އުޒްބަކިސްތާނުގައި މިއަހަރުގެ ސެޕްޓެންބަރު މަހު ބޭއްވުމަށް ހަމަޖެހިފައިވާ ފީފާ ފުޓްސަލް ވޯލްޑްކަޕް 2024 ގެ ގުރުލުން މިރޭ ބާއްވައިފިއެވެ.

އުޒުބަކިސްތާނުގެ ގަދީމީ އަވަށެއްކަމަށްވާ ސަމަރްކަންޑުގައި ބޭއްވުނު ގުރުލުމުގެ ރަސްމިއްޔާތުގައި އެންމެ ފަހުގެ ޗެންޕިއަން ޕޯޗުގަލް ހިމެނުނީ ގުރޫޕް އީގައެވެ. މިގުރޫޕްގައި ޕޯޗުގަލްގެ އިތުރުން ދެންއޮތީ ޕެނަމާ، ތަޖިކިސްތާން އަދި މޮރޮކޯއެވެ.

ގުރޫޕް އޭގައި މުބާރާތް ބާއްވާ ގައުމު އުޒުބަކިސްތާނުގެ އިތުރުން ދެން އޮތީ ނެދަލޭންޑްސް ޕެރަގުއާއީ އަދި ކޮސްޓަރީކާ އެވެ. ގުރޫޕް ބީގައި މުބާރާތުގެ އެންމެ ކާމިޔާބު ގައުމު ބުރެޒިލްގެ އިތުރުން ދެން އޮތީ ކިއުބާ، ކްރޮއޭޝިއާ އަދި ތައިލެންޑް އެވެ.

ގުރޫޕް ސީގައި 2016 ވަނަ އަހަރުގެ ޗެންޕިއަން އާޖެންޓީނާގެ އިތުރުން ދެން އޮތީ ޔުކުރެއިން، އެންގޯލާ އަދި އަފްގާނިސްތާނެވެ. އަދި މިއީ 1948 ވަނަ އަހަރުގެ ފަހުން ފީފާ މުބާރާތެއްގައި އަފްގާނިސްތާން ވާދަކުރާ ފުރަތަމަ ފަހަރެވެ. އަދި ގުރޫޕް ޑީގައި މިފަހަރުގެ ފޭވަރައިޓުން ސްޕެއިންގެ އިތުރުން ދެން އޮތީ ކަޒަކިސްތާން، ނިއުޒިލޭންޑް އަދި ލީބިއާއެވެ.

މިއަހަރުގެ މުބާރާތުގައި އޭޝިއާގެ ޗެންޕިއަން އިރާން ލައްވާލީ ގުރޫޕް އެފްގައެވެ. މިގުރޫޕްގައި އިރާނުގެ އިތުރުން ދެން އޮތީ ވެނަޒުއޭލާ، ގުއަޓަމާލާ އަދި ފްރާންސް އެވެ.

2024 ސެޕްޓެންބަރު 14 އިން އޮކްޓޯބަރު 06 އަށް އުޒުބަކިސްތާނުގެ އަންޑިޖަން، ބުޚާރާ އަދި ތާޝްކެންޓުގައި ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި 26 ގައުމަކުން ވާދަކުރާއިރު، މުބާރާތް ކުރުއަށް ގެންދިއުމަށް ހަމަޖެހުފައިވަނީ 26 ޓީމު ހަ ގުރޫޕަކަށް ބަހާލައިގެންނެވެ.

ކޮންމެ ގުރޫޕަކުންވެސް އެންމެ ރަނގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ. އަދި ކޮންމެ ގުރޫޕަކުންވެސް އެންމެ ރަނގަޅު ނަތީޖާ ހޯދާ ތިންވަނަ ޓީމުތަކުގެ ތެރެއިން އެންމެ ނަތީޖާ ރަނގަޅު ހަތަރު ޓީމަށް ވެސް ކުއާޓާ ފައިނަލުން ފުރުސަތު ލިބިގެންދާނެއެވެ.