ކުރިއަށް އޮތް ތިން އަހަރުގެ ތެރޭގައި، ޙައްޖު ކޯޕަރޭޝަންގެ ހަވާލުގައި ރާއްޖެއިން ޙައްޖުގެ އަޅުކަން އަދާ ކުރުމަށް ކުރާ ދަތުރުގެ އަގު، 50،000 އަށް ކުޑަކުރުމުގެ މަސައްކަތް ކުރަމުން އަންނަކަމަށް ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވެއްޖެވެ.
މިއަހަރުގެ ޙައްޖުގެ މަތިވެރި އަޅުކަން އަދާކުރުމަށްޓަކައި މައްކާއަށް ވަޑައިގެން ހުންނަވައި، “ވޮއިސް” އަށް މައުލޫމާތު ދެއްވަމުން ޝަކީލް ވިދާޅުވީ، ރާއްޖެއިން މީހުން ޙައްޖަށް ދިއުމަށް ރައްޔިތުންކުރާ ހޭދަ ކުޑަކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަރަށް ބޮޑު އެދިވަޑައިގަތުމެއްކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެކެވަޑައިގަންނަވާ ގޮތުގައި ހައްޖަށް ދިޔުމަށް މިހާރު ކަނޑައަޅާފައިވާ އަގަކީ އަޅުކަމަށް ހޭދަކުރަންޖެހޭ ވަރަށްވުރެ ބޮޑު އަގެއް. އެހެންކަމުން އަގު ކުޑަ ކުރުމަށް ހައްޖު ކޯޕަރޭޝަނަކީ ފައިދާވާ ކުންފުންޏަކަށް ހަދައިދެއްވުމަށް ރައީސުލްޖުމްހޫރިއްޔާ އެދުވަޑައިގަންނަވާ
ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް
މިއާއެކު ޝަކީލް ވިދާޅުވީ ރައީސްގެ އެ އެދިވަޑައިގަތުން ހާސިލްކުރުމަށްޓަކައި އެކޯޕަރޭޝަނަކީ ފައިދާވާ ކުންފުންޏަކަށް ހެދުމުގެ މަސައްކަތް ކުރައްވަމުންދާ ކަމަށެވެ. އެގޮތުން ރިއަލްއެސްޓެޓް ވިޔަފާރީގެ ދާއިރާއަށް ވަނުމުގެ މަސަައްކަތް ފަށާފައިވާއިރު އެކަމަށްޓަކައި ހުޅުމާލެއިން ބިމެއް ގަނެ އެތަން ތަރައްޤީކުރުމުގެ މަރުހަލާގައި އޮތްކަން ޝަކީލް ފާހަގަކުރެއްވިއެވެ. އަދި އެކުންފުނިން ޢުމްރާއަށް ގެންދާ މީހުންގެ އަދަދު އިތުރުކުރުމުގެ މަސައްކަތް ފަށާފައިވާ ކަމަށްވެސް ވިދާޅުވިއެވެ.
ޝަކީލް ވިދާޅުވިގޮތުގައި، އެކޯޕަރޭޝަންގެ އަމާޒަކީ، އެއީ ފައިދާވާ ކުންފުންޏަކަށް ހަދައި، ކުރިއަށް އޮތް 3 އަހަރެއްހާ ދުވަހުގެ ތެރޭގައި ޙައްޖު ދަތުރުތަކުގެ އަގު ކުޑަކުރުމަށްކަމަށް ވިދާޅުވިއެވެ.
ޓާގެޓަކީ އަގު ކުޑަކޮށް 3 އަހަރު ތެރޭ 50،000 ރުފިޔާއަށް ދަށް ކުރެވިގެން ދިޔުން.
ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް
ހައްޖު ކޯޕަރޭޝަނުން މިހާރު، މީހުން ހައްޖަށް ގެންދާ އަގަކީ 69,965 ރުފިޔާއެވެ.
Advertisement
This content is created and paid for by advertisers and does not involve Voice Journalists
