އިންޑިއާގެ ބޮޑުވަޒީރު ނަރެންދުރަ މޯދީއަކީ ހިންދޫ ގޯޑްގެ ވަކި މަގްސަދަކަށްޓަކައި މަތިން ފޮނުވިފައިވާ ފަރާތެއްކަމުގައި އޭނާ ދައުވާ ކޮށްފިއެވެ. އިންޑިއާގައި ހަ ހަފްތާއަށް ދެމިގެންދިޔަ ގާނޫން ހަދާ މަޖިލީހުގެ އިންތިޚާބުގެ ކެމްޕެއިންތެރޭގައި އެންމެފަހުން އޭނާ އެންޑީ ޓީޥީއަށް ދެއްވި އިންޓަވިއުގައި ވިދާޅުވީ އޭނާއަކީ ހިންދޫ ގޯޑަށް ވަރަށް ކުށްތަންވެ އަޅުވެތިވާ ފަރާތެއްކަމުގައެވެ.
" އަހުރެންނަށް އިލްހާމްކޮށްދެވިފައިވަނީ ގޯޑް އަހަރެން ފޮނުވާފައިވަނީ ވަކި މަގްސަދެއްގައިކަމަށް. އެމްގަސަދު ފުރިހަމަވުމުން އަހަރެންގެ ވަޒީފާ އެނިމުނީ"
ނަރެންދުރަ މޯދީއަކީ ހިންދޫއެކެވެ. ހިންދޫދީނުގައި ގޯޑް ނުވަތަ ކަލާނގެތައްކަމަށް ހިންދޫން ގަބޫލުކުރާ އެތައް ބުދުތަކެއް ހިމެނެއެވެ.
އޭނާ ފޮނުވާފައިވަނީ ކޮން މަގްސަދެއްގައިތޯ އެންޑީޓީވީގެ ޕްރެޒެންޓަރ ސުވާލު ދެންނެވުމުން ވިދާޅުވީ ގޯޑްގެ ޕްލޭން އޭނާއަށް ހާމަ ނުކުރާ ކަމަށެވެ.
" ކަންކަން ކުރަން އަހަރެންނަށް މަގުދައްކައިދެނީ. އަހަރެންނަށް ކަނޑައަޅާފައިވާ ޕްލޭނަކީ ކޮބައިކަން އޮޅުން ފިލުވަން އަހަރެންނަށް ސީދާ އޭނާ ( ގޯޑް ) އަށް ޑައިލްކުރަން ޑައިރެކްޓް އެކްސެސްއެއް ނޯވޭ، "
މިދިޔަ މަހުގެ ކުރީކޮޅު ސީއެންއެން ނިއުސް 18 އަށް ދެއްވި އިންޓަވިއުއެއްހައި ވެސް އިންޑިއާގެ ބޮޑުވަޒީރު އޭނާ ހިންދޫ ގޯޑާއި ގުޅިފައިވާކަން ހާމަކޮށްފައިވެއެވެ. އޭނާގެ ބޮޑުވަޒީރުކަމުގައި ދުވަހަކުވެސް ޕްރެސްކޮންފަރެންސެއް ނުދެއްވައެވެ. މިފަހަރު ހުރިހައި މީޑިއާތަކަށް ކަހަލަ ގޮތަކަށް އިންޓަވިއުދެއްވަމުން ވަޑައިގަތެވެ.
ސީއެންއެން އިންޓަވިއުގައި އޭނާ ވިދާޅުވީ އޭނާގެ މަންމަގެ ދުނިޔޭގައި އޭނާ ހީކުރެއްވީ އޭނާއަކީ އޭނާގެ އުފަންވުން ގުޅިފައިވަނީ ބަޔަލޮޖިކަލް ( ވިހެއުމުގެ ) އުފަންވުމެއްގެ ގޮތުގައި ކަމަށެވެ. އެކަމަކު މަންމަ މަރުވުމުން އަމިއްލަ ހަޔާތުގެ ތަޖުރިބާތަކަށް ބަލައިލުމުން އޭނާއަކީ ގޯޑް ވަކި މަގްސަދެއް ހާސިލުކުރުމަށް އުފައްދާފައިވާ އާލާތެއްކަމަށެވެ. ހިންދޫ ގޯޑްތަކާއި އޭނާ ގުޅިފައިވާ މިންވަރު ހާމަކޮށްދިނުމަށްޓަކައި އިންތިޚާބުގެ ކެމްޕެއިންތެރޭގައި ފައްޅިތަކަށް ވަޑައިގެން ގިނަ ހަރަކާތްތަކެއް އޭނާ ހިންގަވާފައިވެއެވެ. އޭނާ ފައްޅިފައްޅިއަށް ވަޑައިގަންނަވާއިރު އިންޑިއާގެ ހުރިހައި ޓީވީ ޗެނަލްތަކުން ލައިވްކޮށް ދައްކާފައި ހުރެއެވެ. ރައްޔިތުން ވޯޓްލަމުންދިޔައިރުވެސް ޓީވީތަކުން އޭނާ ފައްޅީގައި އަޅުކަންކުރަން އިންނަތަން ލައިވްކޮށްފައި ހުރެއެވެ.
އިދިކޮޅު ފަރާތްތަކުން ތުހުމަތުކޮށްފައިވަނީ މިއީ އިންޑިއާގެ އިންތިޚާބުގައި ނިކަމެތިން މަގުފުރައްދައި އޭނާގެ މާތްކަމާއި މަތިވެރިކަމުގެ ޖާދޫގައި ޖެއްސުމަށްޓަކައި ރާވައިގެން ހިންގަވާފައިވާ ޕްރޮޕެގެންޑާ ކެމްޕެއިންތަކެއް ކަމަށެވެ. މޯދީ އަމިއްލަފުޅަށް ތިމަންނާއަކީ ގޯޑް ވަކި މަގްސަދެއްގައި މިބިންމައްޗަށް ފޮނުވާފައިވާ ފަރާތެއްކަމަށް ދައުވާކުރުމުން އިދިކޮޅު ކޮންގްރެސް ޕާޓީގެ ލީޑަރ ރާހުލް ގާނދީ އެކަމަށް ޖޯކް ޖައްސަވައި ވިދާޅުވީ ގޯޑް، މޯދީ ފޮނުވާފައިވަނީ އިންޑިއާގެ ނިކަމެތި ފަގީރުންނަށް އެހީވުމަށް ނޫންކަމަށާއި މަހްޖަނު އަދާނީއަށް އެހީވުމަށް ކަމަށެވެ. ކޮންމެ މީހަކީވެސް ވިހާފައިވާ މީހެއްކަމަށާއި އެކަމަކު މޯދީ ބުނާގޮތުން އޭނާއަކީ އުފަންނުވާ މީހެއްކަމަށެވެ.
އިންޑިއާގެ ވޯޓްލާ ރައްޔިތުންގެތެރޭގައި ގިނައީ ލިޔަންކިޔަން ނުދަންނަ ފަގީރު ނިކަމެތިންނެވެ. އާބާދީގެ 80 އިންސައްތަ މީހުންނަކީ ހިންދޫ ބުދުތަކަށް އަޅުކަންކުރާ މީހުންނެވެ. މޯދީގެ ޕާޓީއަކީ ހިންދޫ ދީން ކުރިއަރުވައި އެހެންދީންތަކުގެ މީހުންނާއި ދެކޮޅު ހަރަކާތްތައް ޕްރޮމޯޓްކުރުމުގެ ވަރުގަދަ އެޖެންޑާއެއް ތަންފީޒުކުރަމުންދާ ޕާޓީއެއްގެ ގޮތުގައި މީހުންނަށް ދައްކާ ޕާޓީއެކެވެ. އެޕާޓީއަކީ ހިންދޫންގެ ހައްދުފަހަނައަޅާފައިވާ ފިކުރު ކުރިއަރުވާ މުޅި އިންޑިއާ ހިންދޫކުރުމުގެ އެޖެންޑާއެއް ގެންގުޅޭ ޕާޓީއެއްގެ ގޮތުގައިވެސް ތުހުމަތު ކުރެވިފައިވެއެވެ. މިފަހަރު ކެމްޕެއިންތެރޭގައި ބީޖޭޕީގެ ތާއީދު ދަށްވެދާނެކަމަށް ފެނިގެން އިންޑިއާގެ ހުރިހައި މީޑިއާއެއް ކޮންޓްރޯލްކޮށް މާ ވަރުގަދައެއްކޮށް ދީނީ ކާޑު ބީޖޭޕީން ކުޅުނެވެ.
އިންޑިއާގައި ހަތް ފިޔަވައްސަކަށް ކުރިއަށް ދިޔަ ޕާލަމެންޓްރީ އިންތިޚާބު މިހާރުވަނީ ނިމިފައެވެ. އިންތިޚާބުގެ ނަތީޖާ އިއުލާން ކުރާނީ މިމަހުގެ ހަތަރުވަނަ ދުވަނުން ފެށިގެންނެވެ. އެކަމަކު އެކްސިޓް ޕޯލްތައް ދައްކާގޮތުން އިންތިޚާބު ކާމިޔާބު ކުރިކަމަށް މޑީއާތަކުން ބުނަމުންދަނީ ބީޖޭޕީއެވެ.
Advertisement
This content is created and paid for by advertisers and does not involve Voice Journalists
