އެންމެ ވޯޓެއްގެ ސަބަބުން ފަލަސްތީނަށް އިންސާފު ލިބުން ހުއްޓުވުމަކީ ލަދުވެތި ކަމެއް ކަމަށް ބުނެ އދ. ގެ ސަލާމަތީ މަޖިލީހުގައި ވީޓޯ ކުރުމުގެ ބާރު އުވާލަން ރާއްޖޭން ގޮވާލައިފި އެވެ.

ރާއްޖޭން މިހެން ގޮވާލީ، ފަލަސްތީން އދ ގެ މެންބަރެއްގެ ގޮތުގައި ހެދުމަށް ނެގުނު ވޯޓު، އެންމެ ގައުމެއްގެ ވީޓޯ ވޯޓުގެ ސަބަބުން ހުއްޓުވުމާއި ގުޅިގެން، އެކަމާމެދު ބަހުސް ކުރުމަށް ބޭއްވުނު އދ. ގެ އާންމު މަޖިލީހުގެ 78 ވަނަ ބައްދަލުވުމުގައެވެ. 

މި ބައްދަލުވުމުގައި ރާއްޖޭގެ ފަރާތުން ވަކާލާތު ކުރެއްވީ ހައުސިން މިނިސްޓަރު ޑރ. އަލީ ހައިދަރެވެ.

Advertisement

ހައިދަރުގެ ބަޔާނުގައި ވިދާޅުވީ އދ. ގެ ސަލާމަތީ މަޖިލީހުން ފަލަސްތީނުގައި ހައްގުގައި ފިޔަވަޅު އެޅުން އެންމެ ގައުމެއްގެ ވޯޓުން ހުއްޓުވޭނެ މަގު އޮތުމަކީ ލަދުވެތިކަމެއް ކަމަށެވެ.

މިއާއެކު ހައިދަރު ވިދާޅުވީ، އދ ގެ އާއްމު މަޖިލީހުގެ ޖަލްސާގައި ވާހަކަ ދެއްކެވެމުން ދިޔަ އެވަގުތުވެސް ފަލަސްތީނުގައި ގަތުލް އާއްމު ހިންގަމުންދާ ކަމަށެވެ. ފަލަސްތީނުގައި މީގެ ކުރިންވެސް ިއސްރާއިލް ހިންގާފައިވާ އަނިޔާވެރި  ޖަރިމާތައް މިހާރުވެސް ތަކުރާރުވަމުންދާކަމަށާ، އިމާރާތް ތަކުގެ ދަށުން ފަލަސްތީނުގެ ކުދި ބޮޑު ރައްޔިތުންގެ ފުރާނަނެތް ހަށިތައް ނަގައި މިހާރުވެސް   ވަޅުލަންޖެހުފައިވާ ކަމަށް ހައިދަރު ވިދާޅުވިއެވެ. އަދި އެކަން ކަމަކީ އަޅާނުލައި ދޫކޮށްލެވޭނެ ކަން ކަމެއް ނޫން ކަމަށްވެސް ވަޒީރު ވިދާޅުވިއެވެ. 

މިއާއެކު ސަލާމަތީ މަޖިލީހަށް ވެސް އެކަން އަޅާނުލައި ދޫކޮށް ނުލެވޭނެކަން ފާހަގަކުރައްވައި، ހައުދަރު ވިދާޅުވީ ސަލާމަތީ މަޖިލީހުން ފިޔަވަޅު އެޅުމަށް ނުކުޅެދުމުގެ ސަބަބުން، އިޒްރޭލުގެ ޖަރީމާތައް އާދައިގެ ކަމަކަށް ވެފައިވާކަމަށެވެ.

މީގެ އިތުރުންވެސް ހައިދަރު ވަނީ ގަތުލް އާއްމު ހުއްޓާލާ ނުހައްގުން ފޭރިފައިވާ ބިންތައް އޭގެ ހައްގުވެރިންނަށް ދިނުމަށް ޔަހޫދީ އިސްރާއީލަށް ގޮވާލާފައެވެ. އަދި ފަލަސްތީން މިނިވަން ދައުކަތެއްގެ ގޮތުގައި ކަނޑައަޅަންޖެހޭ ކަން ފާހަގަކުރައްވައި ޑރ ހައިދަރު ވަނީ އެކަމަށް އޮތް އެންމެ ބޮޑު ހުރަހަކީ ވީޓޯ ކަމަށް ވިދާޅުވެފައެވެ. 

މީގެ ހަ މަސް ކުރިން ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 34,568އަށް އުފުލިފައެވެ. އޭގެ ތެރޭގައި 25,000އެއްހާ އަންހެނުންނާއި މައުސޫމު ކުޑަކުދިން ހިމެނޭއިރު, ޔަހޫދީ ފައުޖުން ސުންނާފަތިކޮށް ބިމާ ހަމަކޮށްލާފައިވާ ޢިމާރާތްތަކުގެ ދަށުގައި އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމަށް ބެލެވެއެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 77,765އަށް އުފުލިފައެވެ. އދ އިން ބުނީ, ޣައްޒާގައި ހައިހޫނު ކަމާ ކުރިމަތިލާން ޖެހިފައިވާ މީހުންގެ ޢަދަދު މިލިޔަނަކަށް އުފުލިފައިވާ ކަމުގައެވެ.

މީގެ އިތުރުން ޔަހޫދީންގެ އަނިޔާވެރި އަސްކަރިއްޔާ އިން ދެމުންދާ އަނިޔާވެރި ހަމަލާތަކުގެ ސަބަބުން ޣައްޒާގެ އިޤްތިޞާދު ފުޑުފުޑުވެފައިވާ ކަމަށާއި އަދި ޣައްޒާގެ އިޤްތިޞާދަށް 33 ބިލިއަން ޑޮލަރުގެ ގެއްލުމެއް ލިބިފައިވާ ކަމަށް ޣައްޒާގެ ސަރުކާރުން ބުނެއެވެ.