ވިހިވަނަ ރައްޔިތުންގެ މަޖިލީހަށް އަލަށް އިންތިޚާބުވެވަޑައިގެން މެންބަރުން، މެންބަރުކަމުގެ ގާނޫނީ ހުވާ މިއަދު ކުރައްވައިފިއެވެ.

އާ މަޖިލީސް ހުވާކުރަން ކުރިއަށް ދިޔައީ މިއަދު ހެނދުނު 9:00 ގައި ރައްޔިތުންގެ މަޖިލީހުގެ އިދާރާގައި ބޭއްވި ރަސްމިއްޔާތުގައެވެ. މި ރަސްމިއްޔާތުގައި މަޖިލީހަށއ އިންތިޚާބުވެވަޑައިގެންނެވި 93 މެންބަރުން ވަނީ ހުވާކުރައްވައިފައެވެ. މެންބަރުން ހުވާކުރެއްވީ އުއްތަމަފަނޑިޔާރު އަހުމަދު މުއުތަސިމް އަދުނާންގެ ކުރިފުޅުމަތީގައެވެ.

ވިހިވަނަ މަޖިލީހުގެ ފުރަތަމަ ޖަލްސާ ބާއްވަން ތާވަލުކޮށްފައިވަނީ މިއަދު ހެނދުނު 10:15 ގައެވެ. އެ ޖަލްސާގައި އޮންނާނީ ރައްޔިތުންގެ މަޖިލީހުގެ ރައީސާއި ނައިބު ރައީސް އިންތިޚާބުކުރުމެވެ. މަޖިލީހުގެ ރައީސާއި ނައިބު ރައީސް އިންތިޚާބު ކުރެވެންދެން ޖަލްސާގެ ރިޔާސަތު ބަލަހައްޓަވާނީ މީދޫ ދާއިރާގެ މެންބަރު އަހުމަދު ސިޔާމް މުހައްމަދެވެ.

Advertisement

އާ މަޖިލީހުގައި ޖުމުލަ 93 މެންބަރުން ތިއްބަވާއިރު، ސަރުކާރު ހިންގާ ޕީއެންސީން ވަނީ މަޖިލީހުގެ ސުޕަމެޖޯރިޓީއެއް ކާމިޔާބުކޮށްފައެވެ. އެގޮތުން އެޕާޓީގެ ޓިކެޓްގައި 66 މެންބަރުން މަޖިލީހަށް އިންތިޚާބުވިއިރު، މިހާރު އަލަށް ޕާޓީއަށްގުޅުނު މެންބަރުންނާއެކެ އެ އަދަދު 75 އަށް އަރައެވެ. 

އަދި މަޖިލީހުގެ ރައީސްއާއި ނާއިބު މިއަދު ކަނޑައަޅާއިރު، ޕީއެންސީގެ ޕާލިމެންޓްރީ ގްރޫޕުން ވަނީ އެ ޕާޓީގެ ލީޑަރު، ރައީސް ޑރ. މުހައްމަދު މުއިއްޒު ހުށަހެޅުއްވި ގޮތަށް މަޖިލީހުގެ ރައީސަކަށް ފޮނަދޫ ދާއިރާގެ މެންބަރު އަބްދުއްރަހީމް އަދި ނައިބު ރައީސްއަކަށް ދިއްގަރު ދާއިރާގެ މެންބަރު އަހުމަދު ނާޒިމް އިންތިޚާބުކުރަން ފާސްކޮށްފައެވެ.

މި މަޖިލީހުގެ މެޖޯރިޓީ ލީޑަރެއްގެ ގޮތުގައި ހުންނަވާނީ އިނގުރައިދޫ ދާއިރާގެ މެންބަރު އިބްރާހިމް ފަލާހް ކަމަށް ވެސް ޕީއެންސީން ވަނީ ނިންމައިފައެވެ. އަދި، އިދިކޮޅު އެމްޑީޕީން ވަނީ މައިނޯރިޓީ ލީޑަރެއްގެ ގޮތުގައި ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް ވަނީ އެޕާޓީން އިންތިޚާބުކޮށްފައެވެ.

މި މަޖިލީހުގައި މައިނޯރިޓީ ޕާޓީ އެމްޑީޕީއަށް ލިބިފައިވަނީ 12 ގޮނޑިއެވެ. 

20 ވަނަ ރައްޔިތުންގެ މަޖިލީހަށް އިންތިޚާބުވެ ވަޑައިގަންނަވާ މެންބަރުން ކަނޑައެޅުމަށް ވޯޓުލުން ކުރިއަށް ދިޔައީ ނިމިދިޔަ އޭޕްރީލް މަހުގެ 21 ވަނަ ދުވަހުއެވެ.