އިންޑިއާގެ މިއަހަރުގެ ލޯކްސަބާ އިންތިޚާބުގައި ތިންވަނަ ޓާމަކަށް ބޮޑުވަޒީރު ނަރެންދުރަ މޯދީ ހޮވިވަޑައިގެންފިކަމަށް އިންތިޚާބީ ނަތީޖާ ދެއްކިނަމަވެސް އިންތިޚާބަށްފަހު ނެގި އެކްޒިޓް ޕޯލްތަކުން ބީޖޭޕީ ބޮޑުތަކުން ކާމިޔާބުކުރާނެކަމަށް ދެއްކިދެއްކުން ދިމާނުވެ އިންޑިޔާގެ ހިންދޫންގެ ބައިބޯތަންތަނުން ބީޖޭޕީއަށް ހީވެސް ނުކުރާފަދަ ބޮޑު ނާކާމިޔާބެއް ކުރިމަތިވެއްޖެއެވެ. އަދި ސަރުކާރެއް އުފެއްދުމަށް ބީޖޭޕީއަށް ފުރުސަތު ލިބުނު ނަމަވެސް މިއީ އެޕާޓީއަށް ސަރުކާރެއް އުފެއްދުމަށް ބޭނުންވާ ވަރަށް ގޮނޑި ނުލިބި އެހެން ޕާޓީތަކާއި ގުޅިގެން ސަރުކާރެއް އުފެއްދުމަށް ޖެހުނު ފުރަތަމަ ފަހަރުވެސް މެއެވެ.

އިންތިޚާބުގައި އިންޑިއާގެ ރައްޔިތުން ވޯޓްލަމުންދިޔައިރު ބޮޑުވަޒީރު މޯދީ ގެންދެވީ އޭނާއަކީ ހިންދޫ އިލާހު މަތިން ޚާއްސަ މަގްސަދެއް ފުރިހަމަކުރުމަށް މިދުނިޔެ މައްޗަށް ފޮނުވާފައިވާ ފަރާތެއްކަމަށް ދައުވާ ކުރަމުން އިންޑިއާގެ އާބާދީގެ 80 އިންސައްތަ ނިސްބަތްވާ ހިންދޫގެ ހިތް އޭނާއަށް އަނބުރުވާލެވޭތޯ ވަރުގަދަ ޕްރޮޕެގެންޑާ ކެމްޕޭނެއް ކުރައްވަމުންނެވެ. އެކަމަކު އިންތިޚާބުގެ ނަތީޖާ އިއުލާން ކުރިއިރު އިންޑިއާގެ ހިންދޫން އެންމެ ގިނަ އުއްތަރަ ޕްރަދޭޝްއިން ލިބުނީ ނާކާމިޔާބެވެ. އުއްތަރަ ޕްރަދޭޝައަކީ މޯދީއަށްފަހު ދެން ބީޖޭޕީގެ ވެރިކަމަށް އަންނާނެ ކަމަށް ގިނަ މީހުން ބަލާ ހަރުކަށި ޔޯގީއަދިތުޔާނާތު ޗީޕް މިނިސްޓަރުކަން ކުރާ ސްޓޭޓެވެ. އެސްޓޭޓްގައި އިސްލާމުންނަށް ވަރަށް އިހާނެތިކޮށް ހިތައި އެތައްބަޔަކު ދިރިތިއްބައި އަންދައި ހަދާފައިވެއެވެ. އުއްތަރަޕްރަދޭޝްގެ ރައްޔިތުން މި އިންތިޚާބުގައި ބީޖޭޕީ ކުޅުނު ދީނީކާޑާއި ހިންދޫ ވަތަނީ ކާޑު ބޮލާލާޖަހައި އެސްޓޭޓްގެ ބާރުދިނީ ކޮންގްރެސް ގުޅިފައިވާ އިންޑިއާ އެލަޔަންސަށެވެ. އެންމެ ހައިރާންވީ އަޔޯދިޔާގެ މިސްކިތް ތަޅައިލައި އެތާގައި އާދަޔާއި ޚިލާފް ބޮޑު ފައްޅިއެއް އެޅި ހިސާބުގައިވެސް ރައްޔިތުން ބީޖޭޕީއަށް ވޯޓް ނުދިން ކަމެވެ. ބީޖޭޕީ ވެރިކަންކުރި ހަރިޔާނާ ސްޓޭޓާއި ރާޖަސްތާން ސްޓޭޓްގައިވެސް ކުރިމަތިވީ ނާކާމިޔާބެވެ.

