ދިވެހިންގެ ހުނަރާއި އުފެއްދުންތަކަށް ދުނިޔޭގެ މާކެޓުތަކުން އާމުދަނީ ހޯދޭނެ މަގުފަހި ކޮށްދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވެފައިވަނީ، މިއަދު ފާހަގަކުރަމުންދާ، ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަހުގެ ތަހުނިޔާ ފޮނުއްވައި އެކްސްގައި މިއަދު ކުރެއްވި ޕޯސްޓްގައެވެ.
މުވާސަލާތުގެ އެންމެ ޒަމާނީ ރަސްމަގަށް ރާއްޖެ ހުޅުވާލައި، ދިވެހިންގެ ހުނަރާއި އުފެއްދުންތަކަށް ދުނިޔޭގެ މާކެޓްތަކުން އާމުދަނީ ހޯދޭނެ މަގުފަހިކުރާނަމެވެ
ރައީސް ޑރ މުހައްމަދު މުޢިއްޒު
މުވާސަލާތުގެ އެންމެ ޒަމާނީ ރަސްމަގަށް ރާއްޖެ ހުޅުވާލައްވާނެ ކަމަށް ރައީސް ވިދާޅުވެފައި ވާއިރު ޓެލެކޮމިއުނިކޭޝަން ދާއިރާގެ އެންމެ ފަހުގެ ވަސީލަތްތައް ރާއްޖޭގައި ޤާއިމުކޮށް އުފެއްދުންތެރިކަމުގެ މައްޗަށް ބިނާވެފައިވާ އިޤުތިޞާދަކަށް ފަހިކުރުމަށް ޓެކްނޮލޮޖީގެ އެކި ވަސީލަތްތައް ބޭނުންކުރުމާއެކު، އީކޮމާސް ޕްލެޓްފޯމުތަކުގައި ދިވެހިންނަށް ސެލާ އެކައުންޓުތައް ހުޅުވާނެ ގޮތް ހަދައިދީ އޮންލައިން އެކި މަންސަތައް މެދުވެރިކޮށް ވިޔަފާރިކުރެވޭނެ މަގުފަހި ކުރުމަކީ އެމަނިކުފާނުގެ ވައުދުފުޅެކެވެ.
މި އަހަރުގެ ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަހުގެ ޝިއާރަކީ “ދެމެހެއްޓެނެވި ތަރައްޤީއަށް ޑިޖިޓަލް އީޖާދުތައް” މި ޝިއާރެވެ. އެއިން ދޭހަކޮށްދެނީ އުފެންދުންތެރި އީޖާދީ ޓެކްނޮލޮޖީތަކާއެކު ދުނިޔެއަށް މިހާރު ކުރިމަތިވެފައިވާ ބޮޑެތި ގޮންޖެހުންތަކަށް ހައްލު ހޯދައިދީ، އދއިން ކަނޑައަޅާފައިވާ ދެމެހެއްޓެނެވި ތަރައްޤީގެ އަމާޒުތައް ހާސިލުކުރެވޭނެކަމަށް ޤަބޫލުކުރުމެވެ.
Advertisement
This content is created and paid for by advertisers and does not involve Voice Journalists
