ގދ. ފަރެސްމާތޮޑާ، ފަރެސްއަވަށް، ކޮކާ، އިބްރާހީމް އާޤިލްއަށް ތޫނު އެއްޗަކުން ހަމަލާދީ މާރާމާރީ ހިންގުމުގެ ސަބަބުން އޭނާ ނިޔާވެފައިވާ މައްސަލާގައި ދައުވާ އުފުލާފައިވާ ހއ. ދިއްދޫ ސްނޯބާޑް އިބްރާހީމް ވިޝާމްގެ މައްޗަށް ކުށް ސާބިތުނުވާ ކަމަށް މިއަދު ކްރިމިނަލް ކޯޓުން ހުކުމް ކޮށްފިއެވެ.

އާގިލްގެ ނިޔާވެފައިވަނީ، 31 އޯގަސްޓް 2018 ދުވަހުގެ 19:30 ހާއިރު މޯލްޑިވްސް މަނިޓަރީ އޮތޯރިޓީ އާއި ދިމާލުން ބޮޑުތަކުރުފާނުމަގުގައި އޭނާ ހުއްޓައި ތޫނު އެއްޗަކުން ހަމަލާދީ މާރާމާރީ ހިންގުމުގެ ސަބަބުން ލިބުނު އަނިޔާ ތަކަށް ފަރުވާ ދެމުންދަނިކޮށް ކަމަށެވެ.

މި މައްސަލާގައި ވިޝާމްގެ އިތުރުން ދެން ދައުވާ ކޮށްފައިވަނީ، ލ. ފޮނަދޫ، ހިޔާ، ޙަމްދޫން ހަމްޒަތުއާއި، ސ. ހިތަދޫ، ސްވޭހުހީނާގެ، ޢަލީ މިޖުވާދު މާލިކު އިބްރާހީމްގެ މައްޗަށެވެ. 

އެތަނުން ވިޝާމްގެ މައްޗަށް ކޮށްފައިވަނީ ތޫނު އެއްޗެއް ބޭނުންކޮށްގެން ޤާޞްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ. 

އޭނާގެ މައްޗަށް އެ ދައުވާ ކޮށްފައިވަނޫީ، ޢާޤިލުއަށް ވ. ފުލިދޫއިން މާލެއަށް އައުމަށް ލޯންޗެއް ހަމަޖައްސައިދީ، ޢާޤިލުއާއެކު ވ. ފުލިދޫއިން މާލެއަށް އައި "ސްކަލް ރައިޑަރ" ލޯންޗުގައި އިނދެ އެލޯންޗު މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) ދިމާލަށް ލަފާނެކަމުގެ މަޢުލޫމާތު މާހިރުއަށްދީ، އިބްރާހީމް ޢާޤިލު މަރާލުމަށް އެހީތެރިވެފައިވާތީ ކަމަށް ޕީޖީން ބުނެފައިވެއެވެ. 

މީގެ އިތުރުން ލ. ފޮނަދޫ ހިޔާ ޙަމްދޫން ހަމްޒަތު އާއި އަދި ޢަލީ މިޖުވާދު މާލިކު އިބްރާހީމްގެ މައްޗަށް ކޮށްފައިވަނީތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ދައުވާއެވެ. 

މި މައްސަލައިގައި ހއ. ދިއްދޫ، ސްނޯބާޑް، އިބްރާހީމް ވިޝާމްގެ މައްޗަށް ކޮށްފައިވާ ދަޢުވާ ސާބިތުނުވާކަމަށް، 15 މޭ 2024 ދުވަހު ކްރިމިނަލް ކޯޓުން ޙުކުމްކޮށްފައިވެއެވެ. އަދި ޢަލީ މިޖުވާދު މާލިކު އިބްރާހީމް، ޙަމްދޫން ހަމްޒަތުގެ ބައި ކްރިމިނަލް ކޯޓުގައި ހިނގަމުންދެއެވެ. އެ ދެމީހުންގެ ބައި އޮތީ ޙުކުމް ކުރުމުގެ މަރުޙަލާގައެވެ.