ބޯކޮށް ވާރޭ ވެހި ފެންބޮޑުވުމުގެ ސަބަބުން އަފްޣާނިސްތާނުން އެތައް ބަޔަކު މަރުވެއްޖެއެވެ.

މިއަދު ޠާލިބާނުންގެ މިނިސްޓްރީ އޮފް އިންޓީރިއަރ އެފެއާޒުން ބުނީ، އަފްޣާނިސްތާނުގެ އުތުރުގައި ބޯކޮށް ވާރޭވެހި އުދައެރުމުގެ ސަބަބުން 153 މީހުން މަރުވެފައިވާ ކަމަށެވެ. އަދި ބައެއް ނޫސްތަކުން ރިޕޯޓުކުރާ ގޮތުގައި، ފެން ބޮޑުވުމުގެ ސަބަބުން މިހާ ތަނަށް މަރުވި މީހުންގެ އަދަދު ވަނީ 160 އަށް އިތުރުވެފައެވެ. އަދި 117 މީހުން ޒަޚަމްވެފައިވާކަމަށްވެސް ލޯކަލް އޮފިޝަލުން ވިދާޅުވެއެވެ.

ޠާލިބާނުގެ ޑިފެންސް މިނިސްޓްރީއިން މިއަދު ހާމަކުރެއްވި ގޮތުގައި، ވިއްސާރައިގެ ސަބަބުން ޙާލުގައި ޖެހިފައި ތިބި މީހުން ސަލާމަތް ކުރުމަށް ސިފައިން ނެރެ، ޒަޚަމްވެފައިވި 100 އަށް ވުރެ ގިނަ މީހުން އެއަރ ފޯސްގެ އެހީގައި ވަނީ އަސްކަރީ ހޮސްޕިޓަލްތަކަށް ބަދަލުކޮށްފައެވެ. 

40 މިލިއަނަށްވުރެ ގިނަ މީހުންގެ އާބާދީއެއް އޮންނަ އަފްޣާނިސްތާނުގެ 80 އިންސައްތަ މީހުން ދިރިއުޅެން ބަރޯސާވަނީ ދަނޑުވެރިކަމަށެވެ. އެހެން ކަމުން ދަނޑުބިންތަކަށް ލިބުނު ބޮޑެތި ގެއްލުންތަކުގެ ސަބަބުން އެތައް ބަޔަކަށް ވަނީ ކާބޯތަކެތީގެ ދަތިކަމާވެސް ކުރިމަތިލާން ޖެހިފައެެވެ.

މީގެ އިތުރުން، ގެދޮރާއި އަސާސީ ޚިދުމަތްތައް ފޯރުކޮށްދޭ ތަންތަނަށްވެސް ބޮޑެތި ގެއްލުންތަކެއް ލިބި އެތައް ބަޔަކު ވަނީ ޙާލުގައި ޖެހިފައެވެ.