ދަރިވަރުން އެދުނުގޮތަށް ދުނިޔޭގެ މަޝްހޫރު އެއް ޔުނިވާސިޓީ ކަމަށްވާ ހާވާޑް ޔުނިވާސިޓީން އަނިޔާވެރި އިސްރާއީލަށް ފަންޑުކުރާ ފަރާތްތަކާއި އޮތް ގުޅުން ކަނޑާލުމަށް ނިންމައިފިއެވެ.

ޣައްޒާގައި ޔަހޫދީ ފައުޖުން ހިންގަމުން އަންނަ ގަތުލުއާއްމާއި ދެކޮޅަށް ހާވާޑް ޔުނިވާސިޓީގެ ދަރިވަރުން މުޒާހަރާ ކުރަމުން އަންނަތާ ތިން ހަފްތާ ވެފައިވާއިރު، ޔުނިވާސިޓީން މި ނިންމި ނިންމުމާއި ގުޅިގެން ދަރިވަރުން އަމިއްލަ އަށް މުޒާހަރާ ސުލްހަވެރިކަމާއި އެކު ނިންމާލިއެވެ.

ގާތްގަނޑަކަށް 50 ބިލިއަނާއި ގާތަށް އަގުކުރެވޭ ދުނިޔޭގެ އެންމެ ބޮޑު އެކަޑަމިކް އެންޑޯމެންޓް އޮންނަ ހާވާޑް ޔުނިވާސިޓީން މިފަދައިން ނިންމީ އެ ޔުނިވާސިޓީގެ ހާވަޑްގެ ވަގުތީ ރައީސް އެލަން ގާބަރ އެ ޔުނިވާސިޓީގެ ބައެއް ޕްރޮފެސަރުންނާއި ޑީން އިންނާއި އެހެނިހެން ފަރާތްތަކާއި އެކު މަޝްވަރާ ކުރުމަށްފަހުއެވެ.

Advertisement

އެގޮތުން އެ ޔުނިވާސިޓީން ނެރުނު ނޫސްބަޔާނެއްގައި ބުނީ، މި ބައްދަލުވުން ތަކަށްފަހު ދަރިވަރުން އެދެމުންދިޔަ ފަދައިން އިސްރާއީލާއި ޔަހޫދީ ފައުޖަށް މާލީ އެހީތެރިކަން ދޭ ކުންފުނިތަކާއި އެކީ ހާރްވާޑް ޔުނިވަސިޓީން ހަދާފައިވާ މާލީ ހުރިހާ އެއްބަސްވުން ތަކާއި މުއާމަލާތް ބާތިލު ކުރުމަށް ނިންމާފައިވާ ކަމަށެވެ.

މީގެ އިތުރުންވެސް ދަރިވަރުން އެދުނުފަދައިން އެ ޔުނިވާސިޓީގެ 20 ދަރިވަރުންނާއި މުއައްޒަފުންނަށް އަނބުރާ އެމީހުންގެ މަގާމުތައް ދިނުމާއި އެކު، އިތުރު 60 ފަރާތަކަށް ޑިސިޕްލިނަރީ ފިޔަވަޅު ނޭޅުމަށް ވެސް ޔުނިވާސިޓީން ވަނީ އެއްބަސްވެފައެވެ.

ހާވާޑް ޔުނިވާސިޓީގެ އިތުރުންވެސް ނަން މަޝްހޫރު ކޮލަމްބިއާ ޔުނިވާސިޓީ ހިމެނޭހެން އެމެރިކާގެ 80 ޔުނިވާސިޓީއެއްގައި ވަނީ ޣައްޒާގެ ގަތުލުއާއްމާއި ދެކޮޅަށް އަޑުއުފުލާ، މުޒާހަރާ ކޮށްފައެވެ.