ދިވެހިންގެ އެހީގެ އިތުރު ދެ ޓްރަކު މިއަދާ މާދަމާ ޣައްޒާއަށް ވަންނާނެ ކަމަށް، ދިވެހިންގެ އެހީ ފަލަސްތީނަށް ފޯރުކޮށްދިނުމުގެ މަސައްކަތް ކުރަމުންދާ ޖަމިއްޔާ، އިންޓަނޭޝަނަލް އެއިޑް ކެންޕެއިން އިން ބުނެފިއެވެ. 

އައިއޭސީން މީސްމީޑިއާގައި ކުރި ޕޯސްޓެއްގައި ބުނީ، ކަރީމް ޝަލޮމް ބޯޑާ އަދި އުތުރު ޣައްޒާގެ އެރެޒް ކޮރޮސިންއިން ޣައްޒާއަށް އެހީގެ ޓްރަކްތަށް އެތެރެވެފައިވާ ކަމަށެވެ.

އެގޮތުން ބޯޑާ ހުޅުވާލުމާއި އެކު ކަރީމް ޝަލޮމް ބޯޑައިން މިއަދު ވަނީ 143 އެހީގެ ޓްރަކު އަދި ކޮމާޝަލް ބޭނުމަށް ބޭނުންކުރާ 201 ވެހިކަލް އެތެރެވެފައި ކަމަށް ބުނެފައިވެއެވެ. 

.މީގެ އިތުރުން، މިއަދާއި މާދަމާއާއިއެކު ގާތްގަނޑަކަށް 300 އެއްހާ އެހީގެ ޓްރަކަށް ޣައްޒާއަށް އެތެރެވެވޭނެ ކަމަށް އައިއޭސީން ލަފާކުރާއިރު، އޭގެ ތެރޭގައި ދިވެހިންގެ އެހީ ހިމެނޭ 40 ފީޓުގެ އެހީގެ 2 ޓްރަކު ހިމެނިގެންދާނެކަން އައިއޭސީން ފާހަގަކުރެއެވެ.

މިއާއެކު އައިއޭސީން ބުނީ، ރަފާޙް ބޯޑަރާއި ކަރީމް ޝަލޮމް ބޯޑަރު ބަންދުކޮށްފައިި ވަނިިކޮށް އުތުރު ޣައްޒާގެ އެރެޒް ކޮރޮސިންއިން ވެސް 2 ޓްރަކުގެ އެހީ އެތެރެ ކުރެވި، އެހީ ބެހެންވެސް ފެށިފައިވާ ކަމަށެވެ. 

މި މަހުގެ 6 ވަނަ ދުވަހު ރަފާހްގައި އޮންނަ އިންސާނީ އެހީތަކާއި ވިޔަފާރީގެ ސާމާނު ޣައްޒާއަށް ވަންނަ މި މައި ބޯޑަރުގެ ކޮންޓްރޯލް ޔަހޫދީ ފައުޖުން ނެގުމާއި ގުޅިގެން ޣައްޒާ އަށް އެހީ ވެއްދުން ތިން ހަފްތާ އަށް މެދުކެނޑިގެން ދިޔުމަށްފަހު މިހާރު އަންނަނީ ކަރެމް ޝެލޮމް މަގުން ޣައްޒާއަށް އަލުން އެހީ ވައްދަންފަށާފައެވެ. 

އެހީ ވައްދަން ފަށާފައުވަނީ، އެއްވެސް ހުރަހެއްނެތި އިންސާނީ އެހީ ޣައްޒާއަށް ފޯރުކޮށްދެވޭނެ މަގު ފަހިކޮށްދިނުމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިސްރާއީލުގެ މައްޗަށް އަމުރުކޮށްފައިވަނިކޮށެވެ.