އެރެޒް ކްރޮސިންއިން ދިވެހިންގެ އެހީގެ 2 ވަނަ ޓްރަކް ޣައްޒާއަށް ވަދެއްޖެއެވެ.
ދިވެހިންގެ އެހީ ޣައްޒާއަށް ފޯރުކޮށްދިނުމުގެ މަސައްކަތް ކުރަމުންދާ އިންޓަނޭޝަނަލް އެއިޑް ކެންޕެއިން، އައިއޭސީން ބުނީ، އުތުރު ޣައްޒާއަށް ވަންނަމުންދާ އެހީގެ ޓްރަކް ތަކަށް އަމާޒުކޮށްގެން ހަމަލާތަށް ދެމުންދާ މި ދަނޑިވަޅުގައި އައިއޭސީގެ އެހީގެ ޓްރަކްތަށް ހަމަލާއެއް ނުލިބި ސަލާމަތުން އެތެރެ ވުމަކީ ވަރަށްވެސް ބޮޑު ނިޢުމަތެއް ކަމަށެވެ.
ޣައްޒާގެ ހުރިހާ ދިމާލެއްގެވެސް އޮތީ ވަރަށް ބިރުވެރި ދަތިކަންބޮޑު ހާލަތެއް ކަމަށްވާއިރު، ހާއްސަކޮށް ރަފާހްއަށް މިހާރު އިތުރަށް އެހީ ފޯރުކޮށް ދިނުމަށް ވަނީ ދަތިވެފައެވެ.
“ކިތަންމެ ދަތި އުނދަގޫ ނަމަވެސް އަޅުގަނޑުމެންގެ މި މަސައްކަތް ހުއްޓައެއް ނުލާނަން. ކާބޯ ތަކެއްޗާއި، ބޭހާއި އަދިވެސް ބޭނުންވާ ޒަރޫރޫ ތަކެތި ފޯރުކޮށްދިނުމަށް އަޅުގަނޑުމެން މިދަނީ މަސައްކަތް ކުރަމުން. ނަޞްރާއި ކާމިޔާބު ދެއްވުން އެދި ދުޢާކުރުން ހުއްޓާނުލާ” އައިއޭސީން ބުނެފައިވެއެވެ.
މި މަހުގެ 6 ވަނަ ދުވަހު ރަފާހްގައި އޮންނަ އިންސާނީ އެހީތަކާއި ވިޔަފާރީގެ ސާމާނު ޣައްޒާއަށް ވަންނަ މި މައި ބޯޑަރުގެ ކޮންޓްރޯލް ޔަހޫދީ ފައުޖުން ނެގުމާއި ގުޅިގެން ޣައްޒާ އަށް އެހީ ވެއްދުން ތިން ހަފްތާ އަށް މެދުކެނޑިގެން ދިޔުމަށްފަހު މިހާރު އަންނަނީ ކަރެމް ޝެލޮމް މަގުން ޣައްޒާއަށް އަލުން އެހީ ވައްދަންފަށާފައެވެ.
އެހީ ވައްދަން ފަށާފައުވަނީ، އެއްވެސް ހުރަހެއްނެތި އިންސާނީ އެހީ ޣައްޒާއަށް ފޯރުކޮށްދެވޭނެ މަގު ފަހިކޮށްދިނުމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިސްރާއީލުގެ މައްޗަށް އަމުރުކޮށްފައިވަނިކޮށެވެ.
Advertisement
This content is created and paid for by advertisers and does not involve Voice Journalists
