ބައެއް ޓެކްސީ އެޕްތަކުން އަމިއްލައަށް އަގު ކަނޑަައަޅާކަމަށާއި، މި މައްސަލަ ބަލާނެ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރުގެ ދެ ނައިބުން، ޢަލީ ނިޝާނާއި ޢަލީ މުޙައްމަދު ވިދާޅުވެއްޖެއެވެ.

ދައުލަތުގެ މީޑިޔާ، ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން ދަތުރުފަތުރާއި މަދަނީ އުދުހުންތަކާ ބެހޭ ވުޒާރާގެ، ނައިބު ޢަލީ މުޙައްމަދު ވިދާޅުވީ، ބައެއް ޓެކްސީ އެޕްތަކުން، އުޞޫލާ ޚިލާފު އަގުތަކެއް ނަގާކަމަށާއި، ނަމަވެސް ގިނަ ޑްރައިވަރުން ޑިމާންޑުކުރަނީ، އެޕްތަކަށް ކަމަށް ވާއިރު، ޑްރައިވަރުންގެ އެންމެ ބޮޑު ޝަކުވާ އަކީވެސް މިއީ ކަމަށެވެ.

ޕްރޮގްރާމުގައި ވާހަކަ ދައްކަވަމުން މަދަނީ އުދުހުންތަކާ ބެހޭ ވަޒީރުގެ ނައިބު ޢަލީ ނިޝާން ވިދާޅުވީ، މި މައްސަލަ ޙައްލުކުރުމަށް ޓެކްސީ އެޕްތައް ހިންގާ ފަރާތްތައް ހޯދާ، އެ ފަރާތްތަކާ ގުޅިގެން، ޓެކްސީ ކުރަނީ މިނިސްޓްރީއިން ކަނޑައަޅާފައިވާ އަގުތަކުގައިތޯ ބަލާނެ ކަމަށެވެ.

އެގޮތުން، މިނިސްޓްރީއިން މިއަދު އަލަށް ކަނޑައެޅި އަގުތަކަށް ޢަމަލުކުރަން ފެށުމަށް ކަނޑައަޅާފައިވާ ދުވަހަކީ 20 މޭ 2024 ވާ ހޯމަ ދުވަސްކަމުން، އެ ދުވަހަށްފަހު، ޓެކްސީ އެޕްތަކުން، ނަގަނީ ދަތުރުފަތުރާއި މަދަނީ އުދުހުންތަކާ ބެހޭ ވުޒާރާގެ އަގުތައްތޯ ވަރަށް ބޮޑު އިސްކަމެއް ދީގެން އެ ވުޒާރާއިން ބަލާނެ ކަމަށް ނިޝާން ވިދާޅުވިއެވެ.

މީގެ އިތުރުން ނައިބު، ނިޝާން ވިދާޅުވީ، ޓެކްސީއަކުން، ވުޒާރާއިން ކަނޑައަޅަފައިވާ އަގުތަކާ ޚިލާފަށް އަގު ނަގާނަމަ، ޝަކުވާ ހުށަހެޅުމުގެ ފުރުސަތު ޢާންމު ރައްޔިތުންނަށް މިހާރުވެސް އޮންނާނެ ކަމަށެވެ.

ރާއްޖޭގައި، ޤަވާއިދާ ޚިލާފަށް ޓެކްސީއިން އަގު ނަގާ މައްސަލައަކީ މިހާރު ވަރަށް ބޮޑުވެފައިވާ މައްސަލައެކެވެ. އެހެންކަމުން މިކަން ޙައްލުކުރުމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން އިއްޔެ މާލެ ސަރަހައްދުގައި ޓެކްސީކުރެވޭނެ އަގުތައް އަލުން ކަނޑައަޅާ ޢާންމުކޮށްފަިއވާއިރު، އެ ވުޒާރާއިން ވިދާޅުވި ގޮތުގައި ޓެކްސީ ކުރުމުގެ އަގުތަކަށް ބަދަލު ގެނައީ، ދަތުރުކުރެވޭ ސަރަހައްދާއި ޕެޓްރޯލް ޚަރަދުފަދަ ކަންކަމަށް ރިޢާޔަތްކޮށް ޓެކްސީ ޑްރައިވަރުންނާއި ޚިދުމަތް ލިބިގަންނަ ޢާންމު ފަރުދުންގެ މަސްލަހަތަށް ބުރޫނާރާނެ ފަދަ ވިސްނުމެއްގައި ކަމަށެވެ.