ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި މިމަހުގެ 7 ވަނަ ދުވަހު މާރާމާރީ ހިންގި ބިދޭސީ މީހާގެ މައްޗަށް 10،800 ރުފިޔާގެ ޖޫރިމަނާއެއް ކްރިމިނަލް ކޯޓުން އިއްވައިފިއެވެ.

އެމެރިކާގެ ރައްޔިތެއް ކަމަށްވާ ހަޑަޑް ވިސާމް އެއާޕޯޓުގައި މާރާމާރީ ހިންގީ  އޭނާ ފުރަން ގޮސް ހުއްޓާ ލަގެޖް ބަރުވެ އެޔަށް އިތުރަށް ފައިސާ ދެއްކުމަށް ބުނުމުންނެވެ.

މިކަމާއި ގުޅިގެން ދައުލަތުން ވަނީ އޭނާގެ މައްޗަށް ދެ ދައުވާއެއް އުފުލާފައެވެ. އެއީ އަނިޔާއެއް ދިނުމުގެ ދައުވާ އާއި ގައިގައި އަތްލުމުގެ ދައުވާއެވެ.

މިގޮތުން އަނިޔާއެއް ދިންކަމަށް ވިސާމްގެ މައްޗަށް ދައުލަތުން އުފުލި ދައުވާގައިވާގޮތުން، އޭނާ ވަނީ އެއްތިހާދު އެއާވޭސްގެ އެއާޕޯޓު މެނޭޖަރު ކަރުގައި ހިފައި، ކޮޅުފައިން މެނޭޖަރުގެ ފައިގެ އެކިތަންތާގައި ޖަހައި، ވާތު ކަންފަތްމަތީގައި ޖަހާފައިކަމަށެވެ. އެއާއިއެކު، މެނޭޖަރަށް ބޮޑެތި އަނިޔާތަކެއް ވެފައިވާކަން ދައުލަތުގެ ވަކީލު ފާހަގަކުރެއްވިއެވެ.

ދައުވާގައިވާ ކަންކަމަށް ވިސާމް އިއުތިރާފްވިއިރު، ވިސާމް އެދުނުފަދައިން ކްރިމިނަލް ކޯޓުން ވަނީ އޭނާގެ "އިއުތިރާފްގެ އެއްބަސްވުން" ބަލައިގެންފައެވެ. އަދި ވިސާމްގެ މައްޗަށް ދައުވާ ސާބިތުވާކަމަށް ނިންމައި، ކްރިމިނަލް ކޯޓުން ވަނީ އޭނާ 7200 ރުފިޔާއިން ޖޫރިމަނާކޮށް، މިފައިސާ 30 ދުވަހުގެ ތެރޭގައި ދެއްކުމަށް ހުކުމްކޮށްފައެވެ.

ހަމައެއާއިއެކު، އެއްތިހާދު އެއާވޭސްގެ ޑިއުޓީ ސުޕަވައިޒަރު ގައިގައި ޖަހާފައިވާތީ، އޭނަގެ މައްޗަށް އުފުލި ގައިގައި އަތްލުމުގެ ދައުވާ އަށް ވެސް ވިސާމް ވަނީ އިއުތިރާފްވެފައެވެ. އެއާއިއެކު އޭނާގެ "އިއުތިރާފްގެ އެއްބަސްވުން" ޝަރީއަތުން ވަނީ ބަލައިގަނެފައެވެ.

މި ދައުވާ ވިސާމް ގެ މައްޗަށް ސާބިތުވެ، ކްރިމިނަލް ކޯޓުން ވަނީ އޭނާ 3600 ރުފިޔާއިން ޖޫރިމަނާކޮށް، މި ފައިސާ 30 ދުވަހުގެ ތެރޭގައި ދެއްކުމަށް ހުކުމްކޮށްފައެވެ.