މޯލްޑިވްސް މީޑިއާ ކައުންސިލުގެ މެންބަރުންނާއި ނޫސްވެރިންތަމްރީނު ދަތުރެއްގައި ޕާކިސްތާނަށް މިއަދު ފުރައިފިއެވެ.

03 ޖޫން 2024 އިން 10 ޖޫން 2024 ގެ ނިޔަލަށް ކުރިއަށް ދާ މި ތަމްރީނު ދަތުރަކީ، ދިވެހި ނޫސްވެރިން ތަމްރީނުކުރުމަށް، މޯލްޑިވްސް މީޑިއާ ކައުންސިލް، އެމްއެމްސީން ކުރަމުން ގެންދާ މަސައްކަތްތަކުގެ ތެރެއިން، ޕާކިސްތާނުގެ އެމްބަސީއާއެކުވެފައިވާ މަޝްވަރާތަކުގެ ދަށުން އެ ޤައުމުން ދީފައިވާ ފުރުސަތެއް ކަމަށް އެ ކައުންސިލުން ބުނެއެވެ. 

​​​ޕާކިސްތާނުގެ ވެރިރަށް އިސްލާމްއާބާދުގައި ހުންނަ "އިންފޮރމޭޝަން ސަރވިސް އެކަޑަމީ" ގައި ކުރިއަށް ގެންދާ މި ތަމްރީނު ޕްރޮގްރާމްގައި، މީޑިއާ ކައުންސިލުގެ ފަރާތުން ބައިވެރިވަނީ، ކައުންސިލުގެ ރައީސް އަޙްމަދު މުސްޠަފާގެ އިތުރުން މީޑިއާ ތަމްސީލުކުރައްވާ  މެންބަރުންކަމުގައިވާ މެންބަރު މޫސާ ރަޝީދު، މެންބަރު މުޙައްމަދު ސިމާޢު އަދި މެންބަރު މުޙައްމަދު އަފްރާހްއެވެ. އަދި މީޑިއާތަކަށް ހުޅުވާލި ފުރުސަތުގައި ނޮމިނޭޓްވެފައިވާ ނޫސްވެރިޔާ އިބްރާހިމް ސަނީހްވެސް މި ދަތުރުގައި ބައިވެރިވެއެވެ. 

​​​އެމްއެމްސީން ބުނެފައިވާ ގޮތުން މި ދަތުރުގައި ތަމްރީނުތަކުގެ އިތުރުން އެ ޤައުމުގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިންގ ގެ އިސްވެރިންނާ ބައްދަލުކުރުމާއި، މީޑިއާއާ ގުޅުންހުރި މުހިންމު ތަންތަނަށް ޒިޔާރަތްކުރުންވެސް އޮންނާނެއެވެ. 

ޕާކިސްތާނަށް ދިވެހި ނޫސްވެރިން ފޮނުވައިގެން ތަމްރީނުޕްރޮގްރާމްތަކެއް ހިންގުމަށާއި، ޕާކިސްތާންގެ ތައުލީމީ ޚިދުމަތްދޭ މަރުކަޒުތަކުގެ މާހިރުންދިވެހިރާއްޖެ ގެނެސްގެން ތަމްރީނު ޕްރޮގްރާމްތަކެއް ފެއްޓުމަށާއި، އަދި ކުރު މުއްދަތާއި ދިގުމުއްދަތުގެ ސްކޮލާޝިޕް ޕްރޮގްރާމްތަކެއް ނޫސްވެރިންނަށް ހޯދައިދިނުމާ ގުޅޭގޮތުންދިވެހިރާއްޖޭގައި ހުންނަވާ ޕާކިސްތާން އެމްބަސެޑަރ ވައިސް އެޑްމިރަލް (ރިޓަޔާޑް) މުޙައްމަދު ފައްޔާޒް ގިލާނީއާ އެކު މީޑިއާ ކައުންސިލުން މަޝްވަރާކޮށްފައިވަނީ 12 މެއި 2024ގައެވެ.

އަދި މޯލްޑިވްސް މީޑިއާ ކައުންސިލާއި ޕާކިސްތާންގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިން އާއި ދެމެދު މިހާރު ކުރިއަށްދާ ދަތުރުގެ ތެރެއިން ފަހުމުނާމާއެއްގައި ސޮއިކުރުމަށް މަޝްވަރާކުރުމަށް ހަމަޖެހިފައިވާ ކަންވެސް އެމްއެމްސީން ފާހަގަކުރެއެވެ.