އީރާންގެ ރައީސް އިބްރާހީމް ރައީސީ އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.

އީރާނުގެ ރައީސް އިބްރާހީމް ރައީސީ އަވަހާރަވެފައި ވަނީ އޭނާ ދަތުރުކުރެއްވި ހެލިކޮޕްޓަރު ވެއްޓި، ހިނގި ހާދިސާއެއްގައެވެ.

އިރާންގެ ރައީސް އާއި އިސްއޮފިޝަލުން އަވަހާވުމާއިގުޅިގެން ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސީ އަވަހާރަވެވަޑައިގެންނެވި ޚަބަރު އެއްސެވީ ފުން ހިތާމަޔާއި އެކުގައި ކަމަށެވެ. 

އަދި ރައީސީ އާއި ދެންވެސް ހެލިކޮޕްޓަރ ގައި ރޯވި ހާދިސާގައި އަވަހާރަވި އެންމެންގެ ފުރާނައަށް ސުވަރުގޭގެ ދާއިމީ ނިޢުމަތް ދެއްވުން އެދި ދުޢާ ކުރައްވަމުން ރައީސް މުޢިއްޒު ވަނީ މި ހިތާމަވެރި ދަނޑިވަޅުގައި، އަވަހާރަވި ބޭފުޅުންގެ އާއިލާ ތަކާއި އީރާންގެ ރައްޔިތުންނަށް ހެޔޮ ދުޢާ ކުރައްވައި ތަޢުޒިޔާ ދަންނަވާފައެވެ. 

ކުއްލި ހާލަތެއް މެދުވެރިވެ, އިއްޔެގެ ވަގުތެއްގައި ރައީސީ އިންނެވި ހެލިކޮޕްޓަރު ބިމަށްތިރި ކުރަންޖެހި، އެ ހާދިސާގައި ހެލިކޮޕްޓަރ އަނދައި، ހެލިކޮޕްޓަރުން ދަތުރުކުރި އެންމެން އަވަހާރަވެފައިވާ ކަމަށް އީރާނުން މިހާރުވަނީ ރަސްމީކޮށް އިއުލާން ކޮށްފައެވެ.  

އެގޮތުން ރައިސީއާއެކު ދަތުރުކުރެއްވި އެޤައުމުގެ ޚާރިޖީ ވަޒީރު ހުސައިން އަމީރު އަބްދުالله ހިޔާންއާ، އިރުމަތީ އަޒަރުބައިޖާން ޕްރޮވިންސްގެ ގަވަރުނަރު މަލިކް ރަހުމަތީ އަދި ތަބްރީޒް މިސްކިތުގެ އިމާމް އާޔަތުالله އަލްހާޝިމީވެސް އަވަހާރަވެފައިވާކަމަށް އިރްނާއިން ވަނީ ރިޕޯޓުކޮށްފައެވެ.