މި ދުނިޔޭގައި އެންމެ ދެކެން ބޭނުންވާ އެއް ދުވަހަކީ އެއްބަނޑު އެއްބަފާ ކޮއްކޮ ރާފިޔަތު ރަމީޒާ ލަވަކިޔުން ހުއްޓާލާ ދުވަސް ކަމަށް ދާރިސް ޓީވީގެ ސްޓެޝަން މެނޭޖަރ އަލީ ރަމީޒު ވިދާޅުވެއްޖެއެވެ.

ލަވަކިޔުމުގެ ދާއިރާގައި އުޅުމަށްފަހު، އެކަން އެއްކޮށް ހުއްޓައިލުމަށްފަހު 2003 ވަނަ އަހަރުން ފެށިގެން ދީނީ ދައުވަތު ފެތުރުމުގައި އިސްކޮށް ހަރަކާތްތެރިވަމުން އަންނަ އަލީ ރަމީޒުގެ ކޮއްކޮ އިބްރާހީމް ރަމީޒުވެސް އޭނާއާއެކު އެކުއެކީހެން ލަވަކިޔުމާއި ދުރަށް ގޮސްފައިވެއެވެ.

އެހެން ނަމަވެސް އޭނާގެ އަންހެން ކޮއްކޮ ރާފިއަތު އަދިވެސް ލަވަކިޔަމުންދާތީ، މިޔުޒިކާއި ދެކޮޅަށް އަލީ ރަމީޒު ދައްކަވާ ވާހަކަތަކަށް ކޮމެންޓް ކުރާ މީހުން ފާޑުކިޔައެވެ.

Advertisement

އެގޮތުން، ކަރޯކޭ ޖެއްސުމާ ދެކޮޅަށް އަލީ ރަމީޒު ފޭސްބުކުގައި ކުރެއްވު ޕޯސްޓަކަށް ކޮމެންޓް ކުރި މީހަކު ވަނީ ރާފިޔަތު ރަމީޒާ ލަވަކިޔުން ރަނގަޅުތޯ އާއި އޭނާ ލަވަކިޔުން ހުއްޓުވުމަށް ބުނެފައެވެ.

“އެންމެ ފުރަތަމަ ރާފިޔަތު ރަމީޒާ ލަވަކިއުން ހުއްޓުވަން. އޭނައަށް ނަސޭހަތް ދީބަލަ ފުރަތަމަ. އޭނާ ލަވަކިޔުން އޯކޭތަ؟"

އެ ސުވާލުގެ ޖަވާބުގައި އަލީ ރަމީޒު ވަނީ ރާފިޔަތު ލަވަކިއުން ހުއްޓައިލުމަކީ މި ދުނިޔޭގައި އަޅުގަނޑު އެންމެ ދެކެން ބޭނުންވާ އެއް ދުވަސްًކަމަށް ވިދާޅުވެފައެވެ.

“الله އަޅުގަނޑަށް އެ ދުވަސް ދައްކަވާށި! އާމީން" އަލީ ވިދާޅުވިއެވެ. 

އިސްލާމް ދީނުގައި މިޔުޒިކާއި ގުޅޭ ގޮތުން އައިސްފައިވާ ދަލީލް ތަކާއި ގުޅިގެން އަލީ ރަމީޒު، ލަވަކިޔުން ހުއްޓާލާފައިވާއިރު، އެނޫންވެސް އެހެން ލަވަކިޔުން ތެރިންވެސް ވަނީ އެކަމާއި ދުރަށް ގޮސްފައެވެ. އަދި އަލީ ރަމީޒު އެކަން ހުއްޓާލުމަށްފަހު އޭނާ އަންނަނީ އެ ހުއްޓާލުމުން ދިރިއުޅުން ބަދަލުވެ، ލިބެމުންދާ ހިތްހަމަޖެހުމާއި އުފަލާއި ގުޅޭ ގޮތުން މީހުންނަށް ކިޔައި ދެއްވުމަށް ރަށް ރަށުގައިވެސް “އަލީ ރަމީޒާއެކު” ޕްރޮގްރާމް ކުރިއަށް ގެންދަމުންނެވެ.

ަ