މި އިންތިޚާބުގައި ބީޖޭޕީ ކެމްޕެއިން މޮޓޯއަކަށް ހެދީ މޯދީސަރުކާރު ޔަގީން އެވެ. ހުރިހާއެއްޗަކީ މޯދީއެވެ. މޯދީއަކީ ކަލާނގެފަދަ މާތް މީހެކެވެ. މޯދީއަކީ އިންޑިއާއެވެ. އިންޑިއާއަކީ މޯދީއެވެ. މޯދީއަކީ އިންޑިއާގެ ތަރައްގީއެވެ. ތަރައްގީއަކީ މޯދީއެވެ. ކެމްޕެއިންގައި މޯދީ ޔަގީންކަމާއެކު ވިދާޅުވަމުން ގެންދެވީ ލޯކްސަބާގެ 543 ގޮނޑީގެތެރެއިން 400 ގޮނޑި ބީޖޭޕީން ނަގާނެ ކަމަށެވެ. އެކަމަކު އެޕާޓީއަށް ލިބުނީ 239 ގޮނޑިއެވެ. މިއީ އެޕާޓީއަށް އެކަނި ސަރުކާރެއް އުފެއްދުމަށް ބޭނުންވާ މެޖޯރިޓީއަށްވުރެ ދަށް އަދަދެކެވެ. ސަރުކާރެއް އުފެއްދެނީ އެޕާޓީއާއި ގުޅިފައިވާ ކޯލިޝަނާއެކު ލިބުނު 292 ގޮނޑިންނެވެ. ކޮންގްރެސް ހިމެނޭ އިންޑިއާ އެލަޔަންސަށް ލިބިފައިވަނީ 232 ގޮނޑިއެވެ.

އިންޑިއާގެ އިދިކޮޅު ޕާޓީތަކުން ސިފަކުރާ ގޮތުގައި މޯދީއަކީ އިންޑިއާގެ ފަހުގެ ތާރީޚްގައި އުފެދުނު އެންމެ ޚުދު މުޚްތާރު ލީޑަރެވެ. އިންޑިއާގެ ސަލާމަތީ އިދާރާތަކާއި މިނިވވަން ހުރިހާ މުއައްސަސާތަކެއް އޭނާވަނީ ކޮންޓްރޯލް ކުރައްވާފައެވެ.  އިދިކޮޅު އެތައް ލީޑަރުންނެއް އެކި ތުހުމަތުގައި  އިންތިޚާބާއި ކުރިމަތިވިއިރު ވަނީ ޖަލަށް ލާފައެވެ. އެކަމަކު އުޑުގައި އލިގަދަކޮށް ފިޔަޖަހަމުންދިޔަ މޯދީގެތަރި މިއިންތިޚާބުގައި ވަނީ އަލިކަން ފަނޑުވެފައެވެ. ރައްޔިތުން ވޯޓްދޭން އިސްކަންދިނީ ވަތަނީ ކާޑާއި ދީނީ ކާޑުގެ ބަދަލުގައި ވަޒީފާ ނެތުމާއި ކާބޯތަކެތީގެ އަގު މަތިވުމުގެ މައްސަލައަށެވެ.

އިންޑިއާގެ މުޙައްލިލުން ބުނާގޮތުގައި މުޅި އިންތިޚާބަށް ބަލާއިރު އެންމެ ބޮޑު ކާމިޔާބެއް ހޯދީ ކޮންގްރެސް ޕާޓީއެވެ. އެޕާޓީގެ ލީޑަރ ރާހުލް ގާނދީއެވެ. އިންޑިއާގެ ޕޮލިޓިކްސްގައި ރާހުލް ގާނދީގެ އަގުވައްޓައިލުމަށްޓަކައި " ޕައްޕޫ" " ޝަހެޒާދާ" އޭ ކިޔައި ވަނަން ހަރުކޮށް މިހާތަނަށް ބީޖޭޕީން ކުޅުނު ކުޅިގަނޑު ރައްޔިތުން ބަލައި ނުގަނެ އޭނާ ވާދަ ކުރެއްވި ދެ ދާއިރާއިންވެސް ބޮޑު ތަފާތަކުން މިފަހަރު ބީޖޭޕީގެ ކެންޑިޑޭޓުން ބަލިކޮށްފައިވެއެވެ. މިއިންތިޚާބަކީ ބީޖޭޕީގެ ވެރިކަމުގައި ފުރަތަމަ ފަހަރަށް އިންޑިއާގައި ޕާލަމެންޓަށް ބާރުގަދަ އިދިކޮޅު ޕާޓީއެއް އަންނަ ފަހަރެވެ.

އެކަމަކު ބީޖޭޕީގެ ވެރިކަމުގައި މިހާތަނަށް ފެނުނު މަންޒަރަކީ އެޕާޓީއަކީ އިދިކޮޅު ޕާޓީތަކުގެ ސްޓޭޓް ސަރުކާރުތަކުގެ ޕާލަމެންޓް މެންބަރުން ގަނެގެން ސަރުކާރުތައް ވައްޓާލުމުގެ ކުޅަދާނަ ޕާޓީއެއް ކަމެވެ.