އިންޑިއާގެ ގައުމީ ޓީމުގެ ކެޕްޓަން އަދި ބެންގަލޫރު އެފްސީގެ ތަޖުރިބާކާރު ފޯވާޑް ސުނިލް ޗެތުރީ ގައުމީ ޓީމަށް ކުޅުން ހުއްޓާލަން ނިންމައި އެކަން އިއުލާންކޮށްފިއެވެ.

އުމުރުން 39 އަހަރުގެ ފޯވާޑް ކުޅުން ހުއްޓާލަން ނިންމި ވާހަކަ މިއަދު އިއުލާން ކުރީ ސޯޝަލް މީޑިއާއަށް ލާފައިވާ ވީޑިއޯ މެސެޖެއްގައެވެ. އަދި ޗެތުރީ ގައުމީ ޓީމަށް ކުޅޭ އެންމެ ފަހު މެޗަކަށް ވާނީ އަންނަ ޖޫން މަހު ހަވަނަ ދުވަހު އިންޑިއާ އިން ކުވައިތާ ދެކޮޅަށް ވޯލްޑް ކަޕް ކޮލިފައިންގައި ކުޅޭ މެޗެވެ.

2005 ވަނަ އަހަރުން ފެށިގެން ގައުމީ ޓީމަށް ކުޅެމުން އަންނަ ޗެތްރީ ވަނީ ފާއިތުވެދިޔަ 19 އަހަރުގެ ތެރޭގައި އިންޑިއާ ގައުމީ ޓީމަށް 150 މެޗު ކުޅެ 94 ލަނޑު ކާމިޔާބުކޮށްދީފައެވެ. އަދި  މިވަގުތު ގައުމީ ޓީމުތަކަށް ކުޅެމުންދާ ކުޅުންތެރިންގެ ތެރެއިން ޗެތުރީއަށްވުރެ ގިނައިން ގައުމީ ޓީމަށް ގޯލު ޖަހައިދީފައި ވަނީ އެންމެ ދެ ކުޅުންތެރިންނެވެ. އެއީ މިލިސްޓުގެ އެއްވަނައިގައި އޮތް ކްރިސްޓިއާނޯ ރޮނާލްޑޯއާއި ދެވަނައިގައި އޮތް ލިއޮނަލް މެސީއެވެ. 

ޗެތުރީ މިއަދު ހިއްސާކުރި ވީޑިއޯ މެސެޖުގައި ބުނެފައި ވަނީ ގައުމީ ޓީމަށް ކުޅުނު ފުރަތަމަ މެޗާއި ގައުމީ ޓީމަށް ޖެހި ފުރަތަމަ ގޯލުވެސް އަދިވެސް، ތާޒާކޮށް ހަނދާން އެބަހުރި ކަމަށެވެ. އަދި އެ މެޗުން ފެށިގެން މިއަދާ ހަމައަށް ކުޅުނު ކޮންމެ މެޗެއްގައިވެސް ގައުމީ ޖާޒީ ރަމްޒުކުރީ ޝަރަފާއި ފަހުރާ އެކުގައި ކަމަށް ޗެތުރީ ބުންޏެވެ.

އޭނާ އިތުރަށް ބުނީ ގައުމީ ޓީމަށް ކުޅުން ހުއްޓާލުން އެއީ އޭނާއަށް ފަސޭހަ ނިންމުމެއް ނޫން ކަމަށެވެ. ގައުމުގެ ހިދުމަތަށް އަބަދުވެސް ތައްޔާރަށް ހުންނާނެ ކަމަށް ބުނަމުން ޗެތުރީ ބުނީ، މިދިޔަ ދެ ހަފުތާއެއް ދުވަހު އޭނާ ވިސްނި ވިސްނުމުގައި ދެން ކުޅެން ޖެހޭނީ ގައުމީ ޓީމަށް އެންމެ ފަހު މެޗެވެ.

އެ މެޗު ކުޅެން ނިންމީ، ގައުމީ ޓީމުގެ ފޯވަޑް ލައިން ޒުވާން ހުނަރުވެރި ކުޅުންތެރިންނާ ހަވާލުކުރުމަށް ކަމަށްވެސް ޗެތުރީ ބުންޏެވެ.

ޗެތުރީ ވަނީ އިންޑިއާގެ ގައުމީ ޓީމައެކު 2007، 2009ގެ އިތުރުން 2012 ވަނަ އަހަރުގެ ނެހުރޫ ކަޕް ކާމިޔާބުކުރުމުގެ އިތުރުން، 2008 ވަނަ އަހަރު އޭއެފްސީ ޗެލެންޖް ކަޕް ކާމިޔާބުކޮށް، 27 އަހަރަށްފަހު އިންޑިއާއަށް އޭޝިއަން ކަޕުން ޖާގަ ހޯދައިދިނުމުގައިވެސް މުހިންމު ދައުރެއް އަދާކޮށްދީފައެވެ.

މީގެ އިތުރުން އިންޑިއާގެ އެންމެ މޮޅު ކުޅުންތެރިޔާގެ މަގާމު ރެކޯޑު އަދަދެއް ކަމަށްވާ ހަތް ފަހަރު ހޯދާފައިވާ ޗެތުރީ ވަނީ އިންޑިއާގެ ގައުމީ ޓީމާއެކު ހަތަރު ފަހަރު ސާފް ޗެމްޕިއަންޝިޕްގެ ޗެންޕިއަންކަން ވެސް ހޯދާފައެވެ.