ޔުރޮޕާ ކޮންފަރެންސް ލީގު ފައިނަލުގައި ބުދަ ދުވަހުގެ ރޭ، އެންމެ ފަހުގެ ރަނަރަޕް އިޓަލީގެ ފިއޮރެންޓީނާ 1-0 ގެ ނަތީޖާއަކުން ބަލިކޮށް ގްރީސްގެ އޮލިންޕިއާކޯސް މުބާރާތުގެ ޗެންޕިއަންކަން ހޯދައިފިއެވެ.

އޮލިންޕިއާކޯސް މުބާރާތުގެ ފައިނަލުން ޖާގަހޯދީ ސެމީ ފައިނަލުގައި ޕްރެމިއާ ލީގުގެ އެސްޓަން ވިލާ 6-2 ގެ އެގްރިގޭޓް ނަތީޖާއަކުން ބަލިކުރުމަށް ފަހުއެވެ. އަދި ފިއޮރެންޓީނާ ޖެހިޖެހިގެން ދެވަނަ ފަހަރަށް މުބާރާތުގެ ފައިނަލުން ޖާގަ ހޯދީ ސެމީ ފައިނަލުގައި ވާދަވެރި ކުޅުމަކަށްފަހު 3-4 ގެ އެގްރިގޭޓް ނަތީޖާއަކުން ބެލްޖިއަމްގެ ކުލަބު ބުރާގާ ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފު ފެށިގެން 9 ވަނަ މިނެޓިގައި ފިއޮރެންޓީނާ އިން ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއްކަމަށެވެ.

Advertisement

މީގެ އިތުރުން މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިހާފުގައި ދެޓީމުންކުރެ އެއްވެސް ޓީމަކަށް ލަނޑުޖަހާނެ މާ ރަނގަޅު ހުސް ފުރުސަތުތަކެއް ތަނަވަސްކުރެވިފައެއްނުވެއެވެ. މިއާއެކު މެޗުގެ 90 މިނެޓު ހަމަވިއިރު 0-0 ގެ ނަތީޖާއަކުން ދެޓީމު އެއްވަރުވެފައި އޮތުމުން ނަތީޖާނެރުމަށްޓަކައި އިތުރު ވަގުތު 15 މިނެޓްގެ ދެހާފު ވަނީ ކުޅެފައެވެ. އަދި މިމެޗުން އޮލިންޕިއާކޯސް މޮޅުވި ލަނޑު އިތުރު ވަގުތު 15 ވަނަ މިނެޓުގެ ދެވަނަ ހާފު ނިމެން ހަތަރު މިނެޓަށް ވެފައިވަނިކޮށް އެޓީމަށް ކާމިޔާބުކޮށްދިނީ އެޓީމުގެ މޮރޮކޯ ފޯވާޑް ޢަޔޫބު އެލް ކާބީ އެވެ.

މިލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން އޮލިންޕިއާކޯސް ކުރީގައި އޮވެގެންނެވެ. އަދި މިއީ ސަރަހައްދީ މުބާރާތެއްގެ ޗެންޕިއަންކަން އެޓީމުން ހޯދި ފުރަތަމަ ފަހަރެވެ. އަދި މިއީ މުބާރާތުގެ ފައިނަލުގައި ފިއޮރެންޓީ ޖެހިޖެހިގެން ބަލިވި ދެވަނަ ފަހަރެވެ.