ނިސްބަތްވާ ވަކި ރަށަކަށް އިސްކަން ދިނުމުގެ ބަދަލުގައި، ބަންޑާރަ ގޯތި ނެތް ކޮންމެ ދިވެއްސަކަށް ގޯތި ލިބެންޖެހޭ ކަމަށް މަނަދޫ ދާއިރާގެ މެންބަރު ހުސްނީ މުބާރަކު ވިދާޅުވެއްޖެއެވެ.
މިއަދު ޕީއެންސީ ޕީޖީ އިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ހުސްނީ ވިދާޅުވީ، މި ސަރުކާރުގެ ސިޔާސަތަކީ ހަމައެކަނި މާލެ ތޮއްޖެއްސުމުގެ ބަދަލުގައި، އާބަން ސެންޓަރުތަކެއް ރާއްޖޭގެ އެކި ކަންކޮޅުތަކުގައި ގާއިމުކުރުން ކަމަށެވެ.
"އަޅުގަނޑުމެންނަށް މިހާރު ފެނިގެން ދަނީ މާލެއިން ގޯއްޗަށް އެޕްލައިކުރެވިގެން މިދަނީ މާލެ ރައްޔިތުންނަށް. ތުރާކުނުން ތުރާކުނު ރައްޔިތުންނަށް އިސްކަންދޭން އެބަ ޖެހޭ. އެ ރަށަކުން އެ ރަށެއްގެ ރައްޔިތުންނަށް އިސްކަންދޭން ޖެހޭ. އެހެންނަމަވެސް އަޅުގަނޑު ގަބޫލުކުރަން ބަންޑާރަ ގޯތި ނެތް ކޮންމެ ދިވެއްސަކަށް ގޯތި ލިބެންޖެހޭ ކަމަށް. އެއީ ވަކި އެ މީހަކު ނިސްބަތްވާ ރަށަކުން އިސްކަންދެވިގެން ނުވާނެ،"
ހުސްނީ ވިދާޅުވިއެވެ.
މިއަދު ރައްޔިތުންގެ މަޖިލީހުގެ ޖަލްސާގައި ވެސް ބަހުސް ކުރައްވަމުން ހުސްނީ ވަނީ ބިމާއި ބެހޭ ގާނޫނަށް އިސްލާހެއް ހުށަހަޅައި، ވަކި މުއްދަތެއްގެ ތެރޭގައި ގޯތިތައް ހަވާލު ކުރަން ލާޒިމު ކުރާއިރު، ފުރަތަމަ ގޯތިތައް ދޫކުރީ ބިމާއި ބެހޭ ގާނޫނާއި އެއްގޮތަށްތޯ ސުވާލު އުފައްދަވާފައެވެ.
ބަންޑާރަ ގޯތި ދޫކުރުމުގައި ދާއިމީ އެޑްރެހަށް ބަލާ ބެލުން ދޫކޮށްލަން ޖެހޭ ކަމަށާއި، ރަށަކުން ބަންޑާރަ ގޯއްޗަށް ހުޅުވާލުމުން، ރަށްވެހިންނަށް އިސްކަންދޭ ދިނުން ނިމުމަކަށް ގެނެސް ގޯތި ނެތް ދިވެހި ކޮންމެ ރައްޔިތަކަށް ވެސް ރާއްޖޭގެ ބިމުން ބަންޑާރަ ގޯއްޗަށް ކުރިމަތިލުމުގެ ހައްގު ލިބިދޭ ގޮތަށް ގާނޫނަށް އިސްލާހު ގެންނަން ޖެހޭ ކަމަށް ހުސްނީ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
