ރާއްޖެއާއި އިނގިރޭސިވިލާތާ ދެމެދު ވިޔަފާރީގެ ގުޅުންތައް ވަރުގަދަ ކުރުމަށް ދެ ޤައުމުގެ ވަޒީރުން މަޝްވަރާކުރައްވައިފިއެވެ.

މި މަޝްވަރާތައް ކުރައްވަފައިވަނީ، ރަސްމީ ދަތުރުފުޅެއްގައި އިނގިރޭސިވިލާތަށް ވަޑައިގެން ހުންނެވި ރާއްޖޭގެ އިކޮނޮމިކް މިނިސްޓަރު މުޙައްމަދު ސައީދު، އިނގިރޭސި ވިލާތުގެ ސްޓޭޓް މިނިސްޓަރ ގްރެގް ހޭންޑްސްއާ ބައްދަލުކުރެއްވި ބައްދަލުވުމުގައެވެ.

މިއަދު މި ބައްދަލުވުމާ ގުޅޭގޮތުން ވަޒީރު، މުޙައްމަދު ސަޢީދު އެކްސްގައި ކުރެއްވި ޕޯސްޓެއްގައި ވިދާޅުވީ، އިނގިރޭސި ވަޒީރު، ގްރެގް ހޭންޑްސްއާ ބައްދަލުވުމުން އުފާ ކުރައްވާ ކަމަށާއި، ބޭއްވި ބައްދަލުވުމުގައި، ވިޔަފާރިއާއި، އިންވެސްޓްމެންމެންޓުގެ ދާއިރާއިން، ދެ ޤައުމުގެ ގުޅުން އިތުރަށް ބަދަހި ކުރުމަށް މަޝްވަރާ ކުރެއްވި ކަމަށެވެ. 

މީގެ އިތުރުން މާލީ ޚިދުމަތުގެ ސިނާޢަތް ތަރައްގީކުރުމުގައި އިނގިރޭސިވިލާތުގެ ތަޖުރިބާ ހޯދުމާއި ފްރީ ޓްރޭޑް އެރޭންޖްމަންޓް (އެފްޓީއޭ)ގެ ދާއިރާ ފުޅާކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެންމެ އިސްކަމެއް ދެއްވާ އެއް ކަންތައް ކަމަށްވެސް ވަޒީރު ސަޢީދު ވިދާޅުވިއެވެ.

އިކޮނޮމިކް މިނިސްޓަރ، ސަޢީދު އިނގިރޭސިވިލާތަށް ކުރައްވާ މިދަތުރަކީ، ކޮމަންވެލްތް ޓްރޭޑް އެންޑް އިންވެސްޓްމަންޓް ރައުންޑް ޓޭބަލްގައި ބައިވެރިވުމަށް ކުރައްވާ ދަތުރުފުޅެކެވެ. މި ދަތުރުފުޅާ ބެހޭގޮތުން، އިކޮނޮމިކް މިނިސްޓްރީން ބުނެފައިވަނީ މި ދަތުރުގައި މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީ އާއި ޑިވެލޮޕްމަންޓް ބޭންކް ތަރައްގީ ކުރުމާ ގުޅޭގޮތުން މަޝްވަރާ ކުރައްވާނެކަމުގައެވެ.