ފަލަސްތީނާއި މިސްރު ގުޅޭ ސަރަހައްދީ އިމުގައިވާ ރަފަޙް ހުރަސް އަލުން ހުޅުވޭނީ އިސްރާއީލުން އެސަރަހައްދުން ފަހަތަށް ޖެހުމުންކަމަށް މިސްރުން ބުނެފިއެވެ.
އިސްރާއީލާއި މިސްރު އަދި އެމެރިކާ ބައިވެރިވެގެން، ސަރަހައްދީ ރޮނގު ހުޅުވާލުމާ ގުޅޭ މަޝްވަރާތަކެއް އިއްޔެ މިސްރުގެ ވެރިރަށް ޤާހިރާގައި ކުރިއަށްދިޔައެވެ.
ވަކިގޮތަކަށް މި ބައްދަލުވުމުގައި ނިމިފައި ނުވިނަމަވެސް، މިސްރުން ވަނީ އިސްރާއީލުން ސަރަހައްދީ އިމުގެ ފަލަސްތީން ފަޅިން ދުރަށް ނުޖެހެނީސް ސަރަހައްދީ އިން ހުޅުވާނުލާނެކަމަށް ތަކުރާރުކޮށް ބުނެފައެވެ.
ޣައްޒާގެ ދެކުނުގައި، މިސްރާއި އިންވެގެން އޮންނަ ރަފަޙް ބޯޑަރު އިސްރާއީލުން ހިފީ މިހާރު ޔަހޫދީ ސިފައިން ފަލަސްތީނުގައި ހިންގަމުންދާ ޢުދުވާނުގައި، މިދިޔަ މެއި މަހުއެވެ. އެއާއެކު ޣައްޒާއަށް އެހީ ފޮނުވުމަށް އޮތް ހަމައެކަނި މަގު ބަންދުވިއެވެ.
އެހެންނަމަވެސް މިދިޔަ ހަފްތާގައި މިސްރުން ވަނީ ޣައްޒާއާއި އިންވެގެން، އިސްރާއީލުން ވެރިވެގެންފައިވާ ބިމުގައި އޮންނަ ކެރެމް ޝަލޮމް ހުރަސް މެދުވެރިކޮށް ޣައްޒާއަށް އެހީ ފޮނުވާފައެވެ. ބައިނަލްއަޤްވާމީ އެހީދޭ ފަރާތްތަކުން ވަނީ ރަފަޙް ހުރަސް ހުޅުވާނުލައިފިނަމަ ޣައްޒާގެ ޙާލަތު އިތުރަށް ގޯސްވާނެކަމުގެ އިންޒާރު ދީފައެވެ.
ފަލަސްތީނުގެ އޮފިޝަލުން އަލުން ރަފަޙް ހުރަސް ބަލަހައްޓަން ފެށުމުން، އެތަން ހިނގާގޮތް ބެލުމަށް ވިލާތުގެ އިއްތިޙާދުގެ މޮނީޓަރުންނަށް ފުރުސަތު ދިނުމަށް ތައްޔާރަށް ތިބިކަމަށްވެސް މިސްރުން ވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
