އިންޑިއާގެ ވެރިކަން ކުރާ ޕާޓީ، ބާރަތިޔާ ޖަނަތާ ޕާޓީ (ބީޖޭޕީ)އަށް ނުވަތަ އިންޑިއާގެ މިހާރުގެ ބޮޑުވަޒިރު ނަރެންދުރަ މޯދީއަށް އެމަނިކުފާނު އެކަނި ސަރުކާރެއް އެކުލަވާލެވޭ ވަރަށް އެގައުމުގެ ޤާނޫނު ހަދާ މަޖިލީހުގެ ގޮނޑިތައް ކާމިޔާބު ނުކުރެވުނު ކަމަށް މީޑިއާ ރިޕޯޓްތައް ބުނެފިއެވެ.

ރަސްމީ ނަތީޖާ އިއުލާނު ކުރުމަށް އަދި ވަގުތު ނަގާނެ ކަމަށް ބެލެވިފައިވީ ނަމަވެސް މިހާތަނަށް ނަތީޖާ ނުކުމެފައިވާ ގޮތަށް ބަލާއިރު ގާނޫނު ހަދާ މަޖިލީހުގެ ތިރިގޭގެ ގޮނޑިތައް،  މޯދީގެ ޕާޓީއަށް އެކަނި ސަރުކާރެއް އެކުލަވާލެވޭވަރަށް ކާމިޔާބު ނުކުރެވުނަސް ލޮކް ސަބާގެ އެންމެ ގިނަ ގޮނޑި ކާމިޔާބު ކުރާނީ ބީޖޭޕީ ހިމެނޭ ނޭޝަނަލް ޑިމޮކްރަޓިކް އެލަޔަންސް (އެންޑީއޭ) އިން ކަމަށް ވަނީ ކަށަވަރު ވެފައެވެ.

އިންޑިއާގައި މިއަދު ބޭއްވި އާންމު އިންތިހާބުން މިހާތަނަށް ގުނާފައިވާ ފޮށިތަކުން، އިންޑިއާގެ ޤާނޫނު ހަދާ މަޖިލީހުގެ 543 ގޮނޑީގެ ތެރެއިން ބީޖޭޕީއަށް ލިބިފައިވަނީ 240 ގޮނޑިއެވެ. އިންޑިއަން ނޭޝަނަލް ކޮންގްރެސް އިންވަނީ 99 ގޮނޑި ނަގާފައެވެ.

މި ނަތީޖާ އައިސްފައިވާއިރު، އެގައުމުގެ ބޮޑު ވަޒީރު، ނަރެންދްރަ މޯދީ އޭނާގެ މަގާމު ދިފާއު ކުރަން ބޭނުންވާނަމަ، ދެން ޖެހޭނީ އިތުރު ޕާޓީތަކާއެކު ކޯލިޝަން ހަދާށެވެ.

މީގެ ކުރިން ބީޖޭޕީން ބަލާފައިވަނީ މި އިންތިހާބުގައި 400 އަށްވުރެ ގޮނޑި ކާމިޔާބު ކުރެވޭނެކަމަށެވެ. އެ ޕާޓީން އިންތިހާބުގެ ކެމްޕޭނު ކޮށްފައިވަނީ ވެސް 400 ގޮނޑި ލިބޭނެ ކަމަށް ބަލައިގެންނެވެ.

މި ނަތީޖާއާއި އެކުވެސް މޯދީ ވިދާޅުވެފައިވަނީ ރައްޔިތުން އިތުބާރާއި އެކީ އޭނާއަށް އިތުރު ދައުރެއް ދިނުމުން ރައްޔިތުންގެ ފަރާތުން ސަރުކާރަށް އޮތް އިތުބާރު ހާމަވެފައިވާ ކަމަށެވެ. އަދި މިއީ ތާރީހީ ކާމިޔާބީއެއް ކަމަށް ވެސް މޯދީ ވިދާޅުވިއެވެ.

ކޯލިޝަން ހަދައިގެން މޯދީ އިތުރު ދައުރެއް ކަށަވަރުކޮށްފިނަމަ، އޭނާ ވެގެން ދާނީ، އެގައުމުގެ ކުރީގެ ބޮޑު ވަޒިރު، ޖަވާހިރުލާލް ނެހުރޫއަށްފަހު، ތިން ވަނަ ދައުރެއް ކާމިޔާބު ކުރާ ފުރަތަމަ ބޮޑު ވަޒީރަށެވެ.

އިންޑިއާގެ އާއްމު އިންތިޚާބުގައި ލޮކްސަބާއަށް 543 މެމްބަރުން އިންތިޚާބު ކުރަނީ 5 އަހަރުގެ ދައުރަކަށެވެ. މި އިންތިޚާބުގައި ގާތްގަނޑަކަށް 970 މިލިއަން މީހުންނަށް ވޯޓު ލުމުގެ ހައްގު ލިބިފައިވެއެވެ. އެއީ ދުނިޔޭގެ އާބާދީގެ 10 އިން ސައްތައެވެ. ވޯޓު ލުމުގެ ހައްގު ލިބިފައިވާ މީހުންގެ ތެރެއިން ގާތްގަނޑަކަށް 642 މިލިއަން މީހުން ވޯޓުލީ ކަމަށް ވަނީ ބެލެވިފައެވެ.