އިލްތިމާސަކީ ޒުވާން ޢުމުރުގައި ވީހާވެސް އަވަހަކަށް ޙައްޖަށް ދިޔުންކަމަށް ޙައްޖު ކޯޕަރޭޝަނުގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.
ރޭ ޕީއެސްއެމްގެ ރާއްޖެ މިއަދު ޕްރޮގްރާމްގައި, 1445 ވަނަ އަހަރުގެ ޙައްޖުގެ ތައްޔާރީތަކާ ބެހޭގޮތުން ވާހަކަފުޅު ދައްކަވަމުުން ޝަކީލް ވިދާޅުވީ ޢުމުރުން ދުވަސްވެ ގައިބާރު ދެރަވުމުން ޙައްޖަށް ދާން މަޑުނުކޮށް، ޒުވާން ޢުމުރުގައި ވީހާވެސް އަވަހަކަށް ޙައްޖަށް ދާން ކިއު އަށް އެރުމަށް އިލްތިމާސް ކުރައްވާ ކަމަށެވެ.
އެގޮތުން، ވަރަށް ގިނަ ބޭފުޅުން، ކިއު ދިގުވީމާ، ކިއުއަށް އަރަން ފަސްޖެހޭކަން ފާަހަގަކުރައްވާ ޝަކީލް ވިދާޅުވީ، ކިއުއަށް އެރުއްވުމުން ޖާގަ ކަށަވަރު ވީ ކަމަށާއި، ކިއުއަށް ނާރާ މަޑުކުރައްވާނަމަ، ކިއު ދާނީ ދިގުވަމުން ކަމަށެވެ. އެހެންކަމުން، ކިއު ދިގުވާތީ، ކިއުއަށް ނާރާ މަޑުނުކުރެއްވުމަށް ޝަކީލް އިލްތިމާސް ކުރެއްވިއެވެ.
"އަޅުގަނޑުގެ އިލްތިމާސަކީ އަޅުގަނޑުމެންގެ މި ސޭވިންގ ސްކީމް މެދުވެރިކޮށްވިޔަސް އަދި އެހެން ގޮތަކުން ވިޔަސް ތިބޭފުޅުން ހަމަ ޙައްޖު ކިއުއަށް އަރަައިވަޑައިގަތުމަށްޓަކާ ފައިސާ ދައްކަވާށޭ."
ޙައްޖު ކޯޕަރޭޝަންގެ އެމްޑީ ޝަކީލް ވިދާޅުވިއެވެ.
މީގެ އިތުރުން، ރޭގެ ޕްރޮގްރާމުގައި ޝަކީލް ވަނީ، މި އަހަރު ދިވެހިން ޙައްޖަށް ގެންދިޔުމަށް ވެފައިވާ ތައްޔާރީތަކަށް އަލިއަޅުވާލާފައެވެ. އެގޮތުން ކުރިއާ ލައި ވަރަށް ބޮޑަށް ތައްޔާރުވެފައިވާކަމަށާއި، ކޯޓާ އިތުރުވެއްޖެ ޙާލަތެއްގައިވެސް، މީހުން ޙައްޖަށް ގެންދިޔުމުގެ އިންތިޒާމު ވަރަށް އަވަހަށް ހަމަޖައްސަން ތައްޔާރުވެވިފައިވާކަން ޝަކީލް ހާމަކުރެއްވިއެވެ.
އަދި ޙައްޖަށް ދިޔުމަށް ރައްޔިތުން ކުރައްވާ ހޭދަ ކުޑަކުރުމަކީ ރައީސް ޑރ. މުޙައްމަދު މުޢިއްޒުގެ އެދިލެއްވުމެއްކަން ފާހަގަކުރައްވާ، ޝަކީލް ވިދާޅުވީ، ޙައްޖަށް ދިޔުމުގެ ޚަރަދުތައް ކުޑަ ކުރުމަށް ގިނަ މަސައްކަތްތަކެއް ކުރައްވަމުން ދާކަމަށެވެ. އެގޮތުން ޝަރީޢަތް ހުއްދަކުރާ އެކި ވިޔަފާރިތަކަށް އިންވެސްޓުކުރަން ނިންމަވާފައިވާކަން ޝަކީލް ހާމަ ކުރެއްވިއެވެ. މީގެ ކުރިން ޝަކީލް އެކްސްގައި ކުރެއްވި ޕޯސްޓެއްގައި ވަނީ، ޙައްޖު ދަތުރު ތަކުގެ ޚަރަދު ކުޑަކުރުމަށް ރިއަލް އެސްޓޭޓަށް އިންވެސްޓު ކުރަން ނިންމަވާފައިވާކަން ހާމަކުރައްވާފައެވެ.
Advertisement
This content is created and paid for by advertisers and does not involve Voice Journalists
