މެލޭޝިއާގައި މިހާރު ކުރިއަށްދާ 66 ވަނަ މެލޭޝިއާ އޯޕަން ސްވިމިންގ ޗެމްޕިއަންޝިޕްސް 2024 ގައި ރާއްޖޭގެ ގައުމީ ޓީމުގެ ފެތުންތެރިއާ މުޙައްމަދު އާން ޙުސައިން ފިރިހެނުންގެ ލޯންގްކޯސް 100 މީޓަރ ފްރީސްޓައިލް އިވެންޓުގެ ޤައުމީ ރެކޯރޑް އައުކުރިއިރު، 1500 މީޓަރުގެ ރެކޯޑް މުޙައްމަދު ރިޙާން ޝިހާމް އާކޮށްފިއެވެ

އާން 100 މީޓަރު ފްރީސްޓައިލް އިވެންޓުގެ ޤައުމީ ރެކޯރޑް އައުކޮށްފައި ވަނީ 00.54.45 ސިކުންތުން 100 މީޓަރ ފްރީސްޓައިލް ރޭސް ފުރިހަމަކޮށްގެންނެވެ. އަދި މީގެ އިތުރުން އާން ވަނީ މިއިވެންޓްގެ ފައިނަލް ސީ އަށްވެސް ކޮލިފައިވެފައެވެ. އަދި ފައިނަލުގައި އޭނާ ރޭސް ނިންމާފައިވަނީ 00.54.75 ސިކުންތުންނެވެ.

ކުރިންވެސް 100 މީޓަރ ފްރީސްޓައިލް އިވެންޓުގެ ޤައުމީ ރެކޯޑު އޮންނަ އާން އެންމެފަހުން އާކޮށްފައިވަނީ، މިއަހަރު ކުރީކޮޅު ބޭއްވި 11 ވަނަ އޭޝިއަން އޭޖްގްރޫޕް ޗެމްޕިއަންޝިޕްސްގައެވެ. އޭނާ އެފަހަރު ޤައުމީ ރެކޯޑު އާކޮށްފައިވަނީ 00.55.11 ސިކުންތުން ރޭސް ނިންމައިގެންނެވެ.

Advertisement

ފިރިހެނުންގެ ލޯންގްކޯސް 1500 މީޓަރ ފްރީސްޓައިލް އިވެންޓުގެ ޤައުމީ ރެކޯރޑް މުޙައްމަދު ރިޙާން ޝިހާމް އާކޮށްފައި ވަނީ 18.03.57 އިން 1500 މީޓަރު ރޭސް ފުރިހަމަކޮށްގެންނެވެ. މިއީ ކުރީގެ ރެކޯޑަށްވުރެ އެއް މިނެޓް 23 ސިކުންތު އަވަސް ވަގުތެކެވެ.

ކުރިން ފިރިހެނުންގެ ލޯންގްކޯސް 1500 މީޓަރ ފްރީސްޓައިލް އިވެންޓުގެ ޤައުމީ ރެކޯރޑް އޮތީ މުބާލް ޢައްޒާމް އިބްރާޙީމް އަތުގައެވެ. އޭނާ މިރެކޯޑް ހަދާފައިވަނީ 2018 ވަނަ އަހަރު ބޭއްވުނު 18 ވަނަ އޭޝިއަން ގޭމްސްގައި 19.26.54 ގެ ވަގުތަކުން ރޭސްނިންމައިގެންނެވެ.