ހަރުކަށި ޔަހޫދީންގެ ލާއިންސާނީ އަނިޔާތަކުގެ ސަބަބުން ހާލުގައި ޖެހިފައިވާ ޣައްޒާގެ ރައްޔިތުންނަށް އެހީ ފޯރުކޮށްދިނުމަށް ދިޔަ ޓްރަކެއްގައި ހުރި ތަކެތި ހަލާކުކުރާ މަންޒަރު ފެންނަ ވީޑިއޯއެއް އާއްމު ވެއްޖެއެވެ. 

އަލްޖަޒީރާއިން ބުނެފައިވާގޮތުން މިއީ އަންގާރަ ދުވަހު ހިނގާފައިވާ ހާދިސާއެކެވެ. އަދި ޓްރަކުގައި ހުރި އެހީ ތަކަށް ގެއްލުންދީފައުވަނީ ފަލަސްތީނާއި ދެކޮޅަކަށް އިހްތިޖާޖު ކުރަމުންދިޔަ ޔަހޫދީން ތަކެކެވެ.

އެގޮތުން ފަލަސްތީނަށް ގަދަކަމުން ވެރިވެގެންފައިވާ ޔަހޫދީން ތަކެއް، ވަނީ ޣައްޒާގައި ހައިހޫނުކަމާއިއެކު، އަސާސީ އެހީތަކަށް ބޭނުންވެފައި ތިބި މުސްލިމުންނަށް އެހީ ހިފައިގެންދިޔަ އެ ޓްރަކް ހުއްޓުވައި، އޭގައި ހުރި ފޮށިތައް އުކާލައި، އެއަށް ފައިން އަރައި ހަލާކުކޮށްފައެވެ. 

އެ ވީޑިއޯއަށް ކޮމެންޓް ކުރި ގިނަ ބަޔަކު ވަނީ އެއީ، އެތަކެއް އާއްމުން ވެގެން ފަލަސްތީނަށް ފޯރުކޮށްދިން އެހީ އަކަށް ވާއިރު ޔަހޫދީންގެ އެ އަމަލަކީ އެއްގޮތަކަށްވެސް ބަލައިގަނެވޭނެ އަމަލެއް ނޫން ކަމަށެވެ. 

ޚާއްސަކޮށް ފަލަސްތީނުގައި ބޭސް ފަރުވާ އާއި، ކާބޯތަކެއްޗާއި އެންމެ އަސާސީ ބޭނުންތަކަށް ޖެހިފައި ތިބި އެތައް ބަޔަކު ތިބި އިރު މިއީ އިންސާނިއްޔަތައް ވެސް ދިން ބޮޑު އަނިޔާ އެއް ކަމަށް ގިނަ ބަޔަކު ބުނެފައިވެއެވެ. 

މިދިޔަ އޮކްޓޯބަރު މަހުގެ 7 ވަނަ ދުވަހުން ފެށިގެން ނުރައްކާތެރި ހަމަލާތައް ދެމުންގެންދާ ޣައްޒާގައި ރައްކާތެރި އެއްވެސް ހިސާބެއް ނެތެވެ. އެތައް ހާސް އާއިލާތަކެއް ބިކޮށް، އެތައް ހާސް އާއިލާއެއްގެ ގެދޮރު ވަނީ ސުންނާފަތިކޮށްލާފައެވެ. 

މި ހަމަލާތަކުގައި މިހާތަނަށް 35،000 އަށްވުރެ ގިނަ މީހުން ޝަހީދުވެފައިވާއިރު 78،000 އަށްވުރެ ގިނަ މީހުންނަށް އެކިވަރުގެ ޒަހަމްތައް ވެފައިވާ ކަމަށް ފަލަސްތީނުގެ ހެލްތް މިނިސްޓްރީއާއި ހަވާލާދީ ރިޕޯޓްތަކުން ވަނީ ބުނެފައެވެ.