އޯ ލެވެލްގައި އިސްލާމް، ދިވެހި، ހިސާބު އަދި އިނގިރޭސި މާއްދާ މަޖުބޫރު މާއްދާތަކަށް ހަދަން އަމިއްލަ ސުކޫލްތައް ހިމެނޭހެން ހުރިހާ ސްކޫލްތަކަށް އެޑިއުކޭޝަން މިނިސްޓްރީން އަންގައިފިއެވެ.

އެޑިއުކޭޝަން މިނިސްޓްރީން ހުރިހާ ސްކޫލްތަކަށް ފޮނުވި ސާކިއުލާއެއްގައި ބުނީ ރާއްޖޭގެ ސްކޫލްތަކުން ތައުލީމު ހާސިލުކޮށްގެން ނުކުންނަ ކޮންމެ ދަރިވަރަކީ ތައުލީމީ ގޮތުން ހާސިލުކުރަން ކަނޑައަޅާފައިވާ ވަކި މިންވަރެއް ހާސިލުކޮށްފައިވާ ދަރިވަރުންނަށް ވާން ޖެހޭ ކަމަށެވެ.

އެގޮތުން ގްރޭޑް 10އާ އެކު ސާނަވީ ތައުލީމު ނިންމާ އިމްތިހާނުތަކުގައި ބައިވެރިވާ ދިވެހި ނަސްލުގެ ކޮންމެ ދަރިވަރަކު މަޖުބޫރު ހަތަރު މާއްދާ، އިސްލާމް، ދިވެހި، އިނގިރޭސި އަދި ހިސާބުގައި ބައިވެރިވާން ވާނެ ކަމަށް އެ ސާރކިއުލާގައި ބުނެފައިވެއެވެ.

Advertisement

ސާކިއުލާގައި ބުނެފައިވަނީ އެއީ 22 ޖެނުއަރީ 2020ގައި ވެސް މިނިސްޓްރީން ނެރުނު ސާކިއުލާއަކުން ދީފައިވާ އިރުޝާދެއް ކަމަށާއި ދިވެހި ނަސްލުގެ ހުރިހާ ދިރިވަރުން ވެސް މަޖުބޫރު ހަތަރު މައްދާގައި ބައިވެރިވުމަކީ އެ މިނިސްޓްރީގެ ސިޔާސަތެއް ކަމަށެވެ. 

މިނިސްޓްރީން އިތުރަށް ބުނީ، ހުރިހާ ދަރިވަރުން ޝާމިލުކޮށްގެން އުނގަންނައިދިނުމުގެ އުސޫލުގެ ތެރެއިން ފާހަގަކުރެވޭ ދަރިވަރުންނާ މެދު ވަކި ގޮތެއް ނިންމާނީ މިނިސްޓްރީގެ މަޝްވަރާގެ މަތިން ކަމަށެވެ.

މިނިސްޓްރީގެ މި ސިޔާސަތު ދަރިވަރުންނާއި ބެލެނިވެރިންނަށް ސްކޫލްތަކުން ހިއްސާކޮށް އަދި ހުރިހާ ދަރިވަރުން އިމްތިހާންތަކުގައި ބައިވެރިވާކަން ކަށަވަރުކުރަން ވެސް އެޑިޔުކޭޝަން މިނިސްޓްރީން އަންގާފައިވެއެވެ.