ދުނިޔޭގެ ޞިއްޙަތު ޖަމްޢިއްޔާގެ މެންބަރުކަން ފަލަސްޠީނަށް ދޭން ނިންމި ނިންމުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މަރުހަބާ ދަންނަވައިފިއެވެ.
ސުވިޓްޒަލޭންޑުގެ ޖެނީވާގައި ކުރިއަށް ދިޔަ 77ވަނަ ވޯލްޑް ހެލްތު އެސެމްބްލީގައި ވަނީ ދުނިޔޭގެ ސިއްޙަތު ޖަމުޢިއްޔާގެ މެންބަރުކަން ފަލަސްޠީނަށް ދޭން ނިންމާފައެވެ. އެގޮތުން ފަލަސްތީނަށް މެންބަރުކަން ދިނުމަށް ރާއްޖެއިންވެސް ވަނީ ވޯޓު ދީފައެވެ.
ވޯލްޑް ހެލްތު އެސެމްބްލީގައި ނިންމި މި ތާރީޚީ ނިންމުމާއެކު، ވޯޓުލުން ފިޔަވާ، އެހެން ގައުމުތަކަށް ލިބޭ ހުރިހާ ޙައްޤެއް ފަލަސްޠީނަށްވެސް ދުނިޔޭގެ ޞިއްޙަތު ޖަމްޢިއްޔާގައި ލިބިގެންދާނެއެވެ.
މި ނިންމުމަށް މަރުހަބާ ދަންނަވައި ރައީސް މުޢިއްޒު ކުރެއްވި އެކްސްގައި ކުރެއްވި ޕޯސްޓެއއގައި ވިދާޅުވީ، ފަލަސްތީނަށް ދުނިޔޭގެ ސިއްހަތު ޖަމިއްޔާގެ މެންބަރުކަން ދިނުމަށް ރާއްޖެއިން ދިން ވޯޓަކީ، ފަލަސްތީނުގެ ދައުލަތް ބަލައިގަނެ، އެގައުމަށް ބައިނަލްއަގުވާމީ ޖަމިއްޔާތަކުން މެންބަރުކަން ދިނުމަށް ދިވެހިން ގޮވާލަމުންދާ ގޮވާލުމަށް ދިން އިޖާބައެއް ކަމަށެވެ. އަދި ހެލްތު އެސެމްބްލީގެ އެ ނިންމުމަކީ ސުލްހައިގެ މަގަށް އެޅުނު ފިޔަވަޅެއް ކަމަށް ގަބޫލު ކުރައްވާ ކަމަށްވެސް ވިދާޅުވިއެވެ.
ފަލަސްތީނަށް ދުނުޔޭގެ ސިއްހަތު ޖަމިއްޔާވެ މެންބަރުކަން ދިނުމަށް ނިންމި ނިންމުމަށް މަރުހަބާ ދަންނަވައި ސިއްހަތާ ބެހޭ ވުޒާރާގެ ވަޒީރު ޑރ.ޢަބްދުالله ޚަލީލު އެކްސްގައި ކުރެއްވި ޕޯސްޓެއްގައި ވަޒީރު ވަނީ ފަލަސްޠީނުގެ ރައްޔިތުންނަށް ލިބެންޖެހޭ ޙައްޤުތައް ކަށަވަރު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ފުރިހަމަ ލަފާފުޅާއެކު އިސްލާމީ ޤައުމުތަކާއެކު ވާރލްޑް ހެލްތު އެސެމްބްލީގައި ރާއްޖޭން ވަރަށް ބޮޑަށް ވަކާލާތުކޮށްފައިވާނެ ކަމަށް ވިދާޅުވެފައެވެ.
ސްވިޓްޒަރލޭންޑުގެ ޖެނީވާގައި ބޭއްވި ވޯލްޑު ހެލްތު އެންސެމްބުލީގައި ރާއްޖޭގެ ފަރާތުން ސިއްޙީ ވަޒީރު ޚަލީލުވެސް ވަނީ ބައިވެރިވެވަޑައިގެންފައެވެ.
ވޯލްޑް ހެލްތު އެސެމްބްލީގައި ފަލަސްތީނާއި ގުޅޭގޮތުން ނެގި ވޯޓުގައި ރާއްޖެއިން ވަނީ އެޤައުމުގެ ސިއްޙީ ހާލަތު ރަނގަޅު ކުރުމަށް ވޯޓު ދީފައެވެ. 192 ޤައުމެއްގެ ހެލްތު މިނިސްޓަރުން ބައިވެރިވެވަޑައިގެންނެވި މި އެސްމްބްލީގެ މިއަހަރުގެ ޝިއާރަކީ "އޯލް ފޯ ހެލްތު، ހެލްތު ފޯ އޯލް' އެވެ. އެގޮތުން ދުނިޔެއަށް ކުރިމަތިވެފައިވާ ސިއްހީ ގޮންޖެހުންތަކާއި ކުރިމަގުގައި އިސްކަންދޭނެ ދާއިރާތަކާއި ގުޅޭގޮތުން މި ބައްދަލުވުމުގައި ފުޅާ ދާއިރާއެއްގައި ވަނީ މަޝްވަރާކޮށްފައެވެ.
Advertisement
This content is created and paid for by advertisers and does not involve Voice Journalists
