ހައްދުފަހަނައަޅާފައިވާ އިސްރާއީލްގެ ޔަހޫދީން ފަލަސްތީނުގައި ހިންގަމުންދާ ގަތުލުޢާއްމާ ދެކޮޅަށް ހުރިހާ ކުދި ޖަޒީރާ ގައުމުތައް (ސިޑްސްގެ ގައުމުތައް)ތެދުވުމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ގޮވާލައްވައިފިއެވެ. 

ހަތަރުވަނަ 'އިންޓަރނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސް' މަހާސިންތާ ހުޅުވުމުގެ ރަސްމިއްޔާތުގައި ރައީސް މުޢިއްޒު ދެއްވި ތަގުރީރު ފަށްޓަވަމުން، އެމަނިކުފާނު ވަނީ، އެތަނުގައި ހުއްޓި ހުންނަވައި އެމަނިކުފާނު ވާހަކަދައްކަވަމުންދާ ވަގުތުގައިވެސް، ދުނިޔޭގެ ކޯޓް، އައިސީޖޭގެ އަމުރާއި ޚިލާފަށް، ރަފަހް ގައި ތިބި ފަލަސްތީނުގެ ރައްޔިތުންނާއި ދެކޮޅަށް ހުއްޓުމެއްނެތި އިސްރާއިލުން ގަތުލުއާއްމު ހިންގަމުންދާ ކަން ފާހަގަކުރައްވާފައެވެ. 

މިއާއެކު ރައީސް ވިދާޅުވީ، ގޮތް ހުސްވެފައި ހުންނަން ޖެހުމުން ކުރެވޭ އިހްސާސް، ސިޑްސްގެ ހުރިހާ ގައުމަކަށްވެސް އެނގޭނެ ކަމަށެވެ. އަދި ގައުމުގެ ބަލިކަށިކަމާއިއެކު، ބައިނަލްއަގުވާމީ ގުނަންތަކުން އަޅާނުލުމުން ކުރެވޭ އިހްސާސް އެ ކުދި ގައުމުތަކަށް އެނގޭނެ ކަން ރައީސް ފާހަގަކުރެއްވިއެވެ. 

ިއެހެން ކަމުން، ރައީސް މުޢިއްޒުވަނީ ސިޑްސްގެ ހުރިހާ ލީޑަރުންވެސް ފަލަސްތީނާއިއެކު ތިބި ކަން ދުނިޔެއަށް ހާމަކުރެމަށް ގޮވާލައްވާފައެވެ. 

ހަތަރުވަނަ ސިޑްސް މަހާސިންތާ އަކީ "ޗާރޓިންގ ދަ ކޯސް ޓުވާޑްސް ރިސިލިއަންޓް ޕްރޮސްޕަރިޓީ" މި ޝިއާރުގެ ދަށުން ސިޑްސްގެ ޤައުމުތަކުގެ ލީޑަރުންނާއި އެކި ދާއިރާތަކުން ގުޅުންހުރި ހުރިހާ ހިއްސާދާރުން އެއްތަނަކަށް އެއްވެ، ތަރައްޤީވަމުން އަންނަ ކުދި ޖަޒީރާ ޤައުމުތަކަށް ދެމެހެއްޓެނިވި، ތަނަވަސް، އަދި ވިލުންތެރި މުސްތަގުބަލަކަށް މަސައްކަތް ކުރުމަށް މަޝްވަރާކުރުމަށް ބާއްވާ ބައިނަލްއަޤްވާމީ މަހާސިންތާއެކެވެ.