ބަންޑާރަ ގޯތި ލިބޭ މީހުންގެ ދާއިމީ ލިސްޓް ގެޒެޓުގައި ޝާއިއުކުރާ ތާރީހުން ފެށިގެން ތިން މަސް ދުވަހުގެ ތެރޭގައި ފަރާތްތަކާއި ގޯތި ހަވާލުކުރަންޖެހޭ ކަމަށް ބުނެ ގާނޫނަށް އިސްލާހު ގެނައުމަށް ހުށަހެޅި ބިލު ރައްޔިތުންގެ މަޖިލީހުން ބޭރު ކުރީ އެ ބިލުގައި ވަކި ކަމަކަށް ޓާގެޓް ކޮށްފައި އޮތުމުން ކަމަށާއި، މި ކަމުގެ ސަބަބުން ގޯތި ލިބުމަށް ހުރަހެއް ނޭޅޭނެކަމަށް ޕީއެންސީ އިން ބުނެފިއެވެ.

ޕީއެންސީގެ ޕީޖީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން، މަނަދޫ ދާއިރާގެ މެންބަރު ހުސްނީ މުބާރަކް ވިދާޅުވީ މި ނިންމުމާއި އެކު،  ރައްޔިތެއްގެ އަސާސީ ހައްގަކަށް އަސަރު ނުކުރާނެކަމަށެވެ. އަދި މިހާރުވެސް ބިމާ ބެހޭ ގާނޫނު އޮތް ގޮތުން އެ ގާނޫނުގެ ދަށުން ގޯތީގެ ރަޖިސްޓްރީ ދޫކުރަމުންދާކަމަށާއި، ބިލު ބޭރުކުރިޔަސް އެ ރަޖިސްޓްރީތައް ދޫކުރުމަށް އެއްވެސް ހުރަހެއް ނެތްކަމަށް ހުސްނީ ވިދާޅުވިއެވެ.

ހުސްނީ އިތުރަށް ވިދާޅުވީ، މި އިސްލާހު އެންމެ ފަހު ވަގުތު 19 ވަނަ މަޖިލީހުން ހުށަހަޅައިގެން ފާސްކޮށްފައި އޮތްއިރު ތިން މަސް ތެރޭގައި ވަކި ރަޖިސްޓްރީ ތަކެއް ދޫކޮށްފައި އޮތް އޮތުން އެއީ ހެޔޮ ނިޔަތެއްގައި ކޮށްފައި އޮތް ކަމެއްތޯ ބަލަން ޖެހޭ ކަމަށެވެ. އަދި ބިލު މަޖިލީހުން ބޭރު ކުރުމަށް ނިންމީ ވަކި ކަމަކަށް ޓާގެޓްކޮށްގެން ފާސްކޮށްފައި އޮތް ބިލަކަށްވާތީ، އޭގެ ސަބަބުން ފުށުއަރާ އެތައް ކަންތައްތަކެއް ހުރުމުން ކަމަށެވެ.

ހުސްނީގެ އިތުރުން، ޕީއެންސީ ޕީޖީ ގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހް ވިދާޅުވީ، ގިނަ އަދަދެއްގެ ގޯތި ދީފައި ހުރީ އަދި ނުހިއްކާ ބިންތަކުން ކަމަށްވާއިރު، އެކަމުގައި ގާނޫނާއި ފުށުއަރާ ކަންތައްތަކެއް އެބަ ހުރި ކަމަށެވެ. އަދި އެކަމަށް ހައްލެއް ހޯދުމަށް ބިމުގެ ބިލްގެ ނަމުގައި މި ސަރުކާރުން އާ ބިލެއް ހުށަހަޅާފައިވާ ކަަމަށާއި އެ ބިލް މެދުވެރިކޮށް މިހާރު ގޯތި ލިބިފައި ހުރި ފަރާރްތަކަށް އަދި ފްލެޓްތަކާއި، ކޮންމެ ސަރުކާރަކުން ގޯތި ދިނަސް ރައްކާތެރިވެގެން ދާނެކަމަށް ފަލާހް ވިދާޅުވިއެވެ.

ބިމާއި ބެހޭ މި ބިލު ހުށަހަޅުއްވާފައިވަނީ ނިމިދިޔަ 19 ވަނަ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމެވެ. 35 މެންބަރުންގެ ވޯޓުން ބިލު ފާސްކުރުމަށް ފަހު ތަސްދީގުކުރުމަށް ރައީސުލްޖުމްހޫރިއްޔާ އަށް ފޮނުއްވުމުން އެމަނިކުފާނު ވަނީ ބިލު ތަސްދީގު ނުކުރައްވާ އަނބުރާ މަޖިލީހަށް ފޮނުއްވާފައެވެ.