އިޓާލިއަން ސެރިއޭގައި ހޯމަދުވަހުގެ ރޭ ރަށުން ބޭރުގައި ބޮލޯނިއާ އާއި ޔުވެންޓަސް ވާދަކުރި މެޗުގެ ފަހުހާފުގައި ޔުވެންޓަސް އިން ކާމިޔާބުކުރި ތިން ލަނޑާއެކު 3-3 ގެ ނަތީޖާއަކުން ދެޓީމު އެއްވަރުވެއްޖެއެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެ މޮޅަށް ކުޅެ މެޗު ޑޮމިނޭޓުކުރީ ބޮލޯނިއާ އިންނެވެ. ނަތީޖާއެއްގެ ގޮތުން މެޗުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

މިލަނޑު މެޗު ފެށިގެން ދެވަނަ މިނެޓުގައި އެޓީމަށް ކާމިޔާބުކޮށްދިނީ އެޓީމުގެ ޑިފެންޑަރު ރިކާޑޯ ކަލަފައިރީ އެވެ. އަދި އޭގެ ނުވަ މިނެޓުފަހުން އެޓީމުގެ އާޖެންޓީނާ ފޯވާޑް ސަންޓިއާގޯ ކާސްޓްރޯ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މިއީ އެޓީމުގެ ޕޮލެންޑް މިޑްފިލްޑަރު އާބަންސްކީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ބޮލޯނިއާ އިން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މިހާފުގައި ޔުވެންޓަސްގެ ފަރާތުން ވަރަށް އާދައިގެ ކުޅުމެއް ފެނުގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ބޮލޯނިއާ ކުރީގައި އޮވެގެންނެވެ.

މެޗުގެ ދެވަނަ ހާފު ވެސް ވަރުގަދަކޮށް ފެށީ ބޮލޯނިއާ އިންނެވެ. ނަތީޖާއެއްގެ ގޮތުން ދެވަނަ ހާފު ފެށިގެނ އަށް ވަނަ މިނެޓުގައި އެޓީމުން ވަނީ އިތުރު ލަނޑެއް ކާމިޔާބުކޮށް ތިން ލަނޑުގެ ލީޑެއް ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ފުރަތަމަ ލަނޑުވެސް ކާމިޔާބުކޮށްދިން ރިކާޑޯ އެވެ.

މިލަނޑާއެކު ޔުވެންޓަސް އިން ވަނީ ބަދަލުތަކެއްގެނެސް އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ ފަހު 16 މިނެޓްތެރޭގައި އެޓީމުން ވަނީ ގާތްގާތުގައި ތިން ލަނޑު ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. 

އެގޮތުން އެޓީމުގެ ފުރަތަމަ ލަނޑު ދެވަނަ ހާފުގެ 76 ވަނަ މިނެޓުގައި ފެޑެރީކޯ ޗިއޭސާ ކާމިޔާބުކުރިއިރު ދެވަނަ ލަނޑު 83 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ޕޮލެންޑް ފޯވާޑް މިލިކް އެވެ. އަދި އެޓީމުން މެޗުގެ ނަތީޖާ އެއްވަރުކުރި ލަނޑު ޖެހިގެންއައި މިނެޓުގައި ކާމިޔާބުކޮށްދިނީ ތުުރުކީގެ ޒުވާން ފޯވާޑް ކެނަން ޔިލްޑިޒް އެވެ.

މިނަތީޖާއެކު ލީގުގައި ކުޅުނު 37 މެޗުން މިދެޓީމަށް ވެސް 68 ޕޮއިންޓް ލިބިފައިވާއިރު، ލަނޑުގެ ތަފާތުން ބޮލޯނިއާ މިވަގުތު އޮތީ ލީގު ތާވަލުގެ ތިންވަނައިގައެވެ. އަދި ޔުވެންޓަސް އޮތީ ހަތަރު ވަނައިގައެވެ.