ރާއްޖޭގެ ފުންނާބު އުސް ދީނީ ޢިލްމުވެރިޔާ އައްޝައިޚް އަހްމަދު ސަމީރު ގެ ދެ ދަރުސް މިރޭ މާލޭގެ ދެ މިސްކިތެއްގައި ބާއްވާ ގޮތަށް ހަމަޖެހިއްޖެއެވެ.

އެގޮތުން މިރޭ މަޣުރިބު ނަމާދަށްފަހު އިސްލާމީ މަރުކަޒު، މަސްޖިދުއް ސަލާޠާނު މުޙައްމަދު ތަކުރުފާނުލް އަޢުޒަމު، އޮންނަނީ މަސްޖިދުލް އަގްސާ ގެ މާތްކަމާއި ބެހޭ ޚާއްޞަ ދަރުހެކެވެ. މިއީ އިސްލާމީ ކަންތައްތަކާބެހޭ ވުޒާރާއިން އިންތިޒާމުކޮށްގެން ކޮންމެ ހުކުރުދުވަހުގެ ރޭގަނޑު މާލެ މިސްކިތްތަކުގައި ބާއްވާ ސިލްސިލާ ދަރުސްތަކުގެ ތެރެއިން ފަލަސްތީނުގެ މައްސަލައަށް ބާއްވާ ދަރުހެކެވެ.

މިރޭ ބާއްވާ ގޮތަށް ހަމަޖެހިފައިވާ ޝެއިޚް ސަމީރުގެ ދެވަނަ ދަރުހަކީ ޖަމްޢިއްޔަތުއްސަލަފުގެ ފަރާތުން މިސްކިތް ތަކުގައި ގެންދާ ކުލާސްތަކުގެ ތެރެއިން މިހާރު އައްޝައިޚް އަޙްމަދު ސަމީރު ކިޔަވާ ދެއްވަމުންދާ އާޔާތުލް އަޙްކާމް (ގުރުއާން ގައިވާ ފިޤުހީ ހުކުމްތަކާއި ބެހޭ އާޔަތްތަކުގެ ތަފްސީރު) ކުލާހުގެ ދަރުހެކެވެ.

މި ދަރުސް އޮންނާނީ މިރޭ އިޝާ ނަމާދަށް ފަހު އަމީނީ މަގުގައި ހުންނަ ފުރުޤާން މިސްކިތުގައެވެ. މިރޭ ޝެއިޚް ކިޔަވާ ދެއްވާނީ ޖިހާދުގެ ޙުކުމުތަކާއި ބެހޭ ބަގަރާ ސޫރަތުގެ އާއްޔަތްތަކެވެ.

މި ދަރުސް ޖަމްޢިއްޔަތުއްސަލަފުގެ ފޭސްބުކް ޕޭޖުން ވަގުތުން ގެނެސްދޭނެ ކަމަށް އެ ޖަމިއްޔާއިން ބުނެއެވެ.

އައްޝައިޚް އަހްމަދު ސަމީރު ވަރަށް ފަހުން ވެސް ވަނީ ޖަމްޢިއްޔަތުއްސަލަފުގެ މީސް މީޑިޔާ މެދުވެރިކޮށް ފަލަސްތީނުގެ ނަކުބާގެ ހަނދާންތަކާއި ބެހޭ ތާރީޚީ ޢިލްމީ، ދޮޅުގަޑި އިރުގެ، ޚާއްޞަ އޮންލައިން ދަރުހެއް ކުރިއަށް ގެންގޮސްފައެވެ.