ފަލަސްތީނަށް އިޒްރޭލުގެ ޔަހޫދީން ދެމުން ގެންދާ ލާއިންސާނީ ހަމަލާ ތަކުގެ ސަބަބުން ގެދޮރު ގެއްލިފައިވާ މުސްލިމުން ހިޔާވަހިކަން ހޯދަމުންދިޔަ ރަފާހްގެ ކޭމްޕަށް އިޒްރޭލު ނިރުބަވެރި ސިފައިން ދިން ހަމަލާތައް ރައީސުލްޖުމުހުރިއްޔާ ޑރ. މުހައްމަދު މުއިއްޒު ކުށްވެރި ކުރައްވައިފިއެވެ. 

އިޒަރޭލުގެ ނިރުބަވެރި ހަމަލާ ކުށްވެރި ކުރައްވައި ރައީސް މުޢިއްޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ނެރެފައިވާ އަމުރުތަކަށް އިޒްރޭލުން ތަބާވާން ޖެހޭނެ ކަމަށެވެ. އަދި ބައިނަލްއަގުވާމީ ގާނޫނުން އެއްވެސް ގައުމެއް އިސްތިސްނާ ނުވާނެ ކަމަށްވެސް ވިދާޅުވިއެވެ.

މިއާއެކު ރައީސް މުޢިއްޒުވަނީ އިޒްރޭލުގެ ގަތުލްޢާއްމު ވަގުތުން ހުއްޓާލައި އަނިޔާވެރިކަން ނިމުމަކަށް ގެނެސް ފަލަސްތީނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ދިވެހި ސަރުކާރާއި ދިވެހި ރައްޔިތުންގެ ނަމުގައި ގޮވާލައްވާފައެވެ.

ޣައްޒާގެ ދެކުނުން އޮންނަ ރަފާހުގެ ހުޅަނގުގައި ގެދޮރުގެއްލިފައިވާ މީހުން ބޯހިޔާވަހިކަން ހޯދަމުން ދިޔަ ޓަލް އައްސުލްތާނުގައި ހުންނަ ބްރިކްސް ކޭމްޕަށް ނިރުބަވެރިން ހަމަލާ ދީފައި ވަނީ 8 ނުވަތަ 10 ވަރަކަށް ގޮވާ ޒާތުގެ ތަކެތި ބޭނުން ކޮށްގެންނެވެ. މި ހަމަލާ ދިނުމާއެކު އެތަނުގައި އަލިފާން ރޯވެ، އަލިފާންގަނޑު ފެތުރުނެވެ. އަދި އެތަނުގައި ނިދާފައި ތިބި އެތައް ބައެއްގެ ގައިގައި ރޯވިއިރު، ދިރިތިއްބާ ވަނީ ދުނިޔެ ދޫކޮށްފައެވެ.

ޣައްޒާގެ ސިއްހަތާ ބެހޭ ވުޒާރާއިން ބުނީ ރަފަހުގައި ގެދޮރު ގެއްލިފައިވާ މީހުންނަށް އިސްރާއީލުން ދިން ހަމަލާގައި މިހާތަނަށް 45 މީހުން ޝަހީދުވެފައިވާ ކަަމަށެވެ.