ނިމިދިޔަ، އެމްޑީޕީ މެޖޯރިޓީ އޮތް 19 ވަނަ ރައްޔިތުންގެ މަޖިލީހުން، ބިމާއި ބެހޭ ގާނޫނު ފާސްކޮށްފައި އޮތީ، އެމްޑީޕީ ސަރުކާރުގައި ރައްޔިތުންނަށް ކަނޑު ފަޅުން ގޯތި ދިން އުސޫލުން ކަމަށް ހެންވޭރު ދެކުނު ދާއުރާގެ މެންބަރު ހުސައިން އިމްރާން ލަތީފް (އިއްމު) ވިދާޅުވެއްޖެއެވެ.
ސަރުކާރުން ރައްޔިތުންނަށް ދޭންޖެހޭ ގޯތިތައް ވަކި މުއްދަތެއްގެ ތެރޭ އަަވަހަށް ދޫކުރަން ލާޒިމުވާ ގޮތަށް ބިމާބެހޭ ޤާނޫނަށް އެމްޑީޕީން އިސްލާހު ހުށަހެޅި ނިމިދިޔަ 19 ވަނަ ރައްޔިތުންގެ މަޖިލީހުން ފާސްކުރީ އޭޕްރީލް މަހުގެ 29 ގައެވެ. އޭރު އެ ބިލު ފާސްކުރީ އެމްޑީޕީ މެންބަރުންގެ އަޣުލަބިއްޔަތު ކޮންޓްރޯލްކުރި މަޖިލީހުންނެވެ.
އެ ބިލް ފާސްކޮށް ރައީސަށް ފޮނުއްވުމުން ރައީސް ޑރ. މުޙައްމަދު މުއިއްޒު ވަނީ އެ ބިލް ތަސްދީގު ނުކުރައްވައި މިދިޔަ މަހުގެ 16 ވަނަ ދުވަހު އަނބުރާ ފޮނުވާލައިފައިވާއިރު މިއަދު އޮތް ވިހިވަނަ ރައްޔިތުންގެ މަޖިލީހުގެ ތިންވަނަ ޖަލްސާގައި އެ ބިލަށް ބަހުސް ކުރައްވަމުން މެންބަރު އިމްރާން ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒަކީ ހައިސިއްޔަތެއް ލިބިލެއްވި ކޮންމެ ފަހަރަކު ރައްޔިތުންނަށް ކުރިމަތުވެފައިވާ އެންމެ ބޮޑު މައްސަލަ، ބޯހިޔާވަހިކަމުގެ މައްސަލަ ހައްލު ކުރެއްވުމަށް މަސައްކަތް ކުރެއްވި ބޭފުޅެއް ކަމަށެވެ.
އެގޮތުން، ހައުސިން މިނިސްޓަރ ކަމުގައި ހުންނަވައި، ބިން ހިއްކައި ބޯހިޔާވަހިކަމުގެ މައްސަލަ ހައްލުކުރަން މަސައްކަތް ކުރެއްވުމަށް މަހާ ޖައްރާފް ގެނެސް މަސައްކަތް ފެއްޓެވި ކަމަށާ، މާލޭ މޭޔަރ ކަމުގައި ހުންނަވައިގެންވެސް އެ މަސައްކަތް ކުރިއަށް ގެންދެވި ކަމަށް އޭނާ ވިދާޅުވިއެވެ. އެހެން ނަމަވެސް، އޭރުގެ ސަރުކާރުގެ ފިއްތުންތަކާއި ހުރެ އެކަމަށް ގޮންޖެހުންތަކާއު ކުރިމަތިލާން ޖެހިވަޑައިގެންނެވިކަން އިމްރާން ފާހަގަ ކުރެއްވިއެވެ.
ހައިސިއްޔަތެއް ލިބިލެއްވި ކޮންމެ ފަހަރަކު ރައީސް ޑރ މުހައްމަދު މުއިއްޒު ވަނީ އަޅުގަނޑުމެންނަށް ގޯތިގެދޮރުގެ ފަސޭހަކމާއި ގޯތި ގެދޮރު ދިވެހިންނަށް ހަމަހަމަ އުސޫލެއްގެ ތެރެއިން ލިބޭނެ މަގަށް މަސައްކަތް ކުރައްވާފައި
ހުސައިން އިމްރާން ލަތީފް (އިއްމު)
މިއާއެކު އިމްރާން ވަނީ ނިމިދިޔަ ސަރުކާރުގައި ބޯހިޔާވަހިކަމުގެ މައްސަލަ ހައްލުކުރަން މަސައްކަތް ކުރީ އިންތިޚާބަށް ކަޑަ ޖަހާ އުސޫލުން ކަމަށާ، ބިމާއި ބެހޭ ގާނޫނަށްވެސް އެމްޑީޕީ މެޖޯރިޓީ އޮތް މަޖިލީހުން އިސްލާހު ގެނައީ ކަނޑުފަޅުން ގޯތި ދިން އުސޫލުން ކަމަށް ވުދާޅުވެ އެ ސަރުކާރާއި ނިމިދޔަ މަޖިލީހަށް ފާޑުވުދާޅުވެފައެވެ.
މި ގާނުނުވެސް، (ބިމާއިބެހޭ ގާނޫނު) 19 ވަނަ މަޖިލީހުން ފާސްކޮފައިވަނީ ހަމަ ކަނޑުފަޅުން ގޯތި ދިން އުސޫލުން. ކޮޅެއް މެދެއް ނުފެނޭ. އެހެންވީމާ މި ގާނުނު އަޅުގަނޑަށް ފެންނަނީ މުރާޖާ ކުރަން، ނޫނީ މަޖިލީހުން ބޭރުކުރަން.
ހުސައިން އިމްރާން ލަތީފް (އިއްމު)
އިމްރާން ވަނީ، ބިމާއި ބެހޭ ގާނޫނު މަޖިލީހުން ބޭރުކޮށް އަލުން ރައްޔިތުންނަށް ފައިދާ ވާނެ ގޮތަށް އައު އިސްލާހެއް 20 ވަނަ މަޖިލީހަށް ހުށަހަޅައިގެން ފާސްކުރުމަށް އެދިވަޑައިގެންފައެވެ.
Advertisement
This content is created and paid for by advertisers and does not involve Voice Journalists
