފެއްދުންތަކުގައި ބޭނުންނުކުރުމަށް ވަނީ އިލްތިމާޒު ކޮށްފައެވެ.

'އެތްލިންއޮކްސައިޑް' ގެ ސަބަބުން އިންސާނުންނަށް ތަފާތު ސިއްޙީ މައްސަލަތަކަށް މަގުފަހިކޮށްދއެވެ. އެގޮތުން ކެންސަރުގެ ބާވަތްތައް، ވަކިން ޚާއްސަކޮށް އުރަމަތީގެ ކެންސަރަށް މި ކެމިކަލް މަގުފަހި ކޮށްދޭއިރު، އިންސާނުންގެ ޑީއެންއޭއަށް ގެއްލުން ލިބުމުގެ އިތުރުން ސިކުނޑިއަށާއި ނާރަށްވެސް މި ކެމިކަލްގެ ސަބަބުން ގެއްލުން ލިބެއެވެ.