ރާއްޖޭގެ އޮތް އެންމެ ބޮޑު ޕާޓީ އަދި އިދިކޮޅު މައި ޕާޓީއަށް 2023 ވަނަ އަހަރުގެ ރިޔާސީ އިންތިޚާބާއި މިއަހަރުގެ މަޖިލިސް އިންތިޚާބުވެސް ނާކާމިޔާބު ވި ނަމަވެސް، ޕާޓީ ހިންގެވުމުގެ ޒިންމާ އޮތް، އެ ޕާޓީގެ ޗެއާޕާސަންގެ މަގާމުން އިސްތިއުފާ ދެއްވުމުގެ ވިސްނުމެއް އަދި ނެތް ކަމަށް މަގާމުގައި ހުންނެވި ކުރީގެ އިކޮނަމިކް މިނިސްޓަރު ފައްޔާޟު އިސްމާއީލް ވިދާޅުވެއްޖެއެވެ. 

ފައްޔާޟުގެ ޗެއަރޕާސަން ކަމުގައި ބޭއްވުނު އެންމެ ބޮޑު ދެ އިންތިޚާބުންވެސް އެމްޑީޕީ ވަނީ ބޮޑުތަނުން ބަލިވެފައެވެ. އެގޮތުން ރިޔާސީ އިންތިޚާބުގެ ފުރަތަމަ ބުރުގައި 40 އިންސައްތަ ވޯޓުވެސް އެ ޕާޓީގެ ކެންޑިޑޭޓް އަދި ކުރީގެ ރައީސް ޞާލިހަށް ނުލިބުނު އިރު، ދެވަނަ ބުރުގައިވެސް ކުރިމަތިވީ ނާކާމީޔާބީއާއެވެ. 

އެއަށް މިދިޔަ މާރިޗު 21 ގައި ބޭއްވުނު މަޖިލިސް އިންތިޚާބުގައިވެސް އެ ޕާޓީއަށް ލިބުނީ އެންމެ 12 ގޮނޑިއެވެ.

Advertisement

އެއާއެކު، އެޕާޓީގެ ގިނަ މެންބަރުންތަކެއް ވަނީ ޗެއަރޕާސަންގެ މަގާމުން އިސްތިއުފާ ދެއްވުމަށް ފައްޔާޟުއަށް ގޮވާލާފައެވެ. 

އެކަމާއި ގުޅިގެން، އެމްޑީޕީން ރޭ ބޭއްވި އެ ޕާޓީގެ ގައުމީ މަޖިލީޙުގެ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއެއް ކުރި ސުވާލަށް ޖަވާބު ދެއްވަމުން ފައްޔާޟު ވިދާޅުވީ، ލީޑަރޝިޕްގައި ތިބި އެއްވެސް ބަޔަކު އިސްތިއުފާ ދިނުމުގެ ވިސްނުމެއް ނެތް ކަމަށެވެ. 

މިއާއެކު ފައްޔާޟު ވިދާޅުވީ ކުރިއަށް އޮތް މުސްތަގުބަލުގައި މެމްބަރުންނަށް ލީޑާޝިޕް ބަދަލުކުރަން ޖެހޭ ކަމަށް ފެންނަ ނަމަ އެ ފުރުސަތު ވެސް ދެއްވާނެ ކަމަށާ އެހެން ނަމަވެސް އެވަތު އަދި ނުޖެހޭ ކަމަށެވެ. 

މީގެ އިތުރުން ފައްޔާޒު ވިދާޅުވީ މިވަގުތަކީ އެންމެން އެއްވެ ޕާޓީ ކޮޅަށް ޖަހަންވީ ވަގުތު ކަމަށާ، އެމްޑީޕީ މިގައުމުގައި އޮތުމަކީ ރައްޔިތުންނަށް މުހިންމު ކަމެއް ކަމަށެވެ. އެހެން ކަމުން އެކަމަށް އުނިވާނެ އެއްވެސް ކަމެއް ނުކުރައްވާނެ ކަމަށް އޭނާ ވިދާޅުވިއެވެ. 

ފައްޔާޒު ވިދާޅުވިގޮތުގައި ލީޑރޝިޕްގެ އިސްތިއުފާއަށް ގޮވަނީ އިދިކޮޅު މެންބަރުންނެވެ. 

އެމްޑީޕީގެ އަސާސީ ގަވާއިދުގައިވާ ގޮތުން ޕާޓީ ހިންގުމުގެ އެންމެ އިސް ދައުރެއް އޮންނަނީ ޗެއާޕާސަން އަށެވެ.