ސަޢުދީ ޢަރަބިއްޔާގެ މައްކާގައި ބާއްވާ ޤުރުއާން މުބާރާތެއްގައި ބައިވެރިވުމުގެ ފުރުސަތު ހުޅުވާލައިފިއެވެ.

ކީރިތި ޤުރުއާނާބެހޭ ޤައުމީ މަރުކަޒުން ކުރި އިއުލާނެއްގައި ބުނީ ސަޢުދީ ޢަރަބިއްޔާގެ މައްކާގައި 2024 އޮގަސްޓް 9 އިން 2024 އޮގަސްޓް 21 އަށް ބޭއްވުމަށް ހަމަޖެހިފައިވާ "44 ވަނަ ސެޝަން އޮފް ކިންގް ޢަބްދުލްޢަޒީޒު އިންޓަރނޭޝަނަލް ކޮމްޕެޓިޝަން ފޮރ ދަ މެމޮރައިޒޭޝަން، ރިސައިޓޭޝަން އެންޑް އިންޓަރޕްރިޓޭޝަން އޮފް ދަ ހޮލީ ޤުރްއާން" ގައި ދިވެހި ރާއްޖެއިން 2 ބައިވެރިޔަކު ބައިވެރިކުރުމުގެ ފުރުޞަތު ލިބިފައިވާ ކަމަށެވެ.

މި މުބާރާތުގައި ހިމެނޭ ގޮފިތަކުން 2 ގޮތްޕެއްގައި ރާއްޖެއިން ބައިވެރިވާގޮތަށްވަނީ ހަމަޖެހިފައެވެ.

1- މުޅި ޤުރްއާން އެއްކޮށް ހިތުދަސް ކޮށްފައިވުމާއިއެކު ކީރިތި ޤުރްއާން ތަޖުވީދުމަގުން ކިޔެވުން.

2- ވިދިވިދިގެން (ތަރުތީބުން) 15 ފޮތް ހިތުދަސްކޮށްފައިވުމާއެކު ތަޖުވީދުމަގުން ކިޔެވުން.

1- މިމުބާރާތުގައި މީގެ ކުރީގެ އަހަރެއްގައި ބައިވެރިވެފައިވާ ފަރާތެއް ކަމުގައި ނުވުން.

2- ފިރިހެނަކު ކަމުގައިވުން.

3- ހިޖްރީގޮތުން 25 އަހަރު ފުރިފައިނުވުން.

މި މުބާރާތުގައި ބައިވެރިވުމަށް، ބައިނަލްއަޤުވާމީ ޤުރްއާން ކިޔެވުމުގެ މުބާރާތްތަކުގައި ބައިވެރިވުމަށް އެދޭ ފޯމާއެކު ވަނަވަރު، އައި.ޑީ ކާޑުގެ ކޮޕީ އަދި ޤުރްއާން ކިޔެވުމުގެ ދާއިރާއިން ލިބިފައިވާ ސަނަދުތައް / ލިޔުންތައް 2024 މެއި 21 ވާ އަންގާރަ ދުވަހުގެ 12:00ގެ ކުރިން ކީރިތި ޤުރްއާނާބެހޭ ޤައުމީ މަރުކަޒަށް ހުށަހެޅުމަށް އިއުލާނުގައި ވަނީ އެދިފައެވެ.

މި މުބާރާތުގައި ބައިވެރިކުރާނެ 2 ބައިވެރިން ހޮވާނީ މިކަމަށް އެދި ހުށަހަޅާ ފަރާތްތައް އިމްތިހާނު ކުރުމަށް ފަހު ކަމަށް ކީރިތި ޤުރުއާނާބެހޭ ޤައުމީ މަރުކަޒުގެ އިއުލާނުގައި ފާހަގަކޮށްފައިވެއެވެ.