މަސްތުވާތަކެތި ޓްރެފިކްކުރި ކަމުގެ ކުށް ސާބިތުވި މީހަކު 50,000 ރުފިޔާއިން ޖޫރިމަނާކޮށް, 11 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.

ކްރިމިނަލް ކޯޓުން މިހުކުމް އިއްވާފައިވަނީ ކ. މާލެ، ހ. ހުދުހުދާ މަންޒިލް، މުހައްމަދު ފައިސަލްގެ މައްޗަށެވެ.

އެގޮތުން ކްރިމިނަލް ކޯޓުން ކުރި ހުކުމުގައި ބުނެފައިވާ ގޮތުން، ފައިސަލް އިތުރު ބަޔަކާއި ބައިވެރިވެގެން މަސްތުވާ ތަކެތީގެ ވިޔަފާރި ކުރާކަމުގެ މައުލުމާތު ލިބުމާއި ގުޅިގެން 2017 ވަނަ އަހަރުގެ އޭޕްރިލް މަހުގެ 15 ވަނަ ދުވަހު ބަންގްލަދޭޝް މީހަކާއި އެކު ސައިކަލުގައި ދަނިކޮށް ހުއްޓުވައި ބަލާ ފާސްކުރަނިކޮށް، ކޮތަޅެއްގެ ތެރޭގައި އޮތް ސިލިކޮން ފުޅިއެއްގެ ފޫ ނައްޓާފައި ބެލި އިރު، އެ ފުޅި ތެރެއިން ފެނުނު ޖޫސްޕެޓީ ކޮތަޅެއްގެ ތެރެއިން ފެނުނު ރަބަރު ޕެކެޓެއްގެ ތެރެއިން  ބަރުދަނުގައި 49.1683 ގުރާމް މޯފިން ހުރި 100 ރަބަރު ޕެކެޓު ވަނީ ފެނިފައެވެ.

ހަމައެއާއެކު، ކޯޓު އަމުރެއްގެ ދަށުން މ.ފޭވަރިޓްހިލްގެ 3 ވަނަ ފަންގިފިލާގައި  ފައިސަލް ދިރިއުޅެމުން ދިޔަ އެޕާޓްމެންޓް ބަލާ ފާސްކުރުމުގެ ތެރޭގައި، ބަދިގޭގައި ހުރި އުނދުނުގެ އިސްކޫރުތައް ނައްޓައިގެން ބަލަނިކޮށް، އުނދުނުގެ ވާތްފަރާތުން ބަރުދަނުގައި 955.0204 ގްރާމް މޯފިން ހުރި 19 ޖޫސްޕެޓީ ކޮތަޅު ފެނިފައިވާ ކަމަށާއި، އުނދުނުގެ ކަނާތްފަރާތުން ފެނުނު 7 ޖޫސްޕެޓީ ކޮތަޅުގެ ތެރެއިން 5 ކޮތަޅުގައި ހުރި މޯފިން ގެ ބަރުދަނުގައި 247.8570 ގްރާމް ހުރި ކަމަށާއި، ދެން އޮތް 2 ކޮތަޅުގައި ހުރި މޯފިން ގައި 35.4324 ގްރާމް މޯފިން ހުރި ކަމަށް ކޯޓުގެ ހުކުމުގައި ވަނީ ބުނެފައެވެ.

މި ތަކެތީގެ އިތުރުން ވެސް އޭނާގެ އެޕާޓްމެންޓް ބަލާފާސްކުރަނިކޮށް މަސްތުވާތަކެތި ހޭކިފައިހުރި ޖޫސްޕެޓީ ކޮތަޅު ތަކަކާއި ހުސް ޖޫސްޕެޓީ ކޮތަޅު ބޮނޑިއަކާއި، ހުސް ރަބަރު ޕެކެޓް ބޮނޑި އެއްގެ އިތުރުން ޑިޖިޓަލް ކައްޓާ ފެނުމާއި ގުޅިގެން ފައިސަލް އާއި ސުވާލު ކުރުމުން އެއީ އޭނާ މަސްތުވާތަކެތީގެ ވިޔަފާރި ކުރަން ގެންގުޅޭ ތަކެތި ކަމަށް ބުނެފައިވާ ކަމަށާއި، މިކަމާއި ގުޅުން ހުރި ތަކެތި ކޮޓަރިން ފެނިފައިވާތީ އެކަމާއި ގުޅޭ ގޮތުން ސުވާލު ކުރުމުން އެއީ އޭނާ މަސްތުވާ ތަކެތި ބަންދު ކުރުމަށް ގެންގުޅޭ ތަކެތި ކަމަށް ސާބިތުކޮށްދިނުމަށް ބުނެފައިވާ ކަމަށް ދައުލަތުގެ ފަރާތުން ހުށައެޅި ހެކީގައި ބުނެފައިވެއެވެ.

ދައުވާތަކަށް ފައިސަލް އިންކާރުކުރި ނަމަވެސް ކްރިމިނަލް ކޯޓުން ވަނީ އޭނާގެ މައްޗަށް ކުށް ސާބިތުވާކަމަށް ކަނޑައަޅައި، މަސްތުވާތަކެތި ޓްރެފިކް ކުރި ކަމުގެ ކުށް ޝައްކެތް ނެތް މިންވަރަށް ދައުލަތުން ސާބިތުކޮށްދީފައިވާކަމަށް ކަނޑައަޅާފައެވެ.

އެއާއިއެކު، ކޯޓުން ވަނީ ފައިސަލް ގެ މައްޗަށް 11 އަހަރާއި 6 މަހާއި 1 ދުވަހުގެ ޖަލު ހުކުމެއް އިއްވާ، 50،000 ރުފިޔާއިން ޖޫރިމަނާ ކޮށްފައެވެ. ޖޫރިމަނާގެ ފައިސާ 1 އަހަރުގެ ތެރޭގައި ދެއްކުމަށް ކޯޓުން ހުކުމް ކުރި އިރު، މީގެ ކުރިން ފައިސަލް ޖަލުގައި 5 އަހަރާއި 6 މަހާއި 1 ދުވަސް ހޭދަކޮށްފައިވާތީ، އޭނާގެ ބަންދުގެ މުއްދަތަކީ 6 އަހަރު ކަމަށް ވެސް ކްރިމިނަލް ކޯޓުން ކުރި ހުކުމުގައި ވަނީ ބުނެފައެވެ.