ބަޔާން މިއުނިކްގެ ނެދަލޭނޑްސް ޑިފެންޑަރު މަތައިސް ޑި ލިޓް ދެކޭގޮތުގައި މިވަގުތު ދުނިޔޭގައި ހުރި އެންމެ މޮޅު ފުޓްބޯޅަ ކުޅުންތެރިއަކީ ރެއާލް މެޑްރިޑްގެ ބްރެޒިލް ފޯވާޑް ވިނީޝިއަސް ޖޫނިއަރ އެވެ.

ޗެންޕިއަންސް ލީގުގެ ސެމީ ފައިނަލް ދެވަނަ ލެގުގައި ރެއާލް މެޑްރިޑް އަތުން ބަލިވެ ބަޔާން މިއުނިކު މުބާރާތުން ކެޓި މެޗަށްފަހު ނޫސްވެރިންނާއި ވާހަކަދައްކަމުން ޑި ލިޓް ބުނީ ޝައްކެއްވެސް ނެތި މިވަގުތު ދުނިޔޭގައި ހުރި އެންމެ މޮޅު ކުޅުންތެރިއަކީ ވިނީޝިއަސް ކަމަށެވެ. 

ވިނީޝިއަސްގެ ކުޅުމަށް ތައުރީފުކުރަމުން ޑި ލިޓް ބުނީ އޭނަގެ ސްޕީޑް ބާރުވެފައި ކޮއްޓުމައި ނެއްޓުން އެހާމޮޅުކަމަށެވެ. އަދި ބޮޑެތި މެޗުތަކުގައި މިސީޒަނުގައި ރެއާލް މެޑްރިޑްގެ އެންމެ ވަރުގަދަ ހަތިޔާރަކީ ވިނީޝިއަސް އެވެ. އެގޮތުން ބަޔާން މިއުނިކާއި ދެކޮޅަށް ކުޅުނު ސެމީ ފައިނަލް ދެ ލެގުގައި ވިނީޝިއަސްގެ ފަރާތުން ތަފާތު މޮޅު ކުޅުމެއް ފެނިގެން ގޮސްފައިވާއިރު، މިދެ މެޗުގައި ވެސް މޭން އިފް ދަ މެޗުގެ މަގާމު ހޯދާފައި ވަނީ ވިނީޝިއަސް އެވެ.

Advertisement

މީގެ އިތުރުން މިއަހަރުގެ ޗެންޕިއަންސް ލީގުގައި ކުޅުނު 9 މެޗުގައި ވިނީޝިއަސް ވަނީ ފަސް ލަނޑު ކާމިޔާބުކުރުމުގެ އިތުރުން އިތުރު ފަސް ލަނޑުހެމަށް އެހީތެރިވެދީފައެވެ. އަދި މިސީޒަނުގެ ސްޕެނިޝް ސުޕަކަޕްގެ ޗެންޕިއަންކަން ރެއާލް މެޑްރިޑުން ހޯދިއިރު ވިނީޝިއަސް ވަނީ ފައިނަލުގައި ބާސެލޯނާ ކޮޅަށް ތިން ލަނޑު ކާމިޔާބުކޮށް ހެޓްރިކް ހަދާފައެވެ.

މިސީޒަނުގައި ބާކީ ހަތަރު މެޗު އޮއްވައި ރެއާލް މެޑްރިޑުން ލީގު ޗެންޕިއަންކަން ކަށަވަރުކޮށްފައިވާއިރު، ލީގުގައި ކުޅުނު 24 މެޗުގައި ވިނީޝިއަސް ވަނީ 13 ލަނޑު ކާމިޔާބުކުރުމުގެ އިތުރުން އިތުރު ފަސް ލަނޑުޖެހުމަށް އެހީތެރިވެދީފައެވެ